Tus Na Yll Entra y'n Kuntelles

1Neb yw brewys y dhiwgell, po treghys y galgh ny enter a-ji dhe guntelles an Arloedh.

2Ny enter bastard a-ji dhe guntellyans an Arloedh, hwath bys y'n degves henedh ny enter y dhiyskynnysi a-ji dhe guntellyans an Arloedh.

3Naneyl Ammonyas na Moabyas ny enter a-ji dhe guntelles an Arloedh; hwath bys y'n degves henedh ny enter aga diyskynnysi a-ji dhe guntelles an Arloedh bys vykken, 4drefenn na'gas metsons gans bara ha gans dowr y'n fordh pan dheuthewgh yn-mes a Ejyp, hag arveth er dha bynn Balaam mab Beor dhiworth Pethor yn Aram Naharaym dhe'th vollethi. 5(Byttegyns, ny vynnas an Arloedh dha Dhuw goslowes orth Balaam ha'n Arloedh dha Dhuw a dreylyas an volleth dhe vos bennath ragos, rag an Arloedh dha Dhuw dhe'th kara.) 6Na hwila aga kres na'ga sewena oll dha dhydhyow bys vykken.

7Na aborr Edomyas, drefenn ev dhe vos dha vroder. Na aborr den a Ejyp, rag ty a veu alyon yn y bow.

8Fleghes genys dhedha y'n tressa henedh – aga diyskynnysi a yll dos a-ji dhe guntelles an Arloedh.

9Pan edh yn-mes dhe gampya erbynn dha eskerens, omwith rag pup-tra drog.

Glanythter y'n Kamp

10Mars eus yntredhowgh gour nag yw glan drefenn hwarvedhyans nosweyth, ena yth a dhe neb le a-ves a'n gamp; ny dheu a-bervedh y'n kamp; 11mes pan dheu an gorthugher, ev a omwolgh yn dowr; ha pan sedh an howl ev a dheu a-bervedh y'n kamp.

12Ty a' fydh privedhyow a-ves dhe'n kamp, le may hylli mos, 13hag y fydh lo-balas y'th taffar, ha pan esedhydh a-ves, ty a bal toll gensi; ena treyl a-dro ha kudh dha gawgh. 14Rag an Arloedh dha Dhuw a gerdh yn mysk dha gamp dhe'th sawya ha dhe dhelivra dha eskerens a-ragos. Dha gamp a vydh sans, ma na wello ynnos travyth anwiw, ha treylya a-dhiworthis.

Rewlys Divers

15Na dhelirv keth dh'y vester, neb a dhienkas dhis dhiworth y vester. 16Ev a yll triga yntredhowgh, y'n tyller a dhewis, yn onan a'th yetys yw da ganso, ha ny wredh y arwaska.

17Na vedhes hora-tempel a vyrghes Ysrael, na hora-tempel gorow a vebyon Ysrael. 18Na dhro gober hora, na arveth ki, a-bervedh yn chi an Arloedh dha Dhuw rag ambos vyth, rag pyth kasadow dhe'n Arloedh yw aga dew.

19Na brest dhe'th vroder ow kovynn oker: oker arghans, oker boes, oker a dravyth arall yw prestys ow kovynn oker. 20Dhe'n estren ty a yll presta ow kovynn oker, mes dhiworth dha vroder na wovynn oker, rag ma'th vennikko an Arloedh dha Dhuw yn pup-tra may hworrydh dha leuv warnodho y'n tir esos ow tos bys di dh'y erita.

21Pan ambosydh ambos dhe'n Arloedh dha Dhuw, na wra delatya an termyn dh'y gollenwel: drefenn an Arloedh dha Dhuw a'n hwila dhiworthis yn surredi, hag y fydh dhis pegh. 22Mes mar ny vynnydh gul ambos, ny vydh dhis pegh. 23An pyth a dheu yn-mes a'th tiwweus, henna a withydh ha'y wul, kepar hag offrynn bolonjedhek a ambossys dhe'n Arloedh dha Dhuw, hag a gewsis gans dha anow.

24Pan dheudh yn gwinlann dha gentrevek, ty a yll dybri dha walgh a rappys, kemmys a vynnydh; mes na wra aga gorra y'th lester. 25Pan dheudh yn ysek dha gentrevek ty a yll terri pennow-ys y'th leuv, mes na worr kromman war ys dha gentrevek.