1Mars eus dadhel yntra gwer, dens i dhe vreuslys hag i a re barn dhedha; ena i a akwit an den gwiryon ha dampnya an tebelwas. 2Mar tervynn an tebelwas bos gweskys, an breusyas a'n gwra dhe wrowedha ha bos gweskys a-ragdho, an niver ewn a strokosow herwydh y offens. 3Ev a yll ri dhodho dew-ugens strekys ha namoy, rag own, mara'n gwysk moy es henna gans lies strekys, dha vroder dhe vos dispresys a-wel dhis.

4Na golm min ojyon hag ev ow trushya.

Demmedhyans Levirek

5Mars eus breder trigys war-barth, hag onan anedha a verow ha nyns eus dhodho mab, na dhemmedhes gwreg an marow a-ves dhe'n teylu dhe wour estren; broder hy gour a dheu a-bervedh dhedhi ha'y hemmeres ragdho y honan avel gwreg ha gul y dhever dhedha avel broder dre lagha. 6An kynsa-genys a wra hi y dhineythi a erit hanow y vroder marow, rag na vo defendys y hanow dhiworth Ysrael. 7Mar ny vynn an gour kemmeres gwreg y vroder, ena gwres gwreg y vroder mos yn-bann dhe'n yet dhe'n henavogyon ha leverel, ‘Ow broder dre lagha a skon a wul dhe hanow y vroder pesya yn Ysrael; ny vynn gul dhymm dever broder dre lagha.’ 8Ena henavogyon y dre a elow dhodho, ha kewsel ganso. Mar sev fast ha leverel, ‘Ny vynnav hy hemmeres’, 9ena gwreg y vroder a dheu nes dhodho a-wel dhe'n henavogyon, ha remova y sandal a-dhiworth y droes ha trewa yn y fas, ha gorthybi ha leverel, ‘Yndella y fydh gwrys dhe'n gour na dhrehav chi y vroder.’ 10Hag ev a vydh aswonnys yn Ysrael avel ‘Chi an den removyes y sandal.’

Rewlys Divers

11Mar omladh gwer war-barth, an eyl gans y gila, ha gwreg onan anedha a dheu nes dhe sawya hy gorti dhiworth leuv an den a'n gwysk, ha gorra yn-mes hy leuv ha dalghenna y brivitys, 12ty a dregh dhe-ves hy leuv; na gemmeres dha lagas pita anedhi.

13Ny' fydh y'th sagh diw eghenn a boesow, onan bras hag onan byghan 14Ny' fydh y'th chi diw eghenn a efa, onan bras hag onan byghan. 15Poes kowal hag ewn y fydh dhis, hag efa kowal hag ewn y fydh dhis, may fo dha dhydhyow hir war an tir a wra an Arloedh dha Dhuw y ri dhis. 16Rag kasadow a-rag an Arloedh dha Dhuw yw peub a wra an taklow ma, peub a wra kammhynseth.

17Porth kov a bup-tra a wrug Amalek dhis y'n fordh pan dheuthewgh yn-mes a Ejyp, 18neb a'th vetyas y'n fordh ha treghi yn-nans an re esa ow treynya a-dryv, pan veus skwith ha gwann; ha ny borthas own a Dhuw. 19Ytho pan wra an Arloedh dha Dhuw ri dhis powesva dhiworth oll dha eskerens a-derdro, y'n tir a wra an Arloedh dha Dhuw y ri dhis avel eretons dh'y erita, ena ty a dhefend dhe-ves yn tien kov Amalek a-dhann nev. Na ankov.