Grasyans rag an Drevas

1Pan dheudh dhe'n tir a wra an Arloedh dha Dhuw y ri dhis avel eretons ha ty a'n erit, ha triga ynno, 2ty a gemmer neppyth a'n kynsa a oll frut an tir a dhredh mes a'th tir a wra an Arloedh dha Dhuw y ri dhis ha'y worra yn kanstell, ha mos dhe'n tyller a wra an Arloedh dha Dhuw y dhewis dhe wul dh'y hanow triga ena, 3ha dos dhe'n oferyas a serv y'n dydhyow na, ha leverel dhodho, ‘My a dhiskler hedhyw dhe'n Arloedh dha Dhuw, devedhys ov dhe'n tir a wrug an Arloedh ti dh'agan tasow y ri dhyn.’ 4An oferyas a gemmer an ganstell dhiworth dha leuv ha'y settya a-rag alter an Arloedh dha Dhuw.

5Ena ty a worthyp ha leverel a-rag an Arloedh dha Dhuw, ‘Aramean gwandrek o ow thas, hag ev eth yn-nans dhe Ejyp ha godriga ena gans boghes tus hag ena mos ha bos kenedhel vras, krev ha niverus. 6Mes an Ejyptianys a'gan tebeldhyghtyas ha'gan arwaska, ha gorra warnan lavur kales. 7Ena ni a grias war an Arloedh, Duw agan tasow, ha'n Arloedh a glewas agan lev ha gweles agan galar, ha'gan trobel, ha'gan arwask. 8Ytho an Arloedh a'gan dros mes a Ejyp gans dorn grev ha bregh ystynnys, gans own bras, ha gans toknys, ha gans marthusyon; 9hag ev a'gan dros dhe'n tyller ma, ha ri dhyn an tir ma, tir a dhinwa leth ha mel; 10ha lemmyn otta, my re dhros kynsa frut an tir a wrussys y ri dhymm, A Arloedh.’ Ena ty a wra y settya a-rag an Arloedh dha Dhuw ha plegya dhe'n dor a-rag an Arloedh dha Dhuw. 11Ha ty a lowenha yn pup-tra da re ros dhis an Arloedh dha Dhuw, ha dhe'th chi, ty ha'n Levyas ha'n alyon usi yn agas mysk.

An Degedhow

12Wosa kowlwul degevi pub dega a'th askorr y'n tressa blydhen, blydhen an dega, ena ty a re dhe'n Levyas, dhe'n alyon, dhe'n omdhivas ha dhe'n wedhwes, may tepprons y'th yetys ha bos gwalghys. 13Ena ty a lever a-rag an Arloedh dha Dhuw, ‘My re removas an dra sans dhiworth an chi, hag ynwedh my re'n ros dhe'n Levyas ha dhe'n alyon, dhe'n omdhivas ha dhe'n wedhwes herwydh oll dha worhemmynn a worhemmynnsys dhymm. Ny dremenis dres dha worhemmynnow na'ga ankevi. 14Ny dhybris dhiworto pan esen ow kyni, na remova travyth anodho pan en vy avlan, na ri travyth anodho dhe dhen marow. My re woslowas lev an Arloedh ow Duw ha gul war-lergh pup-tra a worhemmynnsys dhymm. 15Mir war-woeles yn-mes a'th trigva sans dhiworth nev ha bennik dha bobel Ysrael ha'n tir re resys dhyn kepar dell desys dh'agan tasow, tir a dhinwa leth ha mel.’

Diwedh an Nessa Areth

16Hedhyw an Arloedh dha Dhuw a worhemmynn dhis gul an ordenansow ma ha'n breusow; gwayt aga gul gans oll dha golonn ha gans oll dha enev. 17Re dhisklersys hedhyw an Arloedh dhe vos dha Dhuw, ha ty dhe gerdhes yn y fordhow, ha gwitha y ordenansow ha'y worhemmynnow ha'y vreusow, ha goslowes orth y lev. 18Ha'n Arloedh re dhiskleryas hedhyw ty dhe vos dhodho pobel arbennik dhodho y honan kepar dell gewsis dhis, ha ty dhe witha oll y worhemmynnow; 19ytho ev a'th sett ughel a-ugh oll an kenedhlow a wrug, rag gormel, rag hanow, rag enor, rag may fi pobel sans dhe'n Arloedh dha Dhuw kepar dell gewsis.