Geryow Finek Moyses

1Moyses ha henavogyon Ysrael a worhemmynnis dhe'n bobel, ow leverel: Gwith oll an gorhemmynn esov orth y worhemmynna dhywgh hedhyw. 2Hag y'n jydh may treusowgh an Yordan dhe'n tir a wra an Arloedh dha Dhuw y ri dhis, ty a dhrehav ragos menhiryon bras, ha'ga flastra gans lim. 3Skrif warnedha oll geryow an lagha ma pan dreusydh, rag may tyffi dhe'n tir a wra an Arloedh dha Dhuw y ri dhis, tir a dhinwa leth ha mel, kepar dell gewsis Arloedh Duw dha dasow orthis. 4Pan dreusowgh an Yordan, drehevewgh an menhiryon ma a wrav vy gorhemmynna dhywgh hedhyw war venydh Ebal, ha'ga flastra gans lim, 5ha drehav ena alter dhe'n Arloedh dha Dhuw, alter meyn. Na wra devnydh a doulys horn warnedha. 6Gans meyn dien y trehevydh alter Arloedh dha Dhuw, hag offrynna warnodho offrynnow leskys dhe'n Arloedh dha Dhuw. 7Ha ty a sakrifi offrynnow kres ha'ga dybri ena ha lowenhe a-rag an Arloedh dha Dhuw. 8Ha skrif war an meyn oll geryow an lagha ma, yn pur gler.

9Ena Moyses ha'n oferysi leviek a gewsis dhe oll Ysrael, ow leverel: Taw ha goslow, A Ysrael. Hedhyw ty re dheuth ha bos pobel dhe'n Arloedh dha Dhuw. 10Rakhenna goslow orth lev an Arloedh dha Dhuw ha gul y worhemmynnow ha'y ordenansow esov ow korhemmynna dhis hedhyw.

11Ha Moyses a worhemmynnis dhe'n bobel an jydh na, ow leverel: 12An re ma a sev dhe venniga an bobel war venydh Gerizim wosa hwi dhe dreusi an Yordan: Simeon, ha Levi, ha Yuda, hag Yssakar, ha Yosep, ha Benyamin. 13Ha'n re ma a sev rag an volleth war venydh Ebal: Rewben, Gad hag Asher ha Zebulun, Dan ha Naftali. 14An Levysi a worthyp, ow leverel dhe bub gour a Ysrael gans lev ughel:

An Dewdhek Molleth

15‘Mollothek yw an gour neb a wra imaj gravys po imaj teudh, tra gasadow dhe'n Arloedh, ober diwleuv krefter, ha neb a'n sett yn-bann yn-dann gel.’ Ena oll an bobel a worthyp ow leverel, ‘Amen.’

16‘Mollothek yw ev neb a dhispres y das ha'y vamm.’ Ena oll an bobel a lever, ‘Amen.’

17‘Mollothek yw ev neb a remov orven y gentrevek.’ Ena oll an bobel a lever, ‘Amen.’

18‘Mollothek yw ev neb a gammled den dall y'n fordh.’ Ena oll an bobel a lever, ‘Amen.’

19‘Mollothek yw ev neb a dreyl dhe-ves gwirvreus dhiworth an alyon, an omdhivas, ha'n wedhwes.’ Ena oll an bobel a lever, ‘Amen.’

20‘Mollothek yw ev neb a wrowedh gans gwreg y das, drefenn ev re dhiskudhas lostenn y das.’ Ena oll an bobel a lever, ‘Amen.’

21‘Mollothek yw ev neb a wrowedh gans best pynag a vo.’ Ena oll an bobel a lever, ‘Amen.’

22‘Mollothek yw ev neb a wrowedh gans y hwoer, myrgh y das, po myrgh y vamm.’ Ena oll an bobel a lever, ‘Amen.’

23‘Mollothek yw ev neb a wrowedh gans y hweger.’ Ena oll an bobel a lever, ‘Amen.’

24‘Mollothek yw ev neb a ladh y gentrevek yn-dann gel.’ Ena oll an bobel a lever, ‘Amen.’

25‘Mollothek yw ev neb a gemmer falswober dhe skoella goes gwiryon.’ Ena oll an bobel a lever, ‘Amen.’

26‘Mollothek yw ev neb na venten geryow an lagha ma orth aga gul.’ Ena oll an bobel a lever, ‘Amen.’