Bennathow rag Gostytter

1Mar koslewydh devri lev an Arloedh dha Dhuw ha gwaytyas gul oll y worhemmynnow esov orth aga worhemmynna dhis hedhyw, ena an Arloedh dha Dhuw a'th sett ughel a-ugh oll kenedhlow an norvys. 2Hag oll an bennathow ma a dheu warnas ha tremena dresos, mar koslewydh lev an Arloedh dha Dhuw.

3Benniges vydhydh y'n dre,

ha benniges vydhydh y'n gwel.

4Benniges vydh frut dha gorf,

frut dha dir, ha frut dha jatel,

leughi dha vughes, hag eyn dha flokk.

5Benniges vydh dha ganstell ha'th new-toesa.

6Benniges vydhydh pan dheudh a-ji,

ha benniges vydhydh pan edh yn-mes.

7An Arloedh a wra dhe'th eskerens, a sev er dha bynn, bos gweskys a-ragos. Yth ons mes er dha bynn yn unn fordh ha fia yn seyth fordh a-ragos. 8An Arloedh a worhemmynn an vennath warnas ha war dha skiberyow ha war bup-tra may hworrydh dha leuv warnodho; hag ev a'th vennik y'n tir a wra an Arloedh dha Dhuw y ri dhis. 9An Arloedh a wra dha fastya dhe vos pobel sans dhodho y honan kepar dell dos dhis, mar kwithydh gorhemmynnow an Arloedh dha Dhuw ha kerdhes yn y fordhow. 10Ena oll kenedhlow an norvys a wel ty dhe vos gelwys gans hanow an Arloedh; hag i a berth own ahanas. 11An Arloedh a'th wra dhe seweni yn frut dha gorf, yn frut dha jatel, yn frut dha dir war an tir a dos an Arloedh dhe'th tasow y ri dhis. 12An Arloedh a iger y dresorva dha, an nevow, dhe ri glaw dhe'th tir yn y seson ha dhe venniga oll an ober a'th leuv; ty a brest dhe lies kenedhel mes ty, ny gevydh prestenn. 13An Arloedh a'th wra dhe vos an penn a-der an lost; y fydhydh unnsel a-wartha, ha ny vydhydh a-woeles, mar koslewydh gorhemmynnow an Arloedh dha Dhuw esov orth dha worhemmynna hedhyw, dh'aga gwitha ha dh'aga gul. 14Na dreyl a-denewen dhiworth oll an geryow esov ow korhemmynna dhis hedhyw, dyghow na kledh, dhe gerdhes war-lergh duwow erell dh'aga servya.

Mollothow rag Diwostytter

15Mes mar ny woslowydh orth lev an Arloedh dha Dhuw, ow kwitha hag ow kul oll y worhemmynnow ha'y ordenansow esov orth aga gorhemmynna dhis hedhyw, ena y tons warnas oll an mollothow ma, hag i a dremen dresos.

16Mollothek vydhydh y'n dre, ha mollothek vydhydh y'n gwel.

17Mollothek vydh dha ganstell ha'th new-toesa.

18Mollothek vydh frut dha gorf ha frut dha dir, leughi dha jatel, hag eyn dha flokk.

19Mollothek vydhydh pan dheudh a-ji, ha mollothek vydhydh pan edh yn-mes.

20An Arloedh a dhannvon warnas molleth, ha skruth, ha keredh yn pup-tra may hworrydh dha leuv warnodho bys pan vydhydh distruys, ha bys pan edh dhe goll yn tromm, drefenn droktra dha wryth, orth ow forsakya. 21An Arloedh a wra dhe'n plag glena orthis bys ma'th tileas dhiwar an tir mayth esos ow tos di dh'y erita. 22An Arloedh a'th wysk gans kleves gwastya, ha gans terthenn, ha gans fevyr, ha gans brewvann, ha gans an kledha ha gans kleves losk ha kleves melynheans y'n ys, hag i a'th helgh bys pan vydhydh diswrys. 23Dha ebron a-ugh dha benn a vydh brons, ha'n dor yn-dannos a vydh horn. 24An Arloedh a dreyl glaw dha dir dhe bolter ha doust; dhiworth an ebron y tiyskynn warnas bys pan vydhydh distruys.

25An Arloedh a wra dhis bos fethys gans dha eskerens. Yth edh yn-mes er y bynn yn unn fordh ha fia yn seyth fordh a-ragdho, ha ty a vydh euth dhe oll kenedhlow an norvys. 26Dha gorf a vydh boes rag pub edhen a'n ebron ha rag bestes an gwel, ha ny vydh nagonan dh'aga chasya dhe-ves. 27An Arloedh a'th wysk gans bryghi Ejyp, ha gans hwedhow, ha gans krevennow, ha dre'n debron, ma na yllydh bos yaghhes. 28An Arloedh a'th wysk gans muskogneth, gans dellni, ha gans sowdhan a vrys. 29Ty a vydh ow palvala yn hanter-dydh, kepar dell balval an dall y'n tewolgow; ny wredh dhe'th fordhow seweni; devri y fydhydh arweskys ha ledrys, ha ny wra nagonan dha sawya. 30Ty a vydh ambosys dhe venyn, ha gour arall a's defol; ty a dhrehav chi, mes ny drigydh ynno; ty a blans gwinlann, mes ny wredh devnydh anedhi. 31Dha ojyon a vydh ledhys a-wel dhis, mes ny dhybrydh dhiworto; dha asen a vydh kemmerys dhiworthis dre nerth ha ny vydh daskorrys dhis; dha dheves a vydh res dhe'th eskerens ha ny vydh dhis nagonan dh'aga sawya. 32Dha vebyon ha'th vyrghes a vydh res dhe bobel arall; dha dhewlagas a vir gans hireth ragdha oll an jydh, mes ny' fydh nerth y'th leuv. 33Pobel na aswonnsys a dheber frut dha dir hag oll askorr dha lavur, ha ny vydhydh saw arweskys ha tebeldhyghtys oll dha dhydhyow. 34Ty a vydh gorboellek gans an pyth a wra dha lagas y weles. 35An Arloedh a'th wysk gans drog vryghi y'th tewlin ha'th tiwarr ma na yllydh bos yaghhes dhiworta, a wodhen dha droes bys y'th krogen.

36An Arloedh a'th tro, ty ha'n myghtern re settsys warnas dha honan, dhe genedhel na aswonnsys, naneyl ty na'th tasow, hag ena ty a serv duwow erell a brenn hag a ven. 37Ty a vydh an acheson a euth, ha parabolenn, ha ges yn oll an poblow may hwra an Arloedh dha ledya bys di. 38Ty a dheg yn-mes dhe'n gwel meur a has ha kuntell boghes, drefenn an lokust dh'y dhevorya. 39Ty a blans gwinlannow ha gonedha, mes ny evydh gwin na guntell grappys, drefenn an pryv dh'aga dybri. 40Ty a' fydh olewbrennyer yn oll dha oryon mes ny omuntydh dha honan drefenn dha olewennow dhe dhroppya. 41Ty a dhineyth mebyon ha myrghes, mes ny vydhons dhis, rag yth ons yn kethneth. 42An gryll a erit oll dha gwydhennow ha frut dha dir. 43An alyon usi trigys yntredhowgh a yskynn a-ughos moy ha moy ughel; ha ty a dhiyskynn moy ha moy isel. 44Ev a re kendon dhis, mes ny redh kendon dhodho. Ev a dheu ha bos an penn, ha ty a dheu ha bos an lost. 45Oll an mollothow ma a dheu warnas, ha'th pursiwya ha tremena dresos bys pan vydhydh distruys, rag ny woslewsys orth lev an Arloedh dha Dhuw ha gwitha y worhemmynnow ha'y ordenansow a worhemmynnis dhis. 46I a vydh warnas avel tokyn ha marth, ha war dha has bys vykken.

47Drefenn na servsys an Arloedh dha Dhuw gans joy ha gans kolonn lowen rag lanwes a bup-tra oll, 48ty a serv dha eskerens a wra an Arloedh dha Dhuw dannvon er dha bynn, yn nown, hag yn syghes, hag yn noethedh, hag yn esow a bup-tra oll; hag ev a worr yew a horn war dha gonna, bys may hwrello dha dhistrui. 49An Arloedh a dhrehav er dha bynn kenedhel a bellder, dhiworth penn an norvys, mar skav dell nij an er yn-nans, kenedhel ma na gonvedhydh hy thaves, 50kenedhel a fas fers, na wra enor dhe'n henavek ha na vydh grassyes dhe'n yowynk; 51hag ev a dheber leughi dha vestes hag askorr dha dir bys may hwrello dha dhistrui; ny as ragos ys, gwin nag olew, leughi dha jatel nag eyn dha flokk bys may hwrello dha dhistrui. 52Ev a omsett a-dro dhis yn oll dha yetys bys pan goettho dha fosow ughel ha kerys mayth esos ow trestya ynna der oll dha dir; hag ev a omsett a-dro dhis, yn oll dha yetys der oll dha dir, a ros an Arloedh dha Dhuw dhis. 53Ena ty a dheber frut dha gorf dha honan, kig dha vebyon ha'th vyrghes a ros an Arloedh dha Dhuw dhis, drefenn an omsettyans stroeth may hwra dha eskar dha stroetha ganso. 54An gour medhel yn agas mysk ha pur vleudh a dreyl erbynn y vreder, ha'y wreg ger, ha war remenant y vebyon a vydh gesys, 55ma na re dhe nagonan anedha neppyth a gig y fleghes a wra eva aga dybri, rag nag eus travyth gesys dhodho, drefenn an omsettyans stroeth ma'th stroeth an eskar ganso yn oll dha yetys. 56An benyn vedhel ha bleudh yn agas mysk neb na vedh gorra hy godhen war an dor drefenn medhelder ha bleudhder, a dreyl erbynn gour hy askra, ha'y mab, ha'y myrgh, 57ha'y bryghenn a dheu yn-mes yntra hy treys ha war hy mebyon a dhineyth; rag hi a wra aga dybri yn esow a bup-tra oll yn-dann gel, y'n omsettyans stroeth may hwra dha eskar dha stroetha ganso y'th yetys.

58Mar ny waytydh gul oll geryow an lagha ma yw skrifys y'n lyver ma, ow perthi own a'n hanow gloryus hag euthyk ma, an Arloedh dha Dhuw, 59ena an Arloedh a dhre warnas ha war dha has plagys marthys, plagys bras hag a dhur, ha drog glevesow hag a dhur. 60Ev a dhre warnas arta oll disesys Ejyp may perthsys own anedha; hag i a len orthis. 61Ynwedh an Arloedh a dhre warnas pub kleves ha pub plag nag yw skrifys yn lyver an lagha ma bys pan vi distruys. 62Hwi a vydh gesys boghes agas niver, kynth ewgh kyns avel ster nev yn niver, drefenn na woslewsys lev an Arloedh dha Dhuw. 63Kepar dell lowenhas an Arloedh yn agas kever dhe wul da dhywgh, ha dh'agas ynkressya, yndella an Arloedh a lowenha yn agas kever dh'agas diswul, ha dh'agas distrui. Hwi a vydh diwreydhys dhiwar an tir mayth esos ow tos di dh'y erita. 64Ena an Arloedh a wra dha skattra yn mysk oll an poblow dhiworth unn penn a'n norvys bys y'n penn arall, hag ena ty a serv duwow erell neb na aswonnsys, naneyl ty na'th tasow, prenn ha men. 65Hag yn mysk an kenedhlow ma ny' fydh powes, ha ny vydh powesva dhe wodhen dha droes. Ena an Arloedh a re dhis kolonn a gren, ha dewlagas a fyll, hag enev ydhil. 66Dha vewnans a greg yn dout a-ragos, ha ty a gren mo ha myttin, ha ny' fydh surheans a'th vewnans. 67Myttin ty a lever, ‘Unnweyth a pe gorthugher!’ ha gorthugher ty a lever, ‘Unnweyth a pe myttin!’ rag euth dha golonn a wredh y berthi, ha rag an taklow a wra dha dhewlagas aga gweles. 68An Arloedh a'th tre arta dhe Ejyp yn gorholyon y'n fordh a leveris dhis na wres hy gweles nevra namoy; hag ena ty a as dha honan dhe vos gwerthys dhe'th eskerens avel kethyon ha kethesow mes denvyth ny wra agas prena.