Kan Moyses

1Goslow nev, ha my a gews;

klew, norvys, geryow ow ganow.

2Ow dyskans a dhropp avel an glaw,

ha'm lavar a dhever avel gluth,

avel kowasow war aswels,

hag avel glawas war losow.

3Rag my a dhiskler hanow an Arloedh;

askrifewgh meuredh dh'agan Duw.

4An Garrek – perfydh yw y ober,

rag oll y fordhow yw ewn;

Duw a lenduri, heb kammhynseth,

gwiryon ha kompes yw ev.

5I re'n dyghtyas yn fals,

nyns yns i y vebyon drefenn aga namm;

yth yns i henedh gorth ha kamm.

6A attylowgh an Arloedh yndella,

pobel goeg ha diboell?

A nyns yw ev dha Das, dha Wrier,

neb a'th formyas, ha neb a'th fastyas?

7Porth kov a'n dydhyow koth

prederewgh an blydhynyow a lies henedh:

govynn orth dha das hag ev a'n deriv dhis,

orth dha henavogyon hag i a'n lever dhis.

8Pan ros an Ughella aga eretons dhe'n kenedhlow,

pan rannas mebyon den,

ev a settyas oryon poblow

war-lergh niver mebyon Ysrael.32:8 mebyon Ysrael: War-lergh an Septuagint mebyon an eledh. Yn onan a dhornskrifow Qumran yma mebyon Duw.

9Rag rann an Arloedh yw y bobel;

Yakob yw kevrenn y eretons.

10Ev a'n kavas yn tir ynyal,

hag yn gwylvos a dhifeythtir gwynsek,32:10 gwynsek: Ebrow owth oulya, martesen son an gwyns, po lev goedhviles, po son kyni.

orth y gyrghynna, y gara,

y witha avel bew y lagas.

11Avel er hag a dhifun y neyth,

ha bargesi a-ugh y ydhnigow,

yndella ev a lesas y dhiwaskell, ha'ga hachya,

ha'ga doen war bluvennow y eskelli.

12An Arloedh y honan a'n hembronka;

nyns esa ganso duw estren.

13Ev a wrug dhodho marghogeth war dylleryow ughel an tir,

hag ev a dhybris askorr an gwel;

ev a wrug dhodho sugna mel yn-mes a'n garrek,

hag oyl a ven flynt;

14leth kowlys a vughes ha leth a dheves,

gans blonek eyn, ha hordhes megys yn Bashan,

ha gever, gans an gwella gwaneth,32:14 an gwella gwaneth: Ebrow blonek lonethi gwaneth, henn yw an rann a-bervedh a'n greunennow.

hag a woes grappys ty a evas gwin ewynek.

15Yakob a dhybris hag a veu gwalghys,32:15 Yakob a dhybris hag a veu gwalghys: Ow siwya an Septuagint ha'n Pentatewgh Samaritanek. Nyns usi an geryow y'n tekst masoretek.

Yeshurun a dheuth ha bos tew hag a botyas;

ty a dheuth ha bos tew ha berrik, ha bos gorth;

ev a forsakyas Duw neb a'n gwrug,

ha despitya Karrek y selwyans.

16I a'n gwrug avius dre dhuwow estren;

dre daklow kasadow i a'n sorras.

17I a sakrifias dhe jevanow a-der dhe Dhuw,

duwow na aswonnsons,

dhe dhuwow nowydh devedhys degynsow,

na wodhva aga thasow travyth anedha.

18Ty a dhispresyas an Garrek a'th tineythis,

hag ankevi Duw neb a'th tros dhe enesigeth.

19Mes an Arloedh a welas ha'ga skonya,

serrys gans y vebyon ha'y vyrghes.

20Ev a leveris, My a gudh ow fas dhiworta,

ha my a wel pandr'a vydh aga diwedh;

rag yth yns i henedh gorth,

mebyon heb lelder ynna.

21I a'm gwrug avius dre neppyth nag yw duw,

i a'm sorras gans aga idolys koeg;

rakhenna my a's gwra avius dre bobel dhistyr,

my a wra aga serri dre genedhel gokki.

22Rag tan re dhewis dre'm sorr

ha leski a wra bys yn downderyow ifarn;

ev a dheber an dor ha'y askorr,

hag enowi gans tan selyow an menydhyow.

23My a worr bern a dhrogow warnedha;

oll ow sethow a spenav warnedha.

24I a vydh gwannhes gans divoetter,

ha devorys gans plag ha kleves hwerow;

my a dhannvon ynna dyns bestes,

gans venim serf ow kramya yn doust.

25A-ves, an kledha a wra dhe dus bos anvap,

hag a-ji, yma euth rag gour yowynk ha gwyrghes,

an flogh ow tena, gans an gour a vlew loes.

26My a leveris: My a's defend dhe-ves;

my a dhile aga hovadh dhiworth densys;

27na ve my dhe berthi own a sorr an eskar,

ma na wrella y envi kammgonvedhes,

ma na lavarrens, ‘Agan leuv yw ughel;

ny veu an Arloedh neb a wrug oll hemma.’

28Rag i yw kenedhel na amont kusul dhedha,

ha nyns eus konvedhes ynna.

29Unnweyth a pens fur ha konvedhes hemma,

ha dissernya aga fin!

30Fatell allsa unn den chasya mil,

po dew fesya deg mil,

mar ny's gwerthas aga Harrek,

ha'n Arloedh a's daskorras.

31Rag nyns yw aga harrek i haval dh'agan Karrek ni,

dell yll agan eskerens aga honan breusi.

32Aga gwinbrenn yw dhiworth gwinbrenn Sodom,

ha dhiworth gwinlannow Gomorra.

Aga grappys yw grappys gwenon,

yma dhedha bagasow a rappys hwerow.

33Aga gwin yw venim serf,

ha venim nadres fell.

34A nyns yw hemma gwithys genev,

selys y'm gwithvaow?

35Dial yw dhymm, hag attal,

yn termyn may hwra aga throes trebuchya;

rag ogas yw dydh aga therroes,

ha'ga thenkys a fisten dhedha.

36Rag an Arloedh a vreus y bobel,

ha kemmeres pita a'y servysi,

pan wel aga nerth dhe vos gyllys,

ha nag eus nagonan gesys, keth na rydh.

37Ena y lever, Ple'ma aga duwow,

an garrek may hwilsons skovva ynni,

38neb a dhybris blonek aga sakrifisow,

hag eva gwin aga offrynnow diwes?

Sevens dh'agas gweres,

ha bos skovva ragowgh.

39Gwelewgh lemmyn, my, my yw ev,

ha nyns eus duw marnas vy.

My a ladh, ha my a vewha;

my a vrew ha my a yaghha,

ha nyns eus nagonan a yll delivra dhiworth ow leuv.

40Rag my a dhrehav ow leuv dhe nev,

ha leverel: Dell vewav bynitha,

41pan lymmav lughes ow kledha,

ha'm leuv a sett dalghenn ynno yn breus,

my a dal dial war ow eskerens,

hag attyli an re a'm kas.

42My a wra dhe'm sethow bos medhow gans goes,

ha'm kledha a dheber kig –

gans goes an re ledhys ha'n gethyon,

dhiworth pennow ledyoryon an eskar.32:42 dhiworth pennow ledyoryon an eskar: Ow siwya an Septuagint.

43Germewgh yn lowen, kenedhlow, gans y bobel,

rag ev a gemmer dial war woes y servysi,

ha tewlel dial war y eskerens,

ha dasprena tir y bobel.

44Moyses a dheuth ha kewsel oll geryow an gan ma yn diwskovarn an bobel, ev ha Yoshua32:44 Yoshua: Ow siwya an Septuagint, an Syriek ha'n Vulgat. Ebrow Hoshea. mab Nun. 45Pan gowlwruk Moyses kewsel oll an geryow ma dhe oll Ysrael, 46ev a leveris dhedha, ‘Settyewgh agas kolonn war oll an geryow esov orth aga desta dhywgh hedhyw, a wredh aga gorhemmynna dh'agas mebyon, ow kwaytyas gul oll geryow an lagha ma. 47Rag nyns yw hemma tra drufel ragowgh, mes agas bewnans yw; ha der an dra ma hwi a hirha agas dydhyow war an tir mayth esowgh ow treusi an Yordan di dh'y erita.’

Mernans Moyses Darleverys

48Ha'n Arloedh a gewsis dhe Moyses y'n keth jydh na, ow leverel, 49‘Yskynn dhe venydh an Abarim32:49 venydh an Abarim: Kadon a venydhyow est dhe'n Mor Marow ha'n Yordan, yn tiredh Moab. ma, dhe venydh Nebo usi yn pow Moab, a-dal Yeriko, ha gwel pow Kanan, a rov dhe vebyon Ysrael yn perghennogeth, 50ha marw war an menydh mayth esos owth yskynna di, ha bydh kuntellys dhe'th pobel, kepar dell verwis Aron dha vroder war venydh Hor, hag y feu kuntellys dh'y bobel; 51drefenn agas bos dislel dhymm yn mysk mebyon Ysrael orth dowrow Meriba-kadesh yn gwylvos Sin; drefenn na wrussowgh ow sanshe yn mysk mebyon Ysrael. 52Rag ty a wel an tir a-ragos, mes ny edh dhe'n tir a rov dhe vebyon Ysrael.’