Mernans hag Ynkleudhyans Moyses

1Ena Moyses a yskynnas dhiworth plenys Moab dhe venydh Nebo, penn Pisga, usi a-dal Yeriko. Ha'n Arloedh a dhiskwedhas dhodho oll an tir, Gilead bys Dan, 2oll Naftali, ha tir Efraym, ha Manasse, hag oll pow Yuda bys yn mor an howlsedhes, 3an Negeb ha'n plen a-dro dhe nans Yeriko, sita an palmwydh, bys yn Soar. 4Ena an Arloedh a leveris dhodho, ‘Hemm yw an tir a des dhe Abraham, dhe Ysak, ha dhe Yakob, ow leverel, “My a'n re dhe'th has.” My re asas dhis y weles gans dha dhewlagas dha honan, mes ny dreusydh di.’ 5Ytho Moyses, gwas an Arloedh a verwis ena yn pow Moab herwydh lavar an Arloedh. 6Ev34:6 Ev: Henn yw an ARLOEDH. War-lergh an Septuagint I. a'n ynkleudhyas y'n nans yn pow Moab, a-dal Beth-peor, mes denvyth ny woer tyller y vedh bys y'n jydh hedhyw. 7Ha Moyses o hwegh ugens bloedh pan verwis; ny veu y lagas gwannhes, ha ny veu y nerth lehes. 8Mebyon Ysrael a oelas rag Moyses yn plenys Moab deg dydh warn ugens; ena an dydhyow a oelva ha kynvann rag Moyses a veu kowlwrys.

9Ha Yoshua mab Nun o lenwys a'n spyrys a furneth, drefenn Moyses dhe worra y dhiwla warnodho; ytho mebyon Ysrael a woslowas orto ha gul kepar dell worhemmynnis an Arloedh dhe Moyses. 10Ha ny sevis profoes arta yn Ysrael avel Moyses, neb a wrug an Arloedh y aswonn fas orth fas, 11yn oll an toknys ha marthusyon may hwrug an Arloedh y dhannvon dh'aga gul yn pow Ejyp dhe Faro, ha dhe oll y servysi, ha dhe oll y bow, 12ha rag oll an galloes meur hag oll an euth bras a dhispletyas Moyses a-wel dhe oll Ysrael.