Moyses a Ergh Gostytter

1Lemmyn, Ysrael, goslow an ordenansow ha'n breusow esov ow tyski dhywgh dhe wul, rag may fewowgh ha dos hag erita an tir usi an Arloedh Duw agas tasow ow ri dhywgh. 2Na geworrewgh dhe'n ger esov ow korhemmynna dhywgh, ha na gemmerewgh dhe-ves anodho, dhe witha gorhemmynnow an Arloedh agas Duw esov ow korhemmynna dhywgh. 3Agas dewlagas a welas an pyth a wrug an Arloedh orth Baal-peor; rag pub gour a gerdhas war-lergh Baal-peor, an Arloedh dha Dhuw a'n distruis yn-mes ahanas, 4mes hwi neb a lenas orth an Arloedh agas Duw, hwi oll yw bew hedhyw. 5Mir, my re dhyskas dhywgh ordenansow ha breusow kepar dell worhemmynnis dhymm an Arloedh ow Duw, rag may hwryllowgh yndella. 6Gwaytyewgh dh'aga gul, rag hemm yw agas furneth ha'gas konvedhes a-wel dhe'n bobel neb a glew oll an ordenansow ma, ha neb a lever, ‘Yn hwir an genedhel vras ma yw pobel fur ha dhedhi konvedhes.’ 7Rag pana genedhel vras eus, neb a's teves Duw rybdhi, kepar ha'n Arloedh agan Duw, peskweyth may helwyn dhodho. 8Ha pana genedhel vras a's teves ordenansow ha breusow gwiryon kepar ha'n lagha ma esov ow settya a-ragowgh hedhyw?

9Saw kemmer with, ha gwith dha enev gans rach, ma na ankeffi an taklow a welas dha dhewlagas, ha ma na dhibarthons dhiworth dha golonn dre oll dydhyow dha vewnans; mes gwra aga dyski dhe'th vebyon, ha dhe vebyon dha vebyon: 10an jydh may sevsys a-rag an Arloedh dha Dhuw orth Horeb, pan leveris dhymm an Arloedh, ‘Kuntell an bobel dhymm, may hwrylliv dhedha klewes ow geryow ha may tyskons perthi own ahanav oll an dydhyow esons ow pewa war an tir, ha'ga dyski dh'aga mebyon.’ 11Hwi a dheuth nes ha sevel yn-dann an menydh, ha'n menydh a loskas gans tan bys yn kolonn an nevow, gans tewlder, kommol, ha tewolgow. 12Ena an Arloedh a gewsis genowgh yn-mes a gres an tan. Yth esewgh ow klewes son geryow, mes nyns esewgh ow kweles furv, saw son. 13Ev a dhiskleryas dhywgh y gevambos a worhemmynnis dhywgh dhe wul, an deg ger, hag ev a's skrifas war dhiw leghenn a ven. 14An Arloedh a'm gorhemmynnis y'n tor' na dhe dhyski dhywgh ordenansow ha breusow, dh'aga gul y'n tir mayth esowgh ow treusi bys di dh'y erita.

Peryll a Wordhyans Idolys

15Kemmerewgh with ytho a'th enevow, drefenn na welsowgh furv vyth y'n jydh may kewsis an Arloedh dhywgh orth Horeb yn-mes a gres an tan, 16ma na wryllowgh omlegri, ow kul dhywgh agas honan imaj gravys, an furv a figur vytholl, hevelep gorreydh na benynreydh, 17hevelep best vyth y'n norvys, na hevelep edhen askellek vyth a nij y'n ebron, 18hevelep kreatur vyth ow kramya war an dor, na hevelep pysk vyth usi y'n dowr yn-dann an dor. 19Ha pan dhrehevydh dha dhewlagas war-tu ha'n ebron ha gweles an howl, ha'n loer, ha'n ster, oll lu an nevow, na vedhewgh kammledys dh'aga gordhya na'ga servya – taklow a wrug an Arloedh dha Dhuw kevrenna dhe oll an poblow yn-dann an ebron dhien. 20An Arloedh a'gas kemmeras ha'gas dros yn-mes a'n fornes-horn, yn-mes a Ejyp, dhe vos dhodho pobel y eretons, kepar hag y'n jydh hedhyw. 21An Arloedh a sorras orthiv drefenn agas geryow, ha ti na dreussiv an Yordan, na dos dhe'n tir da a wra an Arloedh dha Dhuw y ri dhis avel eretons. 22Rag my a verow y'n tir ma, heb treusi an Yordan: mes hwi a vydh ow treusi, ha hwi a erit an tir da ma. 23Kemmerewgh with, ma na ankeffowgh kevambos an Arloedh agas Duw a wrug genowgh, ha gul ragowgh agas honan imaj gravys yn hevelep neppyth a wrug an Arloedh dha Dhuw y dhifenn orthis. 24Rag an Arloedh dha Dhuw yw tan ow tevorya, Duw avius.

25Pan dhineythydh mebyon ha fleghes-wynn ha kothhe y'n tir, hag omlegri, ow kul imaj gravys, an furv a neptra, ha kammwul a-wel dhe'n Arloedh dha Dhuw dh'y brovokya dhe sorr, 26my a elow nev ha nor hedhyw dhe dhoen dustuni er agas pynn, hwi dhe vos dhe goll dhiworth an tir mayth esowgh ow treusi an Yordan di dh'y erita. Ny hirhowgh agas dydhyow warnodho, mes y fydhowgh distruys sur. 27An Arloedh a wra agas skattra ynter an poblow, boghes vydh agas niver gesys yn mysk an kenedhlow may hwra an Arloedh agas ledya di. 28Ena hwi a serv duwow, ober diwla den, prenn ha men, na welons, ha na glewons, ha na dhebrons, ha na vlasons. 29Mes mar hwilydh4:29 hwilydh: Ow siwya an Vulgat. Ebrow hwilowgh. alena an Arloedh dha Dhuw, ty a'n kyv, mar mynnowgh y gavoes gans oll dha golonn hag oll dha enev. 30Pan vydhydh yn ahwer, hag oll an taklow ma yw devedhys warnas y'n dydhyow diwettha, mar tehwelydh dhe'n Arloedh dha Dhuw hag obaya y lev, 31(rag an Arloedh dha Dhuw yw Duw truedhek), ny wra ev kildenna dhiworthis na dha dhistrui, ha ny ankev kevambos dha dasow a dos dhedha.

32Govynn lemmyn a-dro dhe'n dydhyow kyns, kyns dha dermyn jy, dhiworth an jydh may kreatyas Duw den war an norvys; dhiworth tu arall unn penn a'n ebron bys y'n penn arall: eus hwarvedhys neppyth kepar ha'n dra vras ma, po a veu neppyth haval dhodho klewys? 33A glewas pobel bythkweth lev Duw ow kewsel yn-mes a gres an tan, kepar dell re glewsys jy, ha bewa? 34Po a assayas neb duw dhe dhos ha kemmeres dhodho kenedhel dhiworth kenedhel arall dre brovow, der toknys, ha der anethow, ha dre vresel, dre leuv grev ha bregh ystynnys, dre euth bras kepar ha pup-tra a wrug dhywgh an Arloedh agas Duw yn Ejyp a-wel dhis? 35Y feu diskwedhys dhis, rag may aswonnes an Arloedh dhe vos Duw; nyns eus arall saw unnsel ev. 36Yn-mes a nev ev a wrug dhis glewes y lev rag dha dhyski; ha war an norvys ev a dhiskwedhas y dan bras, ha ty a glewas y eryow yn-mes a gres an tan. 37Drefenn ev dhe gara dha dasow, ev a dhewisas aga has war aga lergh, hag ev y honan a'th tros mes a Ejyp ha der y alloes bras, 38dhe gemmeres yn perghennogeth a-ragos kenedhlow brassa ha kreffa agesos, dhe'th tri, ha dhe ri dhis aga thir rag eretons, kepar hag y'n jydh hedhyw. 39Ytho godhvydh hedhyw, ha dro arta y'th kolonn, an Arloedh dhe vos Duw yn nev war-vann hag y'n nor a-woeles: nyns eus nahen. 40Ytho gwith y ordenansow ha'y worhemmynnow esov ow korhemmynna dhis hedhyw, may fo yn ta genes ha gans dha vebyon war dha lergh, mayth ystynni dha dhydhyow war an tir a wra an Arloedh dha Dhuw y ri dhis bys vykken.

Moyses a Dhewis Teyr Sita Veneghi

41Ena Moyses a dhibarthas teyr thre a'n tu arall dhe Yordan, troha'n howldrevel, 42rag may fio ena ladher neb a ladhas y gentrevek dre wall, ha neb na wrug y gasa kyns, may halla fia dhe onan a'n trevow ma ha bewa: 43Beser y'n gwylvos war an ughelgompesenn rag an Rewbenysi, ha Ramoth yn Gilead rag an Manassysi.

Nessa Areth Moyses

44Homm yw an lagha a wrug Moyses hy settya a-rag mebyon Ysrael. 45An re ma yw an dustuniow, ha'n ordenansow, ha'n breusow a gewsis Moyses dhe vebyon Ysrael, pan dheuthons yn-mes a Ejyp, 46a'n tu arall dhe Yordan, y'n nans a-dal Beth-peor, yn pow Sihon myghtern an Amorysi neb esa trigys yn Heshbon, neb a wrug Moyses ha mebyon Ysrael y weskel pan dheuthons yn-mes a Ejyp. 47I a gemmeras yn perghennogeth y diredh ha tiredh Og myghtern Bashan, dew vyghtern an Amorysi esa a'n tu arall dhe Yordan, troha'n howldrevel; 48dhiworth Aroer usi war lann avon, ha bys yn menydh Siryon (yw Hermon), 49hag oll an Araba a'n tu arall dhe Yordan troha'n howldrevel, bys yn mor an Araba, yn-dann ledrow Pisga troha'n howldrevel.