1Hemm yw an gorhemmynn ha'n ordenansow ha'n breusow a worhemmynnis an Arloedh agas Duw dhe dhyski dhywgh, dh'aga gul y'n tir mayth esowgh ow treusi di dh'y erita; 2rag may perthi own a'n Arloedh dha Dhuw, dhe witha oll y ordenansow ha'y worhemmynnow esov ow korhemmynna dhis oll dydhyow dha vewnans, ty, ha'th vab, ha mab dha vab, rag may fo hir dha dhydhyow. 3Klew, Ysrael, ha gwayt aga gul, rag may fo yn ta dhis, ha rag may kressyowgh yn feur, kepar dell gewsis dhis an Arloedh Duw dha dasow, yn tir a dhinwa leth ha mel.

An Gorhemmynn Meur

4Klew, Ysrael: An Arloedh agan Duw, yw unn Arloedh; 5ty a gar an Arloedh dha Dhuw gans oll dha golonn, ha gans oll dha enev, ha gans oll dha nerth. 6Ha'n geryow ma esov ow korhemmynna dhis hedhyw a vydh war dha golonn; 7ha hwi a's daslever dhe'th vebyon ha kewsel anedha pan esedhydh y'th chi, ha pan gerdhydh y'n fordh, ha pan wrowedhydh, ha pan sevydh; 8ha ty a's kelm avel tokyn war dha leuv, hag y fydhons soenelligow yntra dha dhewlagas. 9Ha ty a's skrif war bostow darasow dha ji, ha war dha yetys.

10Pan wra an Arloedh dha Dhuw dha dhri bys y'n tir a dos dhe'th tasow, dhe Abraham, dhe Ysak, ha dhe Yakob, dhe ri dhis trevow bras ha teg, na wrussys hwi aga drehevel, 11ha chiow leun a bup-tra da, na wrussys hwi aga lenwel, ha puthow palyes, na wrussys hwi aga falas, ha gwinlannow hag olewbrennyer, na wrussys hwi aga flansa: ena pan dhybrydh ha bos gwalghys, 12kemmer with na ankeffi an Arloedh neb a'th tros yn-mes a bow Ejyp, dhiworth an chi a gethneth. 13Porth own a'n Arloedh dha Dhuw ha gwra y servya, ha ti re y hanow. 14Na gerdhewgh war-lergh duwow erell, dhiworth duwow an poblow usi a-dro dhywgh; 15(rag Duw avius yw an Arloedh dha Dhuw yn agas mysk), ma na dhewo sorr an Arloedh dha Dhuw er dha bynn ha'th tistrui a-dhiwar enep an tir.

16Na brevewgh an Arloedh agas Duw kepar dell y'n prevsowgh orth Massa.6:16 Massa: Gwel Eksodus 17:1-7. 17Gwithewgh dour gorhemmynnow an Arloedh agas Duw, ha'y dhustuniow, ha'y ordenansow a worhemmynnis dhis. 18Gwra an pyth yw ewn ha da a-wel dhe'n Arloedh, rag may fo yn ta dhis, ha may tyffi hag erita an tir da a dos an Arloedh dhe'th tasow, 19dhe fesya oll dha eskerens a-ragos, kepar dell gewsis an Arloedh.

20Pan wovynn dha vab orthis y'n termyn a dheu, ow leverel, ‘Pandr'yw styr a'n dustuniow ha'n ordenansow ha'n breusow a worhemmynnis an Arloedh agan Duw dhywgh?’ 21ena ty a lever dhe'th vab, ‘Kethyon en ni dhe Faro yn Ejyp, ha'n Arloedh a'gan dros yn-mes a Ejyp dre leuv grev. 22An Arloedh a ros toknys ha marthusyon, bras ha drog, war Ejyp, war Faro, ha war oll y ji a-wel dhyn. 23Ev a'gan dros yn-mes alena, rag ma'gan drolla a-ji, dhe ri dhyn an tir a dos dh'agan tasow. 24An Arloedh a worhemmynnis dhyn gul oll an ordenansow ma, dhe berthi own a'n Arloedh agan Duw, rag may fo yn ta dhyn pub dydh oll, dh'agan gwitha yn few kepar ha hedhyw. 25Y fydh dhyn ewnder mar kwaytyn ni gul oll an gorhemmynn ma a-wel dhe'n Arloedh agan Duw, kepar dell worhemmynnis dhyn.’