1Klew, Ysrael: ty a dreus an Yordan hedhyw dhe vos a-bervedh dhe erita kenedhlow brassa ha kreffa agesos, sitys bras, kerys bys y'n ebron, 2pobel vras ha hir, mebyon an Anakim a aswonnydh, ha ty re'n klewas bos leverys, ‘Piw a yll sevel a-rag mebyon Anak?’ 3Godhvydh ytho hedhyw, yth yw an Arloedh dha Dhuw neb a dreus a-ragos avel tan ow tevorya. Ev a's distru hag ev a's uvelha a-ragos. Ty a gemmer aga eretons ha'ga distrui toeth da kepar dell gewsis dhis an Arloedh.

4Na lavar y'th kolonn, pan wra an Arloedh dha Dhuw aga fesya a-ragos, ‘Yth yw drefenn ow ewnder y hwrug an Arloedh ow dri dhe erita an tir ma.’ Yth yw drefenn sherewynsi an kenedhlow ma y hwra an Arloedh aga fesya a-ragos. 5Nyns yw drefenn dha ewnder, na drefenn ewnhynseth dha golonn, yth esos ow tos dhe erita aga thir; mes yth yw drefenn sherewynsi an kenedhlow ma y hwra an Arloedh dha Dhuw aga fesya a-ragos, rag may fastyo an ger a dos an Arloedh dhe'th tasow, dhe Abraham, dhe Ysak, ha dhe Yakob.

An Leugh Owrek

6Godhvydh ytho nag yw drefenn dha ewnder y hwra an Arloedh dha Dhuw ri dhis an tir da ma dh'y erita, rag ty yw pobel kales dha gilbenn. 7Porth kov, na ankov, fatell serrsys an Arloedh dha Dhuw y'n gwylvos. A-dhia'n jydh may teuth yn-mes a bow Ejyp bys may teuthewgh bys y'n tyller ma, hwi re beu ow rebellya erbynn an Arloedh. 8Orth Horeb hwi a sorras an Arloedh, ha'n Arloedh a veu serrys lowr orthowgh, dh'agas distrui. 9Pan yskynnis dhe'n menydh dhe dhegemmeres an leghennow a ven, leghennow an kevambos a wrug an Arloedh genowgh, my a wortas y'n menydh dewgens dydh ha dewgens nos; ny dhybris bara nag eva dowr. 10An Arloedh a ros dhymm an dhiw leghenn a ven skrifys dre vys Duw, ha warnedha oll an geryow a gewsis an Arloedh genowgh y'n menydh yn-mes a gres an tan yn dydh an kuntellyans. 11Dhe benn dew-ugens dydh ha dew-ugens nos an Arloedh a ros dhymm an dhiw leghenn a ven, leghennow an kevambos. 12Ena an Arloedh a leveris dhymm, ‘Sav, diyskynn uskis a'n tyller ma; rag dha bobel hag a dhresys yn-mes a Ejyp, re omdhefolas; i re dreylyas toeth da dhiworth an fordh a worhemmynnis dhedha; i re wrug ragdha aga honan imaj teudh.’

13An Arloedh a gewsis dhymm keffrys, ow leverel, ‘My re welas an bobel ma, hag otta, pobel kales hy hilbenn yw. 14Gas vy ow honan, ma's distruiv ha defendya dhe-ves aga hanow a-dhann an ebron; ha my a'th wra kenedhel vrassa ha kreffa agesso.’ 15Ytho my a dreylyas ha diyskynna dhiworth an menydh, ha'n menydh ow tewi gans tan, ha diw leghenn an kevambos y'm diwleuv. 16My a viras, hag otta, hwi re wrussa pegha erbynn an Arloedh agas Duw, ha gul ragowgh leugh teudh; y hwrussewgh treylya toeth da dhiworth an fordh a wrug an Arloedh gorhemmynna dhywgh. 17Ena my a gavas dalghenn y'n dhiw leghenn, ha'ga thewlel mes a'm diwleuv, ha'ga therri a-wel dhywgh. 18Ena my a goedhas dhe'n dor a-rag an Arloedh avel kyns, dewgens dydh ha dewgens nos; ny dhybris bara nag eva dowr, rag oll agas pegh a beghsowgh, ow kul drog a-wel an Arloedh, dh'y brovokya dhe sorr. 19Rag my a borthas own a'n sorr ha'n gonnar may fernewis an Arloedh gansa er agas pynn, dh'agas distrui. Mes an Arloedh a woslowas orthiv y'n eur na ynwedh. 20Ha'n Arloedh a sorras gans Aron lowr dh'y dhistrui, mes my a bysis rag Aron ynwedh y'n termyn na. 21Ena my a gemmeras agas peghes a wrussowgh, an leugh, ha'y leski y'n tan, orth y vrewi, orth y velyas yn teg bys may feu melys dhe dhoust; ha my a dewlis y dhoust y'n gover esa ow tiyskynna dhiworth an menydh.

22Orth Tabera ynwedh hag orth Massa hag orth Kibroth-hattaava9:22 Tabera: Yw dhe styrya loskvann, Niverow 11:3. Massa: prov, Eksodus 17:7. Kibroth-hattaava: bedhow an ewl, Niverow 11:34. hwi a brovokyas an Arloedh dhe sorr. 23Ha pan y'gas dannvonas an Arloedh dhiworth Kadesh-barnea, ow leverel, ‘Yskynnewgh hag eritewgh an tir a res dhywgh’, hwi a rebellyas erbynn gorhemmynn an Arloedh agas Duw, ha ny gryssowgh dhodho na goslowes orth y lev. 24Hwi re beu ow rebellya erbynn an Arloedh a-dhia'n kynsa dydh ma'gas aswonnis.

25Ytho my a goedhas dhe'n dor a-rag an Arloedh dewgens dydh ha dewgens nos, ow krowedha ena a-hys, rag an Arloedh a lavarsa ev dhe vynnes agas distrui. 26Ena my a bysis war an Arloedh ha leverel, ‘Arloedh Duw, na gowldhistru dha bobel ha'th eretons a dhasprensys y'th veuredh, neb a dhresys yn-mes a Ejyp dre leuv grev. 27Porth kov a'th servysi Abraham, Ysak, ha Yakob; na vir orth gorthter an bobel ma, nag orth hy hammweyth, nag orth hy fegh, 28ma na lavarro tus an tir ma'gan dresys dhe-ves dhiworto, “Drefenn na allas an Arloedh aga dri dhe'n tir a ambosas dhedha, ha drefenn ev dh'aga hasa, ev re's dros yn-mes dh'aga ladha y'n gwylvos.” 29Mes i yw dha bobel ha'th eretons a dhresys yn-mes gans dha nerth bras ha'th vregh ystynnys.’