1Kelyon marow a wra dhe unyent an perfumyer flerya;

boghes follneth yw poesa es meur a furneth.

2Yma kolonn an den fur ryb y leuv dhyghow,

hag yma kolonn an foll ryb y leuv gledh

3Ha pan gerdh foll war an fordh, nyns eus skians dhodho,

hag ev a dhiskwa dhe bubonan y vos foll.

4Mara sev sorr an rewler er dha bynn, na as dha dyller,

rag kalmynsi a dhiswra peghosow bras.

5Ottomma happ drog re welis yn-dann an howl, kammgemmeryans a'n par yw gwrys gans rewler. 6An foll re beu settys yn lies tyller ughel, mes tus rych a esedh yn tyller isel. 7My re welas gwesyon ow marghogeth, ha pennternedh ow kerdhes war an dor kepar ha gwesyon.

8An den a bal pytt a yll koedha ynno,

ha'n den a derr ke a yll bos brethys gans sarf.

9An den usi ow kleudhya meyn a yll bos pystigys gansa,

ha'n den a fols prennyer a yll bos peryllys gansa.

10Mars yw toul a horn sogh ha ny wra an oberer lymma y amal,

res yw dhodho gul devnydh a voy nerth;

mes furneth a dhre sewena

11Mar prath an sarf kyns bos husys,

nyns eus gwayn yn huder.

12Geryow ganow den fur yw grassyes,

mes diwweus foll a wra y distrui.

13Dalleth geryow y anow yw follneth,

ha diwedh y gows yw muskokter glan.

14An foll yw leun a eryow;

Ny woer denvyth an pyth a hwer,

ha'n pyth a hwyrvydh a'y wosa, piw a yll y leverel dhodho?

15Lavur an fellyon a wra aga skwithhe,

drefenn na wodhons hwath an fordh dhe'n sita.

16Go-jy, A dir, pan vo dha vyghtern flogh,

ha'th pennternedh a dheber myttinweyth.

17Gwynn dha vys, A dir, pan vo dha vyghtern mab tus vryntin

ha'th pennternedh pan dhepprons y'n termyn gwiw,

rag nerth a-der rag medhwynsi.

18Dre sygerneth y sedh an kebrow,

ha dre dhiekter an dhiwleuv y teu an glaw y'n chi.

19Rag hwarth y hwrer fest,

ha gwin a wra dhe vewnans bos lowen,

mes arghans yw an gorthyp dhe bup-tra.

20Na volloth myghtern na hwath y'th prederow,

ha na volloth den rych y'th chambour,

rag edhen a'n nevow a yll degi dha lev a-dro,

ha nebonan gans eskelli a yll derivas dha eryow.