Bara war an Dowrow

1Dannvon dha vara war enep an dowrow,

ha ty a wra y dhaskavoes wosa lies dydh.

2Ro rann a'th pythow dhe seyth po dhe eth,

rag ny wodhesta py par happ drog y fydh y'n nor.

3Mars yw an kommol leun,

i a wra diveri aga glaw war an dor,

ha mar koedh gwydhenn po dhe'n dhyghowbarth po dhe'n gledhbarth,

hi a wra growedha y'n keth le may koedh hi.

4Seul a vir orth an gwyns, ny wra ev hasa,

ha seul a wel an kommol ny wra ev mysi.

5Kepar dell na wodhes fordh an gwyns, na hwath fatell yw formys eskern yn torr benyn usi gans flogh, yndella ny wodhesta ober Duw neb a wra pup-tra.

6Gwra hasa dha has y'n myttin, ha na as dha leuv dhe bowes bys y'n gorthugher, rag ny wodhesta pyneyl a wra seweni, po hemma po henna, po martesen aga dew war-barth a vydh da.

Yowynkneth ha Kothni

7Hweg yw an golow, ha da yw gans an dhewlagas gweles an howl.

8Ytho mar pew den lies blydhen, gwres ev lowenhe ynna oll, mes perthes ev kov a'n dydhyow a dewlder, rag lower vydhons i. Euveredh yw pup-tra a dheu.

9Bydh lowen, A wour yowynk, y'th flogholeth, ha gas dha golonn dhe'th wul lowen yn dydhyow dha yowynkneth, ha gwra kerdhes yn fordhow dha golonn, hag yn golok dha dhewlagas, ha godhvydh, y hwra Duw dha dhri yn breus drefenn oll an taklow ma.

10Gwra dannvon sorr yn-mes a'th kolonn, ha dannvon drog yn-mes a'th kig, rag euveredh yw flogholeth ha yowynkneth.