Yma Prys Gwiw rag Pup-tra

1Dhe bup-tra yma termyn ordenys ragdho ha prys gwiw dhe bub ober yn-dann an nevow.

2Prys dineythi ha prys merwel;

prys plansa ha prys diwreydhya an pyth yw plynsys.

3Prys ladha ha prys sawya;

prys terri dhe'n leur ha prys drehevel.

4Prys dagrewi ha prys hwerthin;

prys kyni ha prys donsya.

5Prys skoellya meyn a-les, ha prys aga bernya;

prys byrla ha prys skonya a vyrla.

6Prys hwilas, ha prys kelli;

prys gwitha ha prys tewlel dhe-ves.

7Prys frega ha prys gwrias;

prys tewel ha prys kewsel.

8Prys kara ha prys kasa;

prys bresel ha prys kres.

9Pana wayn a gyv an oberer der oll y lavur? 10My re welas an ober re ros Duw dhe vebyon den, gans meur a daklow dhe wul. 11Duw re wrug pup-tra dhe vos teg yn y brys gwiw, mes ynwedh ev re worras konvedhes yn kolonn mebyon den a dermyn ow tremena trank heb worfenn, ma na allons i diskudha an ober a wrug Duw a-dhiworth an dalleth bys yn diwedh aga bewnans. 12My re wodhva nag eus travyth da rag mebyon den marnas bos heudhik ha gul da hedre vons bew, 13pub den dhe dhybri hag eva, ha bos lowen yn oll y lavur; hemm yw ro Duw. 14My re wodhva pup-tra a wra Duw dhe dhurya bynitha. Ny yll bos travyth keworrys dhodho, na ny yll bos travyth kemmerys dhe-ves dhiworto. Yndella re wrug Duw, rag may hwrello tus perthi own anodho. 15An pyth re hwarva, an keth henna re beu gwrys kyns; ha'n pyth a hwyrvydh, an keth henna re beu gwrys kyns, rag Duw a hwila an pyth re beu kelys.

Gwirvreus hag Anewnder

16My a welas neppyth ken yn-dann an howl. Yn le gwirvreus yth esa sherewneth, hag yn le ewnder yth esa kammhynseth. 17My a leveris y'm kolonn, ‘Duw a vreus ha'n re wiryon ha'n debeles; rag yma termyn gwiw rag pub ober, ha prys breus rag pub gwrians.’ 18My a leveris y'm kolonn, ‘Hemm yw a-barth mebyon den, may hallo Duw aga frevi, ha diskwedhes dhedha aga bos aga honan haval dhe'n bestes.’ 19Drefenn an keth tra yw tenkys mebyon den ha tenkys bestes. Kepar ha dell verow an eyl, yndella y ferow y gila; an dhew a'n jeves an keth anall. Nyns eus gwayn dhe vebyon den war an bestes, rag bos pup-tra euveredh. 20An dhew a dhe'n keth tyller: an dhew a dheu dhiworth an doust, ha dhe'n doust an dhew a dhehwel. 21Piw a woer spyrys mebyon den dhe yskynna yn-bann, ha spyrys an bestes dhe dhiyskynna yn-nans y'n dor? 22Ytho my a welas nag eus travyth gwell rag den ages lowenhe yn y lavur, rag bos henna y rann; rag piw a yll diskwedhes dhodho an pyth a hwyrvydh wosa y dermyn ev?