Euveredh Lavur

1Ytho my a dreylyas arta dhe weles oll an arwask yw gwrys yn-dann an howl. Hag otta, dagrow an dus arweskys: ny's teves konforter; denvyth ny's delirv dhiworth nerth aga arwaskoryon; ny's teves konforter. 2Ytho my a wormolas an re varow neb yw gyllys seulabrys dhe ankow moy ages an re neb yw hwath yn few. 3Mes gwell ages an dhew ma yw neb na veu genys hwath, drefenn na wrug ev gweles an drogober yw gwrys yn-dann an howl.

4Ha my a welas oll an trobel hag oll an sleyghneth yn lavur ow tos dhiworth avi den erbynn y gentrevek. Hemma ynwedh yw euveredh ha chasya war-lergh an gwyns.

5An foll a bleg y dhiwleuv

hag a dheber y gig y honan.

6Gwell yw unn dornas gans kosoleth

ages dew dhornas leun a lavur

ha chasya war-lergh an gwyns.

7Ha my a dreylyas ha gweles ken tra euver yn-dann an howl: 8yma nebonan heb koweth, ny'n jeves naneyl mab na broder, ha nyns eus diwedh dhe oll y lavur, ha nyns yw y lagas gwalghys gans rychys. Ev a gyn, ‘Rag piw yth esov vy owth oberi, ha plesour ow fyllel dhe'm enev?’ Hemma ynwedh yw euveredh ha lavur beghus.

9Dew dhen yw gwell es onan, drefenn i dhe alloes kavoes pewas da dhiworth aga ober. 10Rag mar koedhons i, an eyl a wra drehevel y gila, mes go-ev a goedh ha ny'n jevydh denvyth a yll y weres ow tassevel. 11Ynwedh, mar krowedh dew dhen war-barth, y's teves toemmder, mes fatell yll unn den kavoes toemmder? 12Ha kyn hyll den fetha unn den yw a'y honan, dew dhen a yll sevel orto. Kordenn driflek ny yll bos terrys yn skon.

13Gwell yw den yowynk ha boghosek ha fur ages myghtern koth ha foll, neb na vynn koela orth gwarnyans na fella. 14Rag mes a brison y teuth ev rag dos ha bos myghtern, kyn fe ev genys boghosek yn y ruvaneth y honan.4:14 kyn fe ev genys boghosek yn y ruvaneth y honan: Po saw ev neb a veu genys avel myghtern a dheuth ha bos boghosek. 15My re welas oll an re vew neb a gerdh yn-dann an howl, war-barth ha'n nessa flogh4:15 war-barth ha'n nessa flogh: Henn yw, an her dhe'n tron. a sev yn y le. 16Dhe'n bobel oll nyns esa diwedh, na dhe'n dus oll esa yn-dann y rewl; mes ny lowenha ynno an re a dheu a-wosa. Ytho hemma ynwedh yw euveredh ha yeuni war-lergh an gwyns.