Ny yll Sewena Lenwel Enev Mab-den

1Yma happ drog arall re welis yn-dann an howl, ha meur yw y boester war vab-den. 2Duw a re dhe wour rychys ha pythow hag enor ha ny fyll dh'y enev travyth yw hwansek dhodho, mes ny re Duw dhodho an galloes dhe dhybri a'n frut a'y lavur, mes estren a'n deber. Hemm yw euveredh ha kleves ankensi. 3Kyn tineyttho gour kans flogh ha bewa lies blydhen, kyn fewo hirneth mes ny yll ev bos lenwys gans y sewena, kyn na vo bedh dhodho, my a lavarsa, flogh genys marow yw feusikka agesso. 4Rag ev a dheu der euveredh, ha'y hanow yw kudhys yn tewlder; 5kyn na welas nevra golow an howl, na ny wodhva travyth, hwath ev a'n jeves moy powes ages an den na. 6Kyn hwrella ev bewa diwweyth mil vlydhen, nyns yw ev lowen yn y sewena. A nyns a pubonan dhe'n keth tyller?

7Oll an lavur a dhen yw rag lenwel y anow, mes nyns yw y enev lenwys nevra. 8Ytho pandr'a gyv an den fur moy es an den foll? Ha pandr'a gyv an boghosek dre wodhvos bewa? 9Gwell yw bos lowen gans an taklow a yll gweles an dhewlagas, ages an golonn dhe hwansa moy. An hireth ma yw euveredh ha chasya war-lergh an gwyns.

10Dhe'n dra a veu kyns, hanow a veu res seulabrys. Y hwodhor pandr'yw mab-den. Ny yll strivya gans den yw kreffa agesso. 11Yma lies tra hag a balsha euveredh. Pandr'yw an gwayn dhe dhen? 12Rag piw a woer pandr'yw 'vas rag den hedre vo bew, dres an nebes dydhyow a'y vewnans euver, rag i a dremen kepar ha skeus. Rag piw a yll disklerya dhe dhen an taklow a hwyrvydh a'y wosa yn-dann an howl?