Breus a-dro dhe Dhydhyow Anken

1Hanow da yw gwell es unyent da,

ha dydh mernans yw gwell es dydh genesigeth.

2Gwell yw mos dhe ji kynvann

ages mos dhe ji kevewi;

rag bos mernans an denkys a beub oll

ha res yw dhe'n den bew kemmeres henna yn y golonn.

3Gwell yw galar ages hwarth,

drefenn dre dristyns an fas y teu ha bos gwell an golonn.

4Yma kolonn an dus fur yn chi kynvann,

mes yma kolonn an fellyon yn chi plesour.

5Gwell yw degemmeres keredhi a dhen fur

ages gour dhe woslowes orth kan fellyon.

6Rag kepar ha dell yw krakkyans spern yn-dann galter,

yndellma yw hwarth an foll.

Hemma ynwedh yw euveredh.

7Yn sur arwask a dreyl an den fur dhe dhen foll,

ha ro a dhiswra an golonn.

8Gwell yw diwedhva tra ages y dhalleth;

yndellma gwell yw perthyans ages goeth.

9Na fisten y'th spyrys dhe serri,

rag sorr a bowes yn askra fellyon.

10Na lavar, ‘Prag yth o an dydhyow kyns gwell es an dydhyow hedhyw?’

Nyns yw fur govynn henna.

11Furneth gans ertach yw da,

hag yma gwayn dhe'n re a wel an howl.

12Rag furneth yw skovva, kepar ha dell yw mona skovva;

mes gwayn godhvos a furneth yw hemma: ev a dhasvew an re a'n pew.

13Gwel ober Duw.

Piw a yll ewnhe an pyth a gammas?

14Yn dydh sewena bydh lowen! Hag yn dydh a dhrog, gwra prederi a-dro dhe hemma. Duw re wrug an eyl ha'y gila, ma na allo denvyth diskudha travyth a hwyrvydh y'n termyn a dheu.

Breus a-dro dhe Ewnder hag Anewnder

15My re welas oll hemma y'm dydhyow euver: treweythyow den mas a verow spit dh'y ewnder, ha treweythyow tebelwas a vew pell spit dh'y dhrogoberow. 16Na vydh re wiryon, na hwath re fur, rag na vi jy yn ahwer. 17Na vydh re dhrog, ha na vydh foll: prag y fynnydh merwel re a-varr? 18Da yw ty dhe settya dalghenn y'n eyl gwarnyans, ha na wra gasa dha dhalghenn yn y gila; rag neb a berth own a Dhuw a dhienk dhiworth oll an taklow ma.

19Furneth a re nerth dhe dhen fur, moy es deg rewler usi yn sita.

20Rag nyns eus den gwiryon y'n norvys a wra dader ha ny begh mann.

21Ynwedh na ro dha golonn dhe bup-tra a lever tus, ma na glewvi dha was orth dha villiga. 22Rag ty a woer y'th kolonn, ty dha honan dhe villiga tus erell lieskweyth.

23My a brovas oll hemma dre furneth: my a leveris, ‘Sur, my a vynn bos fur’, mes yth esa pell dhiworthiv. 24An pyth a vo pell, ha down, pur dhown – piw a yll y gonvedhes? 25My a ombrederis y'm kolonn, may hwrellen hwilas ha hwithra ha konvedhes furneth ha resna, ha konvedhes droktra a follneth ha gokkineth a vuskokter. 26Ha my a gyv bos moy hwerow ages mernans an venyn neb yw hy holonn maglennow ha roesow, ha neb yw hy diwla bondys. Neb yw da a-rag Duw a dhienk dhiworti, mes maglennys yw an peghador gensi. 27‘Mir’, yn-medh an Pregowther, ‘hemma re gevis vy, onan hag onan, ha my ow hwilas an praga. 28Re beu ow enev orth y hwilas, ha ny'n kevis vy. Unn den yn mysk mil re gevis, mes benyn y'n oll an re ma ny gevis mann. 29Mir, hemma unnsel re gevis, Duw a wrug mab-den ewnhynsek, mes i, i re hwilas lies droktowl.’