Breus a-dro dhe Dus Fur ha Myghternedh

1Piw yw kepar ha'n den fur?

ha piw a woer an styryans a dra?

Furneth den a wra dh'y fas golowi,

ha semlans anhwek y fas yw treylys.

2Bydh gostydh dhe worhemmynn myghtern, drefenn an ti a wrussys dhe Dhuw. 3Na fisten dhiworth y wolok; na sav yn tra yw drog, rag ev a wra pypynag a vo plegadow dhodho. 4Le mayth usi ger myghtern, y'n keth le yma galloes, ha piw a lever dhodho, ‘Pandr'a wredh?’ 5Piwpynag a wittho gorhemmynn, an keth henna ny wra perthi drog vyth, ha kolonn den fur a woer ha'n prys gwiw ha'n fara gwiw. 6Rag dhe bup-tra yma termyn gwiw ha fara gwiw. Mes begh meur war dhen yw, 7na woer ev a-dro dhe'n termyn a dheu, namoy ny yll denvyth leverel dhe dhen arall an pyth a hwyrvydh. 8Par dell nag eus dhe dhenvyth galloes war an gwyns dh'y dempra, yndella nyns eus dhe dhenvyth galloes war dhydh y vernans. Par dell ny yll souder bos relessys yn termyn an gas, yndella ny yll drog sawya an dhrogoberoryon. 9Oll hemma my re welas ha my ow settya ow brys dhe bup-tra yw gwrys yn-dann an howl. Treweythyow neb unn den a wra maystri war dhen arall dh'y dhrog y honan.

Kudynnow a-dro dhe Gessydhyans

10Hag ena my a welas debeles ynkleudhys neb a wre dos y'n tyller sans ha mos yn-mes anodho, ha gormelys vons8:10 gormelys vons: Ow siwya an Septuagint. Ebrow ankevys vons. y'n sita may hwrussons yndella. Hemma ynwedh yw euveredh. 11Pan nag eus breus gwrys a-dhesempis rag neb drogober, kennerthys yw kolonn mebyon den dhe wul drog. 12Kyn hwrella peghador gul drogober kanskweyth, ha bewa hwath pell, yn spit dhe hemma my a woer y vos da gans an dus neb yw gostydh dhe Dhuw, rag i dhe sevel ow perthi own a-dheragdho. 13Mes ny vydh da gans an drogoberer, na ny wra ev hirhe y dhydhyow avel skeus, drefenn na sev ow perthi own a-dherag Duw.

14Ottomma euveredh arall yw gwrys y'n norvys: treweythyow yma tus wiryon a gyv an pyth a dhendil an debeles, ha treweythyow yma tebeles a gyv an pyth a dhendil an re wiryon. Yn-medhav, ‘Hemma ynwedh yw euveredh.’ 15Ha my a gommendyas plesour, rag nyns eus travyth gwell rag den ages dybri hag eva, ha lowenhe. Ytho plesour a wra mos ganso yn y lavur dres dydhyow a'y vewnans re ros Duw dhodho yn-dann an howl.

16Pan res vy ow holonn dhe wodhvos furneth ha gweles an ober re beu gwrys y'n norvys – kyn lett hemma den rag koska naneyl yn nos nag yn dydh – 17ena my a welas pup-tra a veu gwrys gans Duw, mes ny yll mab-den konvedhes an pyth yw gwrys yn-dann an howl, rag kyn hwra mab-den lavurya dhe hwilas, ny gyv ev travyth; ha kyn hwrella den fur leverel ev dh'y gonvedhes, ny yll ev y gonvedhes yn tien.