Dhiworth Mernans dhe Vewnans

1Ha hwi a veu marow yn agas drogoberow ha'gas peghosow 2may kerdhsowgh ynna war-lergh gis an bys ma, war-lergh penntern galloes an ayr, an spyrys a ober lemmyn yn mebyon diwostytter; 3hag yn aga mysk, ni oll ynwedh a wre omdhegi kyns yn yeunadow agan kig, ow kul hwansow an kig ha'n prederow, hag yth en ni dre natur fleghes sorr kepar ha'n re erell ynwedh. 4Mes Duw, rych yn tregeredh, drefenn y gerensa meur ma'gan karas, 5hwath pan en ni marow yn drogoberow, a wrug dhyn bewa war-barth gans Krist (hwi re beu selwys dre ras), 6hag a wrug dhyn dasserghi hag esedha ganso y'n tylleryow nevek yn Krist Yesu, 7may tiskwettha y'n oesow ow tos, rychys dres eghenn y ras yn kuvder troha ni yn Krist Yesu. 8Rag gans gras hwi re beu selwys dre fydh; ha nyns yw hemma ahanowgh hwi, ro Duw yw ev. 9Nyns yw a wriansow, ma na vostyo denvyth. 10Rag y wrians ev on ni, kreatys yn Krist Yesu dhe oberow da a ragbareusis Duw, may hyllyn ni kerdhes ynna.

Onan yn Krist

11Rakhenna, perthewgh kov agas bos Jentilys kyns y'n kig, gelwys ‘an Antrodreghyans’ gans an re yw gelwys ‘an Trodreghyans’, gwrys y'n kig gans dorn, 12agas bos y'n eur na heb Krist, estrenhes dhiworth kemmynieth Ysrael, hag estrenyon dhe gevambosow an dedhewadyow, heb govenek, ha heb Duw y'n bys. 13Mes lemmyn yn Krist Yesu hwi, neb a vedhewgh pell yn termyn eus passyes, eth ha bos ogas, dre woes Krist. 14Rag ev yw agan kres, neb a wrug an dhew onan, wosa terri paros an rannans, an kas yntredhon, der y gig, 15ow tiswul an lagha a arghadow ha rewlys, may hwrella a'n dhew unn den nowydh ynno ev, ow kul kres, 16ha may hwrella dhe'n dhew bos unnverhes yn unn korf dhe Dhuw der an grows, dredhi2:16 dredhi: Po ynno ev. ow ladha an eskarogeth. 17Hag ev a dheuth dhe bregoth kres dhywgh hwi neb o pell, ha kres dhe neb o ogas, 18rag bos fordh genen agan dew, dredho ev, der unn Spyrys, dhe'n Tas. 19Ytho nyns owgh hwi namoy estrenyon hag alyons, mes kesburjysi gans an syns, hag eseli teylu Duw, 20drehevys war sel an abesteli ha'n brofoesi, Krist Yesu y honan ow pos an pennmen. 21Ynno ev oll an drehevyans junys war-barth, a dyv dhe vos tempel sans y'n Arloedh; 22ynno ev hwi ynwedh yw drehevys war-barth dhe vos trigva Duw y'n Spyrys.