Menystrans Powl dhe'n Jentilys

1Rag hemma, my, Powl, prisner Krist Yesu ragowgh hwi, an Jentilys – 2mar klewsowgh a'n charj dhe venystra ras Duw a veu res dhymmo ragowgh, 3fatell veu notys dhymm an mysteri dre dhiskwedhyans, kepar dell skrifis dhywgh kyns war verr lavarow. 4Ow redya hemma, hwi a woer konvedhes ow skians yn mysteri Krist, 5na veu notys dhe vebyon den yn henedhow erell, kepar dell yw diskwedhys lemmyn dh'y abesteli sans, ha'y brofoesi y'n Spyrys, 6an Jentilys dhe vos kes-heryon ha keskorf, ha kevrennoryon a'n ambos yn Krist Yesu der an aweyl.

7Ha my eth ha bos gwas war-lergh ro an ras a Dhuw, res dhymm war-lergh oberyans y alloes. 8Dhymmo vy, yw le ages an lyha a'n syns oll, y feu res an ras ma dhe bregoth dhe'n Jentilys an rychys a Grist yw dres hwithra, 9ha golowi dhe bub den3:9 War-lergh re a'n dornskrifow nyns usi omma an geryow dhe bub den. towl an mysteri kudhys dres an oesow yn Duw neb a wrug pup-tra, 10may fe deklarys lemmyn dhe'n prynsipatys ha'n potestatys y'n tylleryow nevek, der an eglos, furneth Duw, meur hy diverseth, 11war-lergh towl an oesow a wrug ev yn Krist Yesu agan Arloedh, 12yn neb y'gan beus kolonnekter ha fordh dhodho yn trest dre fydh ynno. 13Rag hemma, my a'gas pys na gemmerrowgh digolonn y'm galarow ragowgh hwi; agas glori yns i.

Godhvos Kerensa Krist

14Ytho, my a bleg an dhewlin a-dherag an Tas,3:14 a-dherag an Tas: War-lergh re a'n dornskrifow a-dherag Tas agan Arloedh Yesu Krist. 15mayth yw henwys warnodho pub teylu yn nev ha nor, 16may rollo dhywgh hwi, war-lergh rychys y splannder, dhe vos krevhes gans galloes der y Spyrys y'n den pervedhel, 17may trikko Krist, dre fydh, yn agas kolonn, gwreydhys ha selys yn kerensa, 18ma'gas bo nerth dhe gonvedhes gans oll an syns, pyth yw an les ha'n hys ha'n ughelder ha'n downder, 19ha dhe aswonn kerensa Krist a dremen dres aswonnvos, may fewgh lenwys a oll leunder Duw.

20Lemmyn, dhe neb a yll gul dres pup-tra yn pals dres eghenn moy es dell bysyn na brederyn, war-lergh an galloes a ober ynnon ni, 21dhodho ev re bo gordhyans y'n eglos hag yn Krist Yesu dres oll henedhow, trank heb worfenn. Amen.