Unnsys an Korf

1My ytho, prisner y'n Arloedh, a'gas pys a gerdhes gwiw dhe'n galow may fewgh hwi gelwys, 2gans pub uvelder ha klorder gans perthyans, ow kodhav an eyl y gila yn kerensa, 3hwansek dhe witha unnsys an Spyrys y'n golmenn a gres. 4Yma unn korf hag unn Spyrys, kepar dell vewgh gelwys yn unn govenek a'gas galow; 5unn Arloedh, unn fydh, unn besydhyans, 6unn Duw ha Tas a bub den oll, neb usi a-ugh pub den oll, ha dre bub den oll hag yn pub den oll.4:6 yn pub den oll: War-lergh re a'n dornskrifow yn peub ahanan.

7Dhe bubonan ahanan, gras a veu res war-lergh musur ro Krist. 8Ytho leverys veu,

‘Wosa yskynna yn ughelder, ev a hembronkas prisnoryon,

hag a ros rohow dhe dus.’

9An lavar ‘yskynna’ – pyth yw hemma, mar nyns yw, ev dhe dhiyskynna4:9 dhiyskynna: War-lergh re a'n dornskrifow dhiyskynna kyns. ynwedh dhe'n isella rannow a'n norvys? 10Neb a dhiyskynnas yw ynwedh neb a yskynnas pell a-ugh oll an nevow may lanwa pup-tra. 11Hag ev a ros re dhe vos abesteli, re profoesi, re aweylers, re bugeledh ha dyskadoryon, 12rag darbari an syns dhe hwel menystrans, dhe dhrehevyans korf Krist, 13erna dhyffyn ni oll dhe unnsys an fydh hag aswonnvos Mab Duw, yn gour perfydh, dhe'n musur a'n adhvetter a'n leunder a Grist, 14ma na ven namoy fleghes, tewlys gans mordonnow ha degys a-dro gans pub gwyns a dhyskas, dre sotelneth tus, yn sleyghneth bys y'n felder a doell.4:14 Gwersow 11 bys 14: gwel TH42r. 15Mes ow kewsel an gwir yn kerensa, res yw dhyn tevi ynno ev yn pup-tra, neb yw an penn, Krist, 16dhiworth neb, an korf dien, junys ha synsys war-barth dre bub giowenn ow skoedhya war-lergh oberyans 'vas pub rann, a wra dhe'n korf tevi, rag y dhrehevyans yn kerensa.

An Bewnans Koth ha Nowydh

17Hemma a lavarav ha dustunia y'n Arloedh, na wrellowgh kerdhes namoy kepar dell gerdh an Jentilys yn euveredh aga brys; 18tewlhes yn aga brys, alyons dhiworth bewnans Duw dre fowt skians eus ynna i rag kaletter aga holonnow 19heb omglewans vyth, i a omros dhe avlander, ow kul mostedhes a bub eghenn gans krefni. 20Mes hwi ny dhys'sowgh Krist yndellma! 21– mara'n klewsowgh4:21 mara'n klewsowgh: Po mar klewsowgh anodho. yn tevri, ha bos dyskys ynno, par dell usi an gwiryonedh yn Yesu, 22may hworrewgh mes ahanowgh an den koth, agas bewedh kyns, yw shyndys dre fals hwansow, 23ha dhe vos nowydhhes yn spyrys agas brys, 24ha dhe wiska an den nowydh yw gwrys war-lergh Duw yn ewnder ha sansoleth a dheu dhiworth an gwir.

Rewlys rag an Bewnans Nowydh

25Rakhenna, gorrewgh dhe-ves gowegneth, ha ‘kewsel pubonan an gwir gans agas hynsa’, rag agan bos eseli an eyl a'y gila. 26‘Bedhewgh serrys ha na wrewgh pegha.’ Na wres an howl sedhi war agas sorr, 27ha na rewgh tyller dhe'n jowl. 28Neb a lader, na ladres namoy, mes gwres ev lavurya, owth oberi an dra dha gans y dhiwla y honan, may kaffo neppyth dhe ranna gans neb a'n jeffo edhomm. 29Na dhes drog-ger vyth yn-mes a'gas ganow, saw pypynag a vo da rag an drehevyans yw res, may rollo gras dhe neb a'n klewvo. 30Ha na wrewgh grevya Spyrys Sans Duw, yn neb hwi a veu selys rag dydh daspren. 31Bedhes pub hwerowder ha sorr ha konnar ha garma serrys ha sklander gorrys mes ahanowgh, gans pub drog. 32Ha bedhewgh kuv an eyl dh'y gila, truedhek, parys dhe ava an eyl dh'y gila kepar dell avas Duw yn Krist dhywgh hwi4:32 dhywgh hwi: War-lergh re a'n dornskrifow dhyn ni. ynwedh.