1Ytho, gwrewgh Duw agas patron, kepar ha fleghes karadow, 2ha kerdhewgh yn kerensa, kepar dell wrug Krist agas kara hag omri y honan ragon ni yn offrynn ha sakrifis dhe Dhuw, sawer plegadow.

Kerdhewgh avel Fleghes Golow

3Mes fornikasyon ha pub plosedhes po krefni, na vedhens henwys yn agas mysk, kepar dell dhelledh dhe syns. 4Na vedhes fara plos na kows gokki na ges, nag yw gwiw, mes grasyans yn aga le. 5Godhvydhewgh hemma: denvyth ow kul fornikasyon, na den plos, na den kraf, henn yw gordhyer idolys, ny'n jeves eretons yn gwlaskor Krist ha Duw.

6Na wres denvyth agas toella dre lavarow gwag; rag drefenn an taklow ma y teu sorr Duw war vebyon diwostytter. 7Ytho, na vedhewgh kevrennogyon gansa; 8rag kyns yth ewgh hwi tewlder, mes lemmyn golow y'n Arloedh. Kepar ha fleghes golow gwrewgh hwi kerdhes 9(rag yma frut an golow5:9 an golowWar-lergh re a'n dornskrifow an Spyrys. yn oll dader hag ewnder ha gwirder), 10ow previ an pyth yw plegadow gans an Arloedh. 11Ha na gemmerewgh rann gans gwriansow difrut an tewlder; gwell yw aga heredhi. 12Rag meth yw poran kewsel a'n taklow yw gwrys gansa yn-dann gel. 13Mes pup-tra diskudhys der an golow yw apert, 14rag pup-tra a veu diskwedhys yw golow. Rakhenna, leverys yw,

‘Sav, ty neb a gosk,

ha sav yn-bann mes a'n re varow,

ha Krist a re dhis golow.’

15Gwaytyewgh dour ytho fatell gerdhowgh5:15 Gwaytyewgh dour ytho fatell gerdhowgh: War-lergh re a'n dornskrifow Gwaytyewgh ytho fatell gerdhowgh dour., avel tus fur, a-der anfur, 16ow kul devnydh a'n termyn, rag bos an dydhyow drog. 17Rakhenna, na vedhewgh gokki, mes konvedhewgh pyth yw bolonjedh an Arloedh. 18Ha na vedhewgh medhow dre win, mayth eus fowt rewl, mes bedhewgh lenwys a'n Spyrys, 19ow kewsel an eyl orth y gila yn salmow ha hymnys ha kanow spyrysel, ow kana hag ow kul melodi yn agas kolonn dhe'n Arloedh; 20prest ow krassa pup-tra yn hanow agan Arloedh Yesu Krist dhe Dhuw an Tas.

Gwragedh ha Gwer

21Bedhewgh gostydh an eyl dh'y gila yn own Krist.

22Gwragedh, bedhewgh gostydh dh'agas gwer agas honan kepar ha pan ve dhe'n Arloedh. 23Rag an gour yw penn an venyn kepar dell yw Krist penn an eglos, ev y honan Selwador an korf. 24Mes kepar dell yw an eglos gostydh dhe Grist, yndella ynwedh an gwragedh yw gostydh dh'aga gwer yn pup-tra.

25Gwer, kerewgh agas gwragedh kepar dell garas Krist an eglos hag omri y honan rygdhi, 26ma's gwrella sans, orth hy glanhe dre wolghas an dowr der an ger, 27may proffya an eglos dhodho ev y honan, splann, heb brith na krygh, na travyth a'n par na, saw may fe hi sans ha dinamm. 28Y'n keth vaner, y koedh dhe wer kara aga gwragedh, kepar ha'ga horf aga honan. Neb a gar y wreg a gar y honan. 29Rag ny wrug denvyth bythkweth kasa y gig y honan, mes ev a'n mag ha'y jershya kepar dell wra Krist ynwedh maga ha chershya an eglos; 30rag yth on ni eseli a'y gorf5:30 a'y gorf: War-lergh re a'n dornskrifow a'y gorf, a'y gig hag a'y eskern.. 31‘Rag hemma, den a wra gasa y das ha'y vamm hag a vydh junys dh'y wreg, ha'ga dew a vydh unn kig.’ 32Meur yw an mysteri ma, mes my a gews a Grist ha'n eglos. 33Byttegyns, hwi ynwedh, pubonan, kares ev y wreg kepar ha'y honan, ha'n wreg, kemmeres hi own a'y gour.