Fleghes ha Kerens

1Fleghes, bedhewgh gostydh dh'agas kerens y'n Arloedh rag bos hemma gwiw. 2‘Gwra enora dha das ha'th vamm’, hag yw an kynsa arghadow gans ambos, 3‘may fo da genes ha may fewi termyn hir war an nor.’

4Ha tasow, na wrewgh serri agas fleghes mes megewgh i yn dyskybleth ha dyskans an Arloedh.

Kethyon ha Mestrysi

5Kethwesyon, bedhewgh gostydh dh'agas mestrysi war-lergh an kig gans own ha krena yn lelder a'n golonn kepar ha dhe Grist. 6Na wrewgh hemma may fewgh gwelys, ow plegya dhe dus, mes avel gwesyon Krist, ow kul bodh Duw dhiworth an enev, 7ow servya gans bolonjedh da kepar dell ve dhe'n Arloedh, a-der dhe dus: 8ow kodhvos pub den, py dader pynag a wrello, hag ev keth po rydh, dhe dhegemmeres hemma dhiworth an Arloedh.

9Ha'n vestrysi, gwrewgh hwi an keth tra dhedha heb godros, ow kodhvos bos an Arloedh anedha i hag ahanowgh hwi yn nev, ha nyns eus faverans ganso.

An Vatel erbynn Drog

10Wor'tiwedh, bedhewgh krev y'n Arloedh, hag y'n nerth a'y alloes. 11Gwiskewgh leun-arvwisk Duw may hallowgh settya orth towlow an jowl, 12rag nyns yw agan kas erbynn goes ha kig, mes erbynn prynsipatys, erbynn potestatys, erbynn rewloryon an bys tewl ma, erbynn luyow spyrysel a dhroktra y'n tylleryow nevek. 13Rakhenna, kemmerewgh leun-arvwisk Duw may hallowgh sevel y'n drog dhydh, ha wosa gul pup-tra, sevel hwath. 14Sevewgh, ytho, ha'gas diwglun grogysys gans gwirder, hag ow kwiska an lurik a ewnder, 15hag owth arghena an treys gans ombareusyans a dheu dhiworth an aweyl a gres6:15 ombareusyans a dheu dhiworth an aweyl a gres: Po ombareusyans dhe bregoth an aweyl a gres.. 16Dres oll, kemmerewgh yn-bann an skoes a fydh may hyllowgh difeudhi pub seth ow flammya a'n tebel el, 17ha kemmerewgh an basnett a selwyans ha kledha an Spyrys, yw lavar Duw.

18Dre bub pysadow ha govenek, pysewgh pub eur oll y'n Spyrys; ha dhe'n porpos na, bedhewgh hewoel gans pub diwysykter ha pysadow rag oll an syns, 19ha ragov vy, may fo kows res dhymm, ha my owth igeri ow ganow, dhe dhyllo yn hardh mysteri an aweyl. 20Rygdhi kannas yn chaynys ov vy, may hylliv hy derivas yn hardh dell goedh dhymm kewsel.

Dynnargh Diwettha

21Lemmyn, may hwodhvowgh hwi ynwedh fatell yw genev, ha pandr'a wrav, pup-tra a wra derivas orthowgh Tyghikus, an broder karadow ha menyster len y'n Arloedh, 22neb re dhannvenis dhywgh rag an keth tra ma, may hwodhvowgh a-dro dhyn, ha may kennertho agas kolonn.

23Kres dhe'n vreder ha kerensa gans fydh dhiworth Duw an Tas ha'n Arloedh Yesu Krist. 24Re bo gras gans pubonan a gar agan Arloedh Yesu Krist gans kerensa anvarwel.