Krog Haman

1Ytho, an myghtern ha Haman a dheuth dhe eva gans Ester an vyghternes. 2Hag yn-medh an myghtern arta dhe Ester, yn nessa dydh an kevewi a win, ‘Pyth yw dha bysadow, a vyghternes Ester? ha grontys vydh dhis. Ha pyth yw dha worholedh? Kyn fo hanter an wlaskor kollenwys vydh.’

3Ena Ester an vyghternes a worthybis ow leverel, ‘Mar kevis vy gras y'th wolok, a vyghtern, ha mar pleg dhe'n myghtern, re bo res dhymm ow bewnans orth ow fysadow, ha'm pobel orth ow gorholedh. 4Rag gwerthys on ni, my ha'm pobel, dhe vos distruys ha ledhys ha dhe verwel. Mes a pen ni gwerthys avel kethyon ha maghtethyon my a wrussa dhe'm taves tewel, a-ban nag yw agan ahwer kehaval dhe'n koll dhe'n myghtern.’

5Ena myghtern Ahasuerus a gewsis ha leverel dhe Ester an vyghternes, ‘Piw yw ev, ha ple'ma ev neb a vynnsa lavasos yn y golonn gul yndella?’

6Yn-medh Ester, ‘Envi hag eskar! An tebel Haman ma!’

Ytho, yth esa euth dhe Haman a-dherag an myghtern ha'n vyghternes. 7Ena sevel a wrug an myghtern yn y gonnar dhiworth an kevewi a win ha mos bys yn lowarth an palys, ha Haman a wortas rag hwilas y vewnans orth Ester an vyghternes; rag ev a weli bos drog ervirys er y bynn gans an myghtern.

8Hware an myghtern a dhehwelis dhiworth lowarth an palys bys yn hel an kevewi; hag yth esa Haman ow koedha war an gweli-dydh le mayth esa Ester. Ytho yn-medh an myghtern, ‘A vynn ev hwath defola an vyghternes, ha hi genev y'm chi ow honan?’

Kettell asas an ger ganow an myghtern, i a gudhas fas Haman. 9Ena yn-medh Harbona, onan a'n spadhesigyon esa a-dherag an myghtern, ‘Otta ynwedh, yma an wydhenn, hanter-kans kevelin7:9 hanter-kans kevelin: a-dro dhe 25 meter. hy ughelder, a wrug Haman hy fareusi rag Mordekay, neb a gewsis rag les an myghtern, ow sevel yn chi Haman.’

Ha'n myghtern a leveris, ‘Krog ev warnedhi.’ 10Ytho, i a grogas Haman war an wydhenn a bareussa ev rag Mordekay, hag yndella koselhes veu konnar an myghtern.