Lokustes

1Ena an Arloedh a leveris dhe Moyses, ‘Ke bys yn Faro; rag my re galeshas y golonn ha kolonn y servysi may tiskwetthiv ow thoknys ma yntredha, 2ha may leverri yn klewans dha vab ha mab dha vab fatell wrug vy kammdhyghtya an Ejyptianys ha pana toknys a wrug vy yntredha; may hwodhvi my dhe vos an Arloedh.’

3Ytho Moyses hag Aron eth a-ji dhe Faro, ha leverel dhodho, ‘Yndellma y lever an Arloedh, Duw an Ebrowyon, “Pygemmys prys y neghydh omuvelhe a-ragov? Gas ow fobel dhe vones ma'm serfyons. 4Rag mar neghydh gasa ow fobel dhe vones, otta, a-vorow y kyrghav lokustes a-berth y'th pow, 5hag i a wra kudha enep an tir, ma na wello denvyth an tir; hag i a wra dybri an pyth eus gesys dhis wosa an keser, hag i a wra dybri oll agas gwydh a dyv y'n gwel. 6Hag i a wra lenwel dha jiow ha chiow oll dha servysi hag Ejyp oll; dell na welas na dha dasow na dha dasow-wynn, a'n jydh may teudhons war an nor bys y'n jydh hedhyw.” ’ Ena ev a dreylyas ha mos a-dhiworth Faro. 7Ha servysi Faro a leveris dhodho, ‘Pygemmys prys y fydh an den ma antell dhyn? Gas an dus dhe vones may serfyons an Arloedh aga Duw; a ny gonvedhydh na hwath bos Ejyp distruys?’ 8Ytho Moyses hag Aron a veu kyrghys dhe Faro arta; hag ev a leveris dhedha, ‘Kewgh, servyewgh an Arloedh agas Duw; mes piw a wra mos?’ 9Ha Moyses a leveris, ‘Ni a wra mos gans agan re yowynk ha'gan re goth; ni a wra mos gans agan mebyon ha'gan myrghes ha gans agan flokkys ha'gan oghen, rag y koedh dhyn synsi goel an Arloedh.’ 10Hag ev a leveris dhedha, ‘Re bo an Arloedh genowgh, mar kwrav agas gasa hwi ha'gas re vyghan dhe vones. Mirewgh, hwi a'gas beus neb tebel dowl yn agas brys. 11Na! Kewgh, an wer yntredhowgh, ha servya an Arloedh, rag bos henna agas hwans.’ Hag i a veu gorrys a-ves a wolok Faro.

12Ena an Arloedh a leveris dhe Moyses, ‘Ystynn dha dhorn dres pow Ejyp rag an lokustes, may teffons war bow Ejyp, ha dybri pub plans y'n tir, peub a veu gesys gans an keser.’ 13Ytho Moyses a ystynnas y welenn dres pow Ejyp, ha'n Arloedh a dhros gwyns a'n howldrevel war an tir oll an jydh na hag oll an nos na; ha pan o myttin, gwyns an howldrevel a dhros an lokustes. 14Ha'n lokustes a dheuth dres oll pow Ejyp, ha powes war bow Ejyp oll; hes mar dew, bythkweth kyns ny veu gwelys lokustes a'n par ma, na ny vydh yndellma a-wosa. 15Rag i a gudhas enep an tir oll, may feu tewlhes an tir, hag i a dhybris oll an plansow y'n tir, hag oll frut an gwydh a veu gesys gans an keser; ha nyns esa glasneth vyth, na gwydhenn na plansow an gwel, dre bow Ejyp oll. 16Ena Faro a elwis Moyses hag Aron yn fysk, ha leverel, ‘My re beghas erbynn an Arloedh agas Duw, hag er agas pynn. 17Lemmyn ytho, gevewgh dhymm ow fegh, my a'gas pys, an unn prys ma, ha pysi an Arloedh agas Duw dhe gemmeres unnweyth an ankow ma ahanav.’ 18Ytho ev eth a-ves a Faro, ha pysi an Arloedh. 19Ha'n Arloedh a dreylyas gwyns pur grev a'n howlsedhes, a dhrehevis an lokustes ha'ga herdhya y'n Mor Rudh; ny veu gesys lokust vyth yn pow Ejyp oll. 20Mes an Arloedh a galeshas kolonn Faro, ha ny asas fleghes Ysrael dhe vones.

Tewlder

21Ena an Arloedh a leveris dhe Moyses, ‘Ystynn dha dhorn war-tu ha nev may fo tewlder dres pow Ejyp, tewlder a vo tavadow.’ 22Ytho Moyses a ystynnas y dhorn war-tu ha nev, hag yth esa tewlder tew yn pow Ejyp oll dre dri dydh; 23ny welsons an eyl y gila, na ny sevis nagonan a'y le dre dri dydh; mes mebyon Ysrael oll a's teva golow y'n tyller mayth esens trigys. 24Ena Faro a elwis Moyses, ha leverel, ‘Kewgh dhe servya an Arloedh; marnas gesewgh agas flokkys ha'gas oghen dhe wortos. Agas fleghes ynwedh a yll mos genowgh.’ 25Mes Moyses a leveris, ‘Res yw dhis gorra yn agan diwleuv sakrifisow hag offrynnow leskys may hyllyn offrynna dhe'n Arloedh agan Duw. 26Agan gwarthek ynwedh a dal mos genen; ny vydh gesys karn pynag, rag y koedh dhyn aga hemmeres dhe servya an Arloedh agan Duw, ha ny wodhon gans pyth y koedh dhyn servya an Arloedh erna dhyffyn di.’ 27Mes an Arloedh a galeshas kolonn Faro, ha ny vynna aga gasa dhe vones. 28Ena Faro a leveris dhodho, ‘Ke ahanav; ha bydh war na welli nevra arta ow fas; rag y'n jydh may hwelli ow fas ty a verow.’ 29Moyses a leveris, ‘Dell leverydh! Ny wrav gweles dha fas arta.’