An Pask

1An Arloedh a leveris dhe Moyses hag Aron yn pow Ejyp, 2An mis ma a vydh dhywgh dalleth an misyow; y fydh an kynsa mis a'n vlydhen dhywgh. 3Leverewgh dhe oll kuntelles Ysrael, Yn degves dydh an mis ma, kemmeres pubonan oen herwydh chi aga thasow, oen dhe bub chi; 4ha mars yw an diogeth re vyghan rag oen, ena ev ha'y gentrevek nessa dh'y ji a wra kemmeres herwydh an niver a dus; herwydh an pyth a allo peub dybri, hwi a reken rag an oen. 5Agas oen a vydh heb namm, gorow, unn bloedh; hwi a'n kemmer dhiworth an deves po dhiworth an gever; 6ha hwi a'n gwith bys yn peswardhegves dydh an mis ma, pan wra kemmynieth kuntelles Ysrael oll y ladha gorthugherweyth. 7Ena i a wra kemmeres rann a'n goes ha'y worra war an dhew bost-daras ha war benn an daras a'n chiow le ma's debrons. 8I a wra dybri an kig an nos na, rostys dre dan; gans bara heb goell hag erbys hwerow i a wra y dhybri. 9Na dhybrewgh rann anodho kriv po bryjys yn dowr, mes rostys, y benn ha'y arrow ha'y bottys. 10Ha ny wrewgh gasa rann anodho dhe wortos bys y'n myttin; an rann anodho a worta hwi a wra leski.

11Y'n vaner ma hwi a wra y dhybri: grogysys agas diwglun, agas sandalyow war agas treys ha'gas gwelenn yn agas dorn; ha hwi a wra y dhybri yn unn fyski. Pask an Arloedh yw. 12Rag my a wra tremena dres pow Ejyp an nos na, ha my a wra gweskel pub kynsa-genys yn pow Ejyp, ha den ha best; ha war dhuwow Ejyp my a wra breus: my yw an Arloedh. 13An goes a vydh tokyn dhywgh, war an chiow le mayth esowgh; ha pan welav an goes, my a wra tremena dresowgh, ha ny goedh pla vyth warnowgh dh'agas distrui, pan waskav pow Ejyp.

Goel an Bara Heb Goell

14An jydh ma a vydh dydh kovadh dhywgh, ha hwi a wra y witha avel goel dhe'n Arloedh; der agas henedhow hwi a wra y witha avel ordenans bys vykken. 15Seyth dydh hwi a wra dybri bara heb goell; y'n kynsa dydh hwi a wra gorra goell yn-mes a'gas chiow, rag mar teppro nebonan goell, a'n kynsa dydh dhe'n seythves, an den na a vydh treghys dhiworth Ysrael. 16Y'n kynsa dydh hwi a wra synsi kuntelles sans, hag y'n seythves dydh kuntelles sans; ober kammenn ny vydh gwrys ynna; mes an pyth a goedh dhe bub huni y dhybri, henna unnsel a vydh pareusys genowgh. 17Ha hwi a wra goelya goel an bara heb goell, rag an keth jydh ma my a dhros agas luyow yn-mes a bow Ejyp: rakhenna hwi a wra goelya an jydh ma, der agas henedhow, avel ordenans bys vykken. 18Y'n kynsa mis, yn peswardhegves dydh an mis gorthugherweyth, hwi a wra dybri bara heb goell, hag y'n kynsa dydh warn ugens a'n mis gorthugherweyth. 19Dre seyth dydh ny vydh kevys goell vyth yn agas chiow; rag mar teppro nebonan neppyth gans goell, an den na a vydh treghys a guntelles Ysrael, kyn fo alyon po genesik a'n tir. 20Ny dhebrowgh travyth gans goell; yn agas annedhow oll, hwi a wra dybri bara heb goell.

An Kynsa Pask

21Ena Moyses a elwis henavogyon Ysrael, ha leverel dhedha, ‘Kewgh dhe gyrghes agas eyn herwydh agas teyluyow, ha ladha an pask. 22Kemmerewgh tyskenn hyssop ha'y troghya y'n goes usi y'n skudell, ha tochya penn an daras ha'n dhew bost-daras gans neppyth a'n goes usi y'n skudell; ha ny wra nagonan ahanowgh mos yn-mes a dharas y ji bys y'n myttin. 23Rag an Arloedh a wra tremena dhe weskel an Ejyptianys, ha pan wel goes war benn an daras ha'n dhew bost-daras, an Arloedh a wra tremena dres an daras, ha ny wra gasa an distruer dhe entra agas chiow dh'agas gweskel. 24Hwi a wra goelya an dra ma avel ordenans ragos ha rag dha vebyon bys vykken. 25Ha pan dhewgh dhe'n tir a wra an Arloedh ri dhywgh, dell dhedhewis, hwi a wra gwitha an gonis ma. 26Ha pan lever dhywgh agas fleghes, “Pandra yw an gonis ma genowgh?” 27hwi a lever, “Yth yw sakrifis pask an Arloedh, rag ev a dremenas dres chiow mebyon Ysrael yn Ejyp, pan weskis an Ejyptianys, mes gasa agan chiow.” ’ Ha'n bobel a omblegyas ha gordhya. 28Ena mebyon Ysrael eth ha gul par dell worhemmynnsa Duw dhe Moyses hag Aron, yndella y hwrussons.

Mernans an Re Gynsa-genys

29Dhe hanter-nos an Arloedh a weskis pub kynsa-genys yn pow Ejyp, a gynsa-genys Faro esedhys war y dron dhe gynsa-genys an prisner esa y'n dhorvagh, ha kynsa-genys oll an gwarthek. 30Ha Faro a sevis y'n nos, ev ha'y servysi oll, hag Ejyp oll; hag yth esa kri meur yn Ejyp, rag nyns esa chi ma nag esa onan marow. 31Hag ev a elwis Moyses hag Aron y'n nos, ha leverel, ‘Sevewgh, kewgh yn-rag a-dhiworth ow fobel, ha hwi ha mebyon Ysrael; ha kewgh dhe servya an Arloedh par dell leversowgh. 32Kemmerewgh agas greow ha'gas oghen, dell leversowgh, ha kewgh dhe-ves; ha bennigewgh vy ynwedh!’

33Ha'n Ejyptianys a ynnias war an bobel ma's tannvonens yn-mes a'n tir yn fysk; rag i a leveris, ‘Tus varow on ni oll.’ 34Ytho an bobel a gemmeras aga thoes kyns bos goell ynno, ha'ga newyow-toesa kelmys yn aga mantelli war aga skoedh. 35Mebyon Ysrael re wrussa ynwedh par dell leveris Moyses dhedha, rag i re wovynnsa orth an Ejyptianys tegennweyth a arghans hag owr, ha dillas; 36Ha'n Arloedh re rosa gras dhe'n bobel yn golok an Ejyptianys, hag i ros dhedha an pyth a vynnsons. Ytho i a byllas an Ejyptianys.

Mebyon Ysrael a Dhiberth a Ejyp

37Ha mebyon Ysrael eth yn-rag a Rameses dhe Sukkoth, neb hwegh kans mil wour war droes, heb rekna an fleghes. 38Lu kemmyskys eth gansa ynwedh, ha pur lies gwarthek, hag oghen ha greow. 39Hag i a bebis torthow heb goell gans an toes re dhrosens a Ejyp, rag y vos heb goell, drefenn aga bos herdhys yn-mes a Ejyp ha ny yllons strechya, na ny bareussens sosten dhedha aga honan.

40An termyn mayth esa mebyon Ysrael trigys yn Ejyp o peswar kans ha deg blydhen warn ugens. 41Ha dhe benn an peswar kans ha deg blydhen warn ugens, y'n jydh na poran, oll luyow an Arloedh eth yn-mes a bow Ejyp. 42Nos a woel o dhe'n Arloedh, dh'aga dri yn-mes a bow Ejyp; ytho an keth nos ma yw nos woelya gwithys dhe'n Arloedh gans mebyon Ysrael oll, dres aga henedhow.

Rewlys an Pask

43Ha'n Arloedh a leveris dhe Moyses hag Aron, Hemm yw ordenans an pask: ny wra estren dybri anodho. 44Mes pub keth prenys der arghans a yll dybri anodho wosa hwi dh'y drodreghi. 45Ny goedh dybri anodho godriger vyth na gwas arvethys. 46Yn unn chi y fydh dybrys; ny wrewgh hwi doen kig vyth yn-mes a'n chi; ha ny wrewgh hwi terri askorn anodho. 47Ha kuntelles Ysrael oll a wra y witha. 48Ha pan wra alyon godriga genowgh hag a vynn gwitha pask dhe'n Arloedh, bedhes oll y re worow trodreghys, ena ev a yll dos nes dh'y witha; ev a vydh avel genesik an tir. Mes ny wra dybri anodho den antrodreghys. 49Y fydh unn lagha rag an genesik ha rag an alyon usi trigys yntredhowgh.

50Yndella y hwrug mebyon Ysrael oll; dell worhemmynnis an Arloedh dhe Moyses hag Aron, yndella i a wrug. 51Ha dhe'n keth jydh na an Arloedh a dhros mebyon Ysrael yn-mes a bow Ejyp herwydh aga luyow.