Kan Moyses

1Ena Moyses ha mebyon Ysrael a ganas an gan ma dhe'n Arloedh, ow leverel,

‘Kana a wrav dhe'n Arloedh, rag ev re dryghis yn splann;

an margh ha'y varghek ev re dewlis y'n mor.

2An Arloedh yw ow nerth ha'm kan,

hag ev res eth ha bos ow selwyans;

hemm yw ow Duw ha'y wordhya a wrav,

Duw ow thas, ha my a'n ughelha.

3An Arloedh yw breselyas;

an Arloedh yw y hanow.

4‘Charettow Faro ha'y lu ev a dewlis y'n mor

ha'n gwella a'y benngasoryon yw sedhys y'n Mor Rudh.

5An livow a's kudh;

i a sedhis y'n downder avel men.

6‘Dha leuv dhyghow, A Arloedh, yw gormelys yn nerth,

dha leuv dhyghow, A Arloedh, a vrew an eskar.

7Yn braster dha veuredh

ty a dewl dhe'n dor neb a sev er dha bynn;

ty a dhannvon yn-rag dha sorr

hag a's devor avel sowl.

8Orth hwyth dha dhewfrik an dowrow a hwythfis yn-bann,

an livow a sevis yn graghell;

an downderyow a gowlas yn kolonn an mor.

9‘An eskar a leveris, “My a wra siwya, my a wra tremena,

my a rann an preydh, ow hwans a vydh lenwys gansa.

My a denn ow kledha, ow dorn a wra aga distrui.”

10Ty a hwythas gans dha wyns, an mor a's kudhas;

i a sedhis avel plomm y'n dowrow bras.

11‘Piw yw haval dhis, A Arloedh, yn mysk an duwow?

Piw yw haval dhis, meur yn sansoleth,

euthyk yn gwriansow splann,

ow kul marthusyon?

12Ty a ystynnas dha leuv dhyghow,

an dor a's lonkas.

13‘Ty re hembronkas y'th tregeredh an bobel re dhasprensys,

ty re's kevarwoedhas dre dha nerth dhe'th trigva sans.

14An poblow re glewas; i a gren;

gloesow re dhalghennas trigoryon Filistia.

15Lemmyn pennternedh Edom yw dyegrys;

ledyoryon15:15 ledyoryon: Ebrow hordhes. Moab yw dalghennys yn kren;

oll annedhysi Kanan re deudhis dhe-ves;

16own hag euth a goedh warnedha;

drefenn meuredh dha vregh, i yw kosel avel men,

erna dremenno dha bobel, A Arloedh,

erna dremenno dha bobel re brensys.

17Ty a wra aga dri a-ji, ha'ga flansa war venydh dha ertach,

an tyller, A Arloedh, re wrussys rag dha drigva,

an sentri, A Arloedh, re fastyas dha dhiwleuv.

18An Arloedh a reyn bys vykken ha bynnari.’

Kan Miryam

19Rag mergh Faro a dheuth gans y jarettow ha'y varghogyon y'n mor, an Arloedh a dhros dowrow an mor arta warnedha, mes mebyon Ysrael a gerdhas war dhor sygh yn mysk an mor. 20Ena Miryam, an brofoeses, hwoer Aron, a gemmeras tabourik yn hy leuv ha'n benynes oll eth war hy lergh gans tabourigow ha gans donsyow. 21Ha Miryam a worthybis dhedha,

‘Kenewgh dhe'n Arloedh rag ev a dryghis yn splann,

an margh ha'y varghek ev re dewlis y'n mor.’

An Dowr Trenk

22Ena Moyses a hembronkas Ysrael a'n Mor Rudh hag i eth yn gwylvos Shur; i eth tri dydh y'n gwylvos ha ny gavsons dowr. 23Pan dheuthons bys yn Mara, ny yllens eva dowr Mara, rag y vos trenk; rakhenna y feu gelwys Mara. 24Ha'n bobel a grodhvolas war Moyses, ow leverel, ‘Pandr'a evyn?’ 25Hag ev a grias war an Arloedh; ha'n Arloedh a dhiskwedhas dhodho gwydhenn hag ev a's tewlis y'n dowr, ha'n dowr eth ha bos hweg.

Ena an Arloedh a wrug dhedha ordenans ha lagha hag ena ev a's provas, 26ow leverel, ‘Mar mynnowgh goslowes yn tiwysyk orth lev an Arloedh agas Duw, ha gul an pyth yw ewn yn y dhewlagas, ha koela orth y worhemmynnow ha gwitha oll y ordenansow, ny worrav warnowgh nagonan a'n klevesow a worris war an Ejyptianys; rag my yw an Arloedh agas sawyer.’

27Ena y teuthons dhe Elim le mayth esa dewdhek fenten dhowr ha deg palmwydhenn ha tri-ugens; hag i a gampyas ena ryb an dowr.