An Manna ha'n Rynki

1Ena i eth yn-rag a Elim ha'n kuntelles oll a vebyon Ysrael a dheuth dhe wylvos Sin usi ynter Elim ha Sinay, an pymthegves dydh a'n nessa mis wosa i dhe dhiberth a bow Ejyp. 2Ha'n kuntelles oll a vebyon Ysrael a grodhvolas war Moyses hag Aron y'n gwylvos, 3ow leverel dhedha, ‘Unnweyth a marwen orth leuv an Arloedh yn pow Ejyp, pan en esedhys ryb an sethow-kig ha pan dhybryn bara dhe walgh! rag hwi re'gas dros yn-mes dhe'n gwylvos ma dhe ladha an gemmynieth oll dre nown.’

4Ena an Arloedh a leveris dhe Moyses, ‘Otta, my a wra dhe vara koedha a nev ragowgh avel glaw; ha'n bobel a wra mos yn-mes ha kuntell pub dydh an rann rag unn jydh, ma's preffiv mar kerdhons yn ow lagha po na. 5Y'n hweghves dydh, pan bareusons an pyth a guntellons, y fydh diwweyth an myns a guntellons pub dydh.’ 6Ytho Moyses hag Aron a leveris dhe vebyon Ysrael oll, ‘Dhe'n gorthugher hwi a wodhvydh y feu an Arloedh neb a'gas dros yn-mes a bow Ejyp, 7hag y'n myttin hwi a welvydh golewder an Arloedh, rag ev dhe glewes agas krodhvolyow war an Arloedh. Rag pyth on ni may krodhvolowgh warnan?’ 8Ha Moyses a leveris, ‘Pan re an Arloedh dhywgh gorthugherweyth kig dhe dhybri ha myttinweyth bara dhe walgh, rag an Arloedh dhe glewes an krodhvolyow a grodhvolowgh warnodho – pyth on ni? Nyns yw agas krodhvolyow warnan ni mes war an Arloedh.’

9Ha Moyses a leveris dhe Aron, ‘Lavar dhe'n kuntelles oll a vebyon Ysrael, “Dewgh nes a-rag an Arloedh, rag ev re glewas agas krodhvolyow.” ’ 10Ha dell gewsi Aron dhe'n kuntelles oll a vebyon Ysrael, i a viras war-tu ha'n gwylvos, hag otta, golewder an Arloedh a omdhiskwedhas y'n gommolenn. 11Ha'n Arloedh a leveris dhe Moyses, 12‘My re glewas krodhvolyow mebyon Ysrael; lavar dhedha, “Dhe dewlwolow hwi a wra dybri kig, hag y'n myttin hwi a vydh lenwys gans bara; ena hwi a wodhvydh my dhe vos an Arloedh agas Duw.” ’

13Gorthugherweyth rynki a dheuth ha kudha an kamp; ha myttinweyth gwiskas gluth a wrowedha a-dro dhe'n kamp. 14Ha pan veu gyllys gwiskas an gluth yth esa war enep an gwylvos tra danow lownek, mar danow avel loesrew war an dor. 15Pan y'n gwelas mebyon Ysrael, i a leveris an eyl dh'y gila, ‘Pyth yw?’ rag ny wodhyens an pyth o. Ha Moyses a leveris dhedha, ‘Yth yw an bara re ros an Arloedh dhywgh dh'y dhybri. 16Hemm yw an pyth re worhemmynnis an Arloedh: “Kuntellewgh anodho, pub gour ahanowgh, kemmys hag a allo dybri; hwi a gemmer unn omer pub huni, herwydh an niver a dus a'gas beus pub huni yn y dylda.” ’ 17Ha mebyon Ysrael a wrug yndella; i a'n kuntellas, re anedha moy, re anedha le. 18Mes pan y'n musursons gans omer, ev neb re guntellsa meur ny'n jevo travyth gesys, hag ev neb re guntellsa boghes ny fyllis dhodho; peub a guntellas herwydh an pyth a allas dybri. 19Ha Moyses a leveris dhedha, ‘Na wres denvyth gasa travyth anodho bys y'n myttin.’ 20Mes ny goelsons orth Moyses; re a asas rann anodho bys y'n myttin hag y fagas kontron, ha flerya; ha Moyses o serrys orta. 21Pub myttin i a'n kuntella, kemmys hag a ylli dybri; mes pan dho an howl ha bos toemm, y teudhi.

22Y'n hweghves dydh i a guntellas diwweyth myns an bara, dew omer pub huni; ha pan dheuth hembrenkysi oll an kuntelles ha leverel dhe Moyses, 23ev a leveris dhedha, ‘Hemm yw an pyth a worhemmynnis an Arloedh: “An vorow a vydh dydh a bowes, sabot sans dhe'n Arloedh; pebewgh an pyth a bebowgh ha bryjyewgh an pyth a vryjowgh, ha pup-tra yw gesys gorrewgh a-denewen dhe vos gwithys bys y'n myttin.” ’ 24Ytho i a'n gorras a-denewen bys vyttin, dell worhemmynnis Moyses; ha ny fleryas ha nyns esa kontron ynno. 25Moyses a leveris, ‘Dybrewgh ev hedhyw, rag hedhyw yw sabot dhe'n Arloedh; hedhyw ny'n kevowgh y'n gwel. 26Hwegh dydh hwi a'n kuntell; mes y'n seythves dydh, hag yw sabot, ny vydh travyth.’ 27Y'n seythves dydh nebes a'n dus eth dhe guntell ha ny gavsons travyth. 28Ha'n Arloedh a leveris dhe Moyses, ‘Pygemmys prys y neghowgh gwitha ow gorhemmynnow hag ow laghys? 29Mirewgh, an Arloedh re ros dhywgh sabot, ytho y'n hweghves dydh ev a re dhywgh bara rag dew dhydh; gortes pubonan ahanowgh yn y le, na as denvyth dhe vones yn-mes a'n tyller y'n seythves dydh.’ 30Ytho an bobel a bowesas y'n seythves dydh.

31Ha chi Ysrael a elwis hanow an dra ma manna; haval o dhe has koriander, gwynn, ha'n sawer anodho avel tesennow gwrys gans mel. 32Ha Moyses a leveris, ‘Hemm yw an pyth re worhemmynnis an Arloedh: “Bedhes gwithys omer anodho der agas henedhow, may hwellens an bara ganso may hwrug vy agas maga y'n gwylvos, pan y's dres yn-mes a bow Ejyp.” ’ 33Ha Moyses a leveris dhe Aron, ‘Kemmer seth ha gorra unn omer a'n manna ynno ha'y settya a-rag an Arloedh, dhe vos gwithys der agas henedhow.’ 34Par dell worhemmynnis an Arloedh dhe Moyses, yndellma Aron a'n settyas a-rag an dustuni, dhe vos gwithys. 35Ha mebyon Ysrael a dhybris an manna dew-ugens blydhen, bys pan dheuthons dhe dir annedhys; i a dhybris an manna bys pan dheuthons dhe or pow Kanan. 36(Unn omer yw an degves rann a efa.)