Dowr a'n Garrek

1An kuntelles oll a vebyon Ysrael eth yn-rag a wylvos Sin yn kerdhow berr, herwydh gorhemmynn an Arloedh, ha kampya yn Refidim; mes nyns esa dowr dhe'n bobel dh'y eva. 2Ytho an bobel a gablas Moyses, ha leverel, ‘Ro dhyn ni dowr dh'y eva!’ Ha Moyses a leveris dhedha, ‘Prag y hwrewgh strivya genev? Prag y hwrewgh previ an Arloedh?’ 3Mes an bobel a's tevo syghes ena rag dowr, ha'n bobel a grodhvolas war Moyses, ow leverel, ‘Prag y'gan hembrenksys yn-mes a Ejyp, dh'agan ladha ha'gan fleghes ha'gan gwarthek dre syghes?’ 4Ytho Moyses a grias war an Arloedh, ‘Pandr'a wrav gans an bobel ma? Ogas parys yns dhe'm labydha.’ 5Ha'n Arloedh a leveris dhe Moyses, ‘Tremen a-rag an bobel, ow kemmeres genes nebes a henavogyon Ysrael; ha kemmer y'th dorn an welenn a wesksys an Nil gensi, ha ke. 6Otta, my a sev a-ragos ena war an garrek yn Horeb, ha ty a wra gweskel an garrek, ha dowr a wra dos anedhi mayth effo an bobel.’ Ha Moyses a wrug yndella a-wel henavogyon Ysrael. 7Hag ev a elwis hanow an tyller Massa ha Meriba, drefenn strif mebyon Ysrael, ha drefenn i dhe brevi an Arloedh, ow leverel, ‘Usi an Arloedh yn agan mysk po na?’

Bresel erbynn Amalek

8Ena y teuth Amalek hag omladh erbynn Ysrael yn Refidim. 9Ha Moyses a leveris dhe Yoshua, ‘Dewis gwer ragon ha mos yn-mes, omladh erbynn Amalek; a-vorow my a wra sevel war benn an vre gans gwelenn Duw y'm dorn.’ 10Ytho Yoshua a wrug dell leveris Moyses dhodho, hag omladh erbynn Amalek; ha Moyses, Aron ha Hur eth dhe benn an vre. 11Pan dhrehevis Moyses y leuv, Ysrael o kreffa; ha pan iselhas y leuv, Amalek o kreffa. 12Mes diwla Moyses eth ha bos skwith; ytho i a gemmeras men ha'y worra yn-danno, hag ev a esedhas warnodho, hag Aron ha Hur a synsis y dhiwdhorn yn-bann, an eyl a'n unn tu ha'y gila dhe'n tu arall, mayth o fyrv y dhiwdhorn bys yn howlsedhes. 13Ha Yoshua a fethas Amalek ha'y dus dre vin an kledha.

14Ha'n Arloedh a leveris dhe Moyses, ‘Skrif hemma yn lyver avel kovadh, ha'y dhasleverel yn diwskovarn Yoshua may tileav yn tien kov Amalek a-dhann nev.’ 15Ha Moyses a dhrehevis alter ha'y henwel ‘An Arloedh yw ow baner’, 16ow leverel, ‘Dorn war vaner an Arloedh! An Arloedh a'n jevydh bresel erbynn Amalek a henedh dhe henedh.’