Yethro a Dheu dhe Weles Moyses

1Yethro, oferyas Midyan, hwegron Moyses, a glewas a bup-tra re wrussa Duw rag Moyses ha rag Ysrael y bobel, fatell dhrossa an Arloedh Ysrael yn-mes a Ejyp. 2Ha Yethro, hwegron Moyses, re gemmersa Sippora, gwreg Moyses, wosa ev dh'y dannvon dhe-ves, 3ha'y dew vab, ha hanow an eyl Gershom (rag y leveris ‘My re beu alyon yn tir estren’), 4ha hanow y gila, Eliezer (rag y leveris ‘An Arloedh Duw o ow gweres hag a'm livras a gledha Faro’). 5Ha Yethro, hwegron Moyses, a dheuth gans y vebyon ha'y wreg dhe Moyses y'n gwylvos le may kampya ryb menydh Duw. 6Ha pan veu leverys dhe Moyses, ‘Otta, yma dha hwegron Yethro ow tos dhis gans dha wreg ha'y dew vab gensi.’ 7Moyses eth yn-rag dhe dhyerbynna y hwegron hag omblegya a-ragdho hag amma dhodho; hag i a salusis an eyl y gila ha mos a-ji dhe'n tylda. 8Ena Moyses a leveris dh'y hwegron pup-tra a wrussa an Arloedh dhe Faro ha dhe Ejyp a-barth Ysrael, oll an anken re dhothya warnedha war an hyns ha fatell y's liv'sa an Arloedh. 9Ha Yethro a lowenhas rag oll an dader re wrussa an Arloedh dhe Ysrael, orth aga livra yn-mes a dhorn a'n Ejyptianys. 10Ha Yethro a leveris, ‘Benniges re bo an Arloedh re'gas livras yn-mes a leuv an Ejyptianys hag yn-mes a dhorn Faro, drefenn ev dhe livra an bobel a-dhann dhorn an Ejyptianys. 11Lemmyn my a woer bos an Arloedh brassa ages duwow oll, ow kul yndella erbynn seul a's dyghtyas yn howtyn.’ 12Ha Yethro, hwegron Moyses, a offrynnas offrynn leskys ha sakrifisow dhe Dhuw, hag Aron a dheuth gans oll an henavogyon a Ysrael dhe dhybri bara gans hwegron Moyses a-rag Duw.

Ordenans an Vreusysi

13An vorow Moyses a esedhas dhe vreusi an bobel, ha'n bobel a sevi a-dro dhe Moyses a'n myttin dhe'n gorthugher. 14Pan welas hwegron Moyses oll a wre ev rag an bobel, ev a leveris ‘Pandra yw a wredh rag an bobel? Prag yth esos esedhys dha honan, hag oll an bobel sevys a-dro dhis a'n myttin dhe'n gorthugher?’ 15Ha Moyses a leveris dh'y hwegron, ‘Rag an bobel dhe dhos dhymm dhe hwilas mynnas Duw; 16pan vydh kedrynn dhedha, y tons dhymm ha my a vreus yntra den ha'y gentrevek, ha my a wra dhedha aswonn ordenansow Duw ha'y laghys.’ 17Hwegron Moyses a leveris dhodho, ‘Nyns yw 'vas an pyth a wredh. 18Ty ha'n bobel genes a wra omskwitha, rag an dra yw re boes ragos, ha ny yllydh y wul dha honan. 19Goslow lemmyn orth ow lev; my a re dhis kusul, ha Duw re bo genes! Ty a vydh kannas an bobel a-rag Duw ha dri aga henyow dhodho; 20ha ty a wra dyski dhedha an ordenansow ha'n laghys, ha gul dhedha aswonn an fordh a dal dhedha kerdhes ynni, ha'n pyth a goedh dhedha y wul. 21Dhe voy, dewis gwer abel yn-mes a'n bobel oll, neb a berth own Dhuw, gwer a yllir aga threstya ha kas gansa falswober; ha gorr gwer a'n par ma a-ugh an bobel avel rewloryon a vilyow, a gansow, a hanter-kansow hag a dhegow. 22Ha breusens an bobel pup-prys; pub negys bras i a wra dri dhis, mes negys byghan pynag i a wra breusi aga honan; may fydh esya ragos, hag i a wra doen an begh genes. 23Mar kwredh hemma, ha Duw mara'th ergh yndellma, ena ty a yll durya, hag oll an bobel ma ynwedh a yll mos dh'aga le yn kres.’

24Ytho Moyses a goelas orth lev y hwegron ha gul pup-tra re lavarsa. 25Moyses a dhewisas gwer abel yn-mes a oll Ysrael, ha gul dhedha bos pennow war an bobel, rewloryon a vilyow, a gansow, a hanter-kansow hag a dhegow. 26Hag i a vreusi an bobel pup-prys; negysyow kales i a dhri dhe Moyses, mes negys byghan pynag i a vreusi aga honan. 27Ena Moyses a asas y hwegron dhe dhibarth hag ev eth war y hyns dh'y vro y honan.