Mebyon Ysrael orth Menydh Sinay

1Dhe'n tressa loer nowydh wosa mebyon Ysrael dhe vones yn-rag a bow Ejyp, y'n jydh na y teuthons yn gwylvos Sinay. 2Ha pan ethons yn-kerdh a Refidim ha dos yn gwylvos Sinay, i a gampyas ena y'n gwylvos; hag Ysrael a gampyas a-rag an menydh. 3Ha Moyses a yskynnas dhe Dhuw, ha'n Arloedh a elwis dhodho yn-mes a'n menydh ow leverel, ‘Yndellma ty a lever dhe ji Yakob, ha derivas dhe vebyon Ysrael: 4Hwi re welas an pyth a wrug vy dhe'n Ejyptianys, ha fatell y's dug war eskelli eryon ha'gas dri dhymm ow honan. 5Lemmyn ytho, mars owgh gostydh dhe'm lev ha gwitha ow hevambos, hwi a vydh ow ferghennogeth arbennik ow honan yn mysk poblow oll; rag oll an nor yw dhymm, 6ha hwi a vydh dhymm gwlaskor a oferysi ha kenedhel sans. An re ma yw an geryow hag a wredh kewsel dhe vebyon Ysrael.’

7Ytho Moyses a dheuth ha gelwel henavogyon an bobel, ha gorra a-ragdha oll an geryow ma a worhemmynnis an Arloedh dhodho. 8Hag oll an bobel a worthybis war-barth ow leverel, ‘Oll re gewsis an Arloedh ni a'n gwra.’ Ha Moyses a dherivas geryow an bobel dhe'n Arloedh. 9Ha'n Arloedh a leveris dhe Moyses, ‘Otta, y tov dhis yn kommolenn dew may klewvo an bobel pan gowsav genes ha may kryssons dhis bys vykken.’ Ena Moyses a leveris geryow an bobel dhe'n Arloedh. 10Ha'n Arloedh a leveris dhe Moyses, ‘Ke dhe'n bobel ha'ga sakra hedhyw hag a-vorow, ha gas dhedha golghi aga dillas, 11ha bydh parys erbynn an tressa dydh; rag y'n tressa dydh an Arloedh a wra diyskynna war venydh Sinay a-wel an bobel oll. 12Ha ty a wra oryon dhe'n bobel oll a-dro, ow leverel, “Gwaytyewgh na yskynnowgh bys y'n menydh na tochya an or anodho; piwpynag a docchyo an menydh a vydh gorrys dhe'n mernans; 13ny wra dorn vyth y dochya, mes y fydh labydhys po tennys gans sethow; best po den kyn fo, ny wra bewa.” Pan sen an hirgorn hwyth hir, i a wra dos bys y'n menydh.’ 14Ytho Moyses a dhiyskynnas a'n menydh dhe'n bobel ha sakra an bobel; hag i a wolghas aga dillas. 15Hag ev a leveris dhe'n bobel, ‘Bedhewgh parys erbynn an tressa dydh; na dewgh nes dhe venyn.’

16Dhe vyttin an tressa dydh yth esa taran ha lughes, ha kommolenn dew war an menydh, ha son pur ughel an hirgorn may krenas oll an bobel esa y'n kamp. 17Ena Moyses a dhros an bobel yn-mes a'n kamp dhe dhyerbynna Duw; hag i a sevis orth troes an menydh. 18Ha menydh Sinay a veu maylys yn mog, drefenn an Arloedh dhe dhiyskynna warnodho yn tan; ha'n mog anodho a yskynnas avel mog an fornes, ha'n menydh oll a grenas yn feur. 19Ha dell besya son an hirgorn ughella hag ughella, Moyses a gewsis, ha Duw a worthybis dhodho yn lev. 20Ha'n Arloedh a dhiyskynnas war venydh Sinay, dhe benn an menydh; ha'n Arloedh a elwis Moyses dhe benn an menydh ha Moyses a yskynnas. 21Ha'n Arloedh a leveris dhe Moyses, ‘Diyskynn ha gwarnya an bobel ma na steffyons yn-bann dhe'n Arloedh dhe vires, ha lies anedha merwel. 22Hag ynwedh gas dhe'n oferysi a dheu nes dhe'n Arloedh omsakra ma na dartho an Arloedh warnedha.’ 23Ha Moyses a leveris dhe'n Arloedh, ‘Ny yll an bobel yskynna menydh Sinay drefenn ty dha honan dh'agan difenn, ow leverel, “Gorr oryon a-dro dhe'n menydh ha'y sakra.” ’ 24Ha'n Arloedh a leveris dhodho, ‘Diyskynn, hag yskynn ow tri genes Aron; mes na as an oferysi ha'n bobel dhe stevya yn-bann dhe'n Arloedh ma na dartho er aga fynn.’ 25Ytho Moyses a dhiyskynnas dhe'n bobel, ha kewsel dhedha.