An Deg Gorhemmynn

1Ha Duw a gewsis oll an geryow ma, ow leverel,

2My yw an Arloedh dha Dhuw, neb a'th tros yn-mes a bow Ejyp, yn-mes a'n chi a gethneth.

3Ny vydh dhis duwow erell a-ragov.

4Na wra dhis imaj gravys, na furv vytholl a dravyth eus y'n nev a-vann, nag y'n nor a-woeles, nag y'n dowr yn-dann an nor; 5Na ombleg a-ragdha na'ga servya; rag my an Arloedh dha Dhuw yw Duw avius, ow kessydhya kammweyth an tasow war an fleghes bys an tressa ha peswora henedh a'n re a'm kas, 6mes ow tiskwedhes tregeredh war vilyow anedha a'm kar hag a with ow gorhemmynnow.

7Na gemmer hanow an Arloedh dha Dhuw yn euver; rag ny wra an Arloedh y asa heb kessydhyans neb a gemmer y hanow yn euver.

8Porth kov a dhydh an sabot, dh'y witha sans. 9Hwegh dydh y lavurydh ha gul oll dha ober; 10mes an seythves dydh yw sabot dhe'n Arloedh dha Dhuw; ynno ny wredh ober vyth, ty, na dha vab, na dha vyrgh, dha was, na dha vaghteth, na dha jatel, na'n alyon usi a-ji dhe'th yetow; 11rag yn hwegh dydh an Arloedh a wrug nev ha nor, an mor, ha myns eus ynna, ha powes y'n seythves dydh; ytho an Arloedh a vennigas an seythves dydh ha'y sanshe.

12Enor dha das ha'th vamm, may fo hir dha dhydhyow y'n tir usi an Arloedh dha Dhuw orth y ri dhis.

13Na wra ladha.

14Na wra avoutri.

15Na wra ladra.

16Na wra fals dhustuni erbynn dha gentrevek.

17Na wra hwansa chi dha gentrevek na hwansa gwreg dha gentrevek, na'y was, na'y vaghteth, na'y ojyon, na'y asen, na travyth eus dhe'th kentrevek.

Own an Bobel

18Lemmyn pan glewas oll an bobel an tarenna ha'n lughes ha son an hirgorn ha'n menydh ow tyllo mog, an bobel a's teva own hag a grenas; hag i a sevis a-bell, 19ow leverel dhe Moyses, ‘Ty, kows orthyn ha ni a wra klewes; mes na gewses Duw orthyn, ma na verwyn.’ 20Ha Moyses a leveris dhe'n bobel, ‘Na berthewgh own; rag Duw yw devedhys dh'agas previ, ha may fo an own anodho a-rag agas dewlagas, ha ma na begghowgh.’

21Ha'n bobel a sevis a-bell ha Moyses a dheuth nes dhe'n tewlder tew le mayth esa Duw.

Laghys a-dro dhe'n Alter

22Ha'n Arloedh a leveris dhe Moyses, Yndellma ty a lever dhe vebyon Ysrael: ‘Hwi re welas agas honan my dhe gewsel orthowgh a nev. 23Ny wrewgh hwi duwow a arghans dhe vos genev; na ny wrewgh dh'agas honan duwow a owr. 24Alter a dhor ty a wra dhymm ha sakrifia warnedhi dha offrynnow leskys hag offrynnow kres, dha dheves ha'th oghen; yn pub le may hwrylliv ow hanow dhe vos kovhes, my a wra dos dhis ha'th venniga. 25Ha mar kwredh alter a ven ragov, ny wredh hy drehevel a veyn treghys; rag mar trehevydh dha enn warnedhi ty a'n defol. 26Ha ny yskynnydh dre radhow dhe'm alter, ma na vo diskudhys dha noethedh warnedha.’