Dyghtyans Kethyon

1Lemmyn an re ma yw an ordenansow a wredh settya a-ragdha. 2Pan brenydh keth ebrow, ev a serv hwegh blydhen, hag y'n seythves ev a yll mos rydh, heb kendon. 3Mar teu ev y honan, ev a wra mos yn-mes y honan; mar teu yn temmedhys, ena y wreg a wra mos yn-mes ganso. 4Mar kwra y vester ri dhodho gwreg ha hi a dheg dhodho mebyon po myrghes, an wreg ha'y fleghes a vydh dh'y mester hag ev a wra mos yn-mes y honan. 5Mes mar kwra an keth leverel yn igor, ‘My a gar ow mester, ow gwreg hag ow fleghes; ny vynnav mos rydh’, 6ena y vester a wra y dhri dhe Dhuw, hag ev a wra y dhri dhe'n daras po dhe'n post-daras; ha'y vester a wra telli y skovarn gans mynowes hag ev a wra y servya bys vykken.

7Pan werth gour y vyrgh dhe vos maghteth, ny wra hi mos yn-mes avel an gethyon worow. 8Mar ny bleg hi dh'y mester re's ordenas dhodho y honan, ena ev a as dhedhi bos dasprenys; ny'n jevydh gwir dh'y gwertha dhe bobel estren, a-ban y's dyghtyas yn tislen. 9Mara's orden rag y vab, ev a wra dyghtya gensi avel gans myrgh. 10Mar kemmer gwreg arall dhodho y honan, ny wra lehe hy boes, hy dillas na hy gwiryow demmedhys. 11Ha mar ny wrello an tri thra a-barth dhedhi, hi a wra mos yn-mes heb kendon, heb talas a arghans.

Laghys a-dro dhe Wriansow Freudhek

12Piwpynag a wesko den may ferow a vydh gorrys dhe'n mernans. 13Mes mar ny'n kontrewaytyas, mes Duw a asas dhodho koedha yn y dhorn, ena my a orden dhis tyller may hyll ev fia dhodho. 14Mes den mar omsett der entent war dhen arall rag y ladha gans gil, ty a wra y gemmeres dhiworth ow alter may farwo.

15Piwpynag a wesko y das po y vamm a vydh gorrys dhe'n mernans. 16Piwpynag a lattro gour, kyn y'n gwerth po kyn fydh kevys ganso yn y berghennogeth, a vydh gorrys dhe'n mernans.

17Piwpynag a vollettho y das po y vamm a vydh gorrys dhe'n mernans.

18Pan dhadhel gwer, ha'n eyl a wysk y gila gans men po gans y dhorn ha ny verow, mes mones dh'y weli, 19ena, mar saffo arta ha kerdhes gans y lorgh, ev neb a'n gweskis a vydh kwit; marnas ev a dal koll a'y dermyn hag a'n gwra dhe vos yaghhes yn tien.

20Pan wysk nebonan y geth, y was po y vaghteth, gans gwelenn, hag ev a verow yn-dann y dhorn, y fydh kessydhys. 21Mes mar omwellha an keth jydh po dew, ny vydh kessydhys, rag an gwas yw y arghans.

22Pan omladh gwer war-barth, ha shyndya benyn gans flogh, may hwra hi kammomdhoen, ha hwath ny siw dregynn vyth, neb a's shyndyas a vydh spalyes, herwydh an pris settys gans gour an venyn; hag ev a dal herwydh mynnas an vreusydhyon. 23Mes mar kwra dregynn siwya, ty a re bewnans rag bewnans, 24lagas rag lagas, dans rag dans, dorn rag dorn, troes rag troes, 25losk rag losk, goli rag goli, kreythenn rag kreythenn.

26Pan wysk den lagas y geth, gwas po maghteth, ha'y dhistrui, ev a wra gasa an keth dhe vones rydh a-barth an lagas. 27Pan gnouk yn-mes dans y geth, gwas po maghteth, ev a wra gasa an keth dhe vones rydh a-barth an dans.

Dever Perghennogyon

28Pan wra ojyon kornya gour po benyn, an ojyon a vydh labydhys, ha ny vydh dybrys y gig, mes perghennek an ojyon a vydh kwit. 29Mes mar peu an ojyon usys dhe gornya kyns, ha'y berghennek re beu gwarnys mes ny'n gwithas a-ji, hag ev a ladh gour po benyn, an ojyon a vydh labydhys, ha'y berghennek ynwedh a vydh gorrys dhe'n mernans. 30Mar pydh ronson gorrys warnodho, ena ev a re rag dasprena y vewnans pynag a vo gorrys warnodho. 31Mar kwra kornya maw po mowes, y fydh dyghtys herwydh an keth rewl ma. 32Mar kwra an ojyon kornya kethwas po maghteth, an perghennek a re dh'aga mester deg shekel warn ugens a arghans, ha'n ojyon a vydh labydhys.

33Pan as nebonan puth yn igor, po pan wra den kleudhya puth heb y gudha, hag ojyon po asen a goedh ynno, 34perghennek an puth a'n gwra ewn; ev a re arghans dh'y berghennek, ha'n best marow a vydh dhodho.

35Pan woli ojyon unn den ojyon onan arall, may ferow, ena i a wra gwertha an ojyon bew ha kevrenna an pris anodho; ha'n ojyon marow i a wra ranna ynwedh. 36Po mars yw godhvedhys bos an ojyon usys dhe gornya kyns, ha ny'n gwithas y berghennek a-ji, ev a wra tyli ojyon rag ojyon, ha'n best marow a vydh dhodho.