Lagha a-dro dhe Attyli

1Gour mar lader ojyon po davas, ha'y ladha po y wertha, ev a wra tyli pymp ojyon rag ojyon ha peder davas rag davas.22:1 22:1 bys 22:31 yw niverys 21:37 bys 22:30 y'n Ebrow, hag y'n Septuagint ha'n Vulgat.

2Mars yw kevys lader ow terri yn chiow, hag yw gweskys may ferow, ny vydh kabel-goes ragdho.

3Mars yw sevys an howl warnodho y fydh kabel-goes ragdho. Ev a wra daskorrans; mar ny'n jeves travyth ena ev a vydh gwerthys drefenn y ladrynsi.

4Mars yw kevys an best yn few yn-dann y berghennogeth, kyn fo ojyon po asen po davas, ev a wra tyli dewblekkweyth.

5Gour pan as y enyvales dhe beuri yn gwel po gwinlann, po gasa y vest dhe beuri yn pras ken den, ev a wra daskorrans a'n gwella a'y bras y honan hag a'n gwella a'y winlann y honan.

6Pan dardh tan ha kavoes spern may fydh leskys bern a vanalow po an ys po an gwel, ev neb a enowis an tan a wra daskorrans leun.

7Gour mar re dh'y gentrevek arghans po gwara dhe witha, hag y fydh ledrys dhiworth chi an gour, ena, mar pydh kevys an lader, ev a wra tyli dewblekkweyth. 8Mar ny vydh kevys an lader, perghennek an chi a nes dhe Dhuw, rag diskwedhes mar korras y dhorn dhe wara y gentrevek po na.

9Rag pub kas a berghennogeth disputys, kyn fo rag ojyon, asen, davas, dillas po tra gellys pynag, anodho may lever onan ‘Hemm yw an dra’, ken an dhew du a wra dos a-rag Duw; ev neb a wra Duw y dhampnya a wra tyli dewblekkweyth dh'y gentrevek.

10Gour mar re dh'y gentrevek asen po ojyon po davas po best pynag dhe witha, hag y ferow po yw shyndys po kemmerys dhe-ves, heb denvyth orth y weles, 11ena y fydh ti re'n Arloedh yntredha, na worras y dhorn dhe byth y gentrevek, ha'n perghennek a wra degemmeres an ti, ha ny wra daskorrans. 12Mes mar pydh ledrys dhiworto, ev a wra daskorrans dh'y berghennek. 13Mar pydh skwardys gans bestes, gas ev dh'y dhri yn dustuni; ny wra daskorrans rag an pyth re beu skwardys.

14Gour mar chevis best dhiworth y gentrevek, ha'n best yw shyndys po a verow, ha'n perghennek heb bos ganso, ev a wra daskorrans leun. 15Mars yw an perghennek ganso ny wra daskorrans; mars yw arvethys, y teu yn pris y arveth.

Laghys Devosel

16Gour mar tyn gwyrghes nag yw ambosys, ha growedha gensi, ev a re an ro demmedhyans rygdhi, ha gul dhedhi bos y wreg. 17Mar nagh hy thas yn tien hy ri dhodho, ev a wra tyli arghans par dhe ro demmedhyans rag gwyrghesow.

18Ny esydh pystriores dhe vewa.

19Piwpynag a gosko gans best a vydh gorrys dhe'n mernans.

20Piwpynag a offrynno dhe neb duw marnas dhe'n Arloedh, a vydh sakrys dhe dhistruyans.

21Ny wredh kammdhyghtya alyon na'y arwaska, drefenn hwi dhe vos alyons yn pow Ejyp. 22Ny wrewgh tebeldhyghtya gwedhwes vyth po omdhivas. 23Mar kwredh aga thebeldhyghtya, hag i a gri warnav, my a wra klewes aga kri yn sur, 24hag ow sorr a wra leski, ha my a'gas ladh dre gledha, ha'gas gwragedh a vydh gwedhwesow ha'gas mebyon a vydh omdhivasow.

25Mar prestydh arghans dhe nebonan a'm pobel genes neb yw boghosek, ny vydhydh dhodho avel kresysor, ha ny wovynnydh oker anodho. 26Mar kemmerydh dillas dha gentrevek yn goestel, ty a wra y dhaskorr dhodho kyns sedhes an howl; 27rag henn yw y unn ballenn, yth yw kudhans rag y groghen; yn pandra ken y hwra ev koska? Ha mar kri warnav, my a wra klewes, rag ow bos grassyes.

28Ny wredh milliga Duw, na mollethi rewler dha bobel.

29Ny wredh strechya offrynna dhiworth leunder dha drevas na a sugen dha winwaskow. Kynsa-genys dha vebyon ty a re dhymm. 30Ty a wra yndellma ynwedh gans dha oghen ha gans dha dheves: seyth dydh y fydh gans y vamm; y'n ethves dydh ty a wra y ri dhymm.

31Hwi a vydh gwer sakrys dhymm; yndellma ny wrewgh dybri kig vyth yw skwardys gans bestes an gwel; hwi a'n tewl dhe'n keun.