Sel an Kevambos

1Hag ev a leveris dhe Moyses, ‘Yskynn dhe'n Arloedh, ty hag Aron, Nadab, hag Abihu, ha deg ha tri-ugens dhiworth henavogyon Ysrael, ha gordhya a-bell. 2Moyses y honan a dheu nes dhe'n Arloedh, mes ny wra an re erell dos yn ogas, ha ny wra an bobel yskynna ganso.’

3Moyses a dheuth ha leverel dhe'n bobel geryow oll an Arloedh hag oll an ordenansow; ha'n bobel oll a worthybis gans unn lev, ha leverel, ‘Oll an geryow re gewsis an Arloedh, ni a's gwra.’ 4Ha Moyses a skrifas geryow oll a'n Arloedh. Hag ev a sevis myttin a-varr, ha drehevel alter dhe droes an menydh, ha drehevel dewdhek peulven, herwydh dewdhek loeth Ysrael. 5Hag ev a dhannvonas gwer yowynk a vebyon Ysrael, neb a offrynnas offrynnow leskys ha sakrifia offrynnow kres a lodhnow dhe'n Arloedh. 6Ha Moyses a gemmeras hanter an goes ha'y worra yn basonyow, ha hanter an goes ev a'n skoellyas war an alter. 7Ena ev a gemmeras lyver an kevambos, ha'y lenna yn dewlagas an bobel; hag i a leveris, ‘Oll re gewsis an Arloedh, ni a'n gwra, ha ni a vydh gostydh.’ 8Ha Moyses a gemmeras an goes ha'y skoellya war an bobel, ow leverel, ‘Otta goes an kevambos gwrys genowgh gans an Arloedh herwydh oll an geryow ma.’

9Ena Moyses hag Aron, Nadab, hag Abihu, ha'n deg ha tri-ugens dhiworth henavogyon Ysrael a yskynnas, 10ha gweles Duw Ysrael, hag yth esa yn-dann y dreys kepar ha leur a saffir avel nev y honan yn klerder. 11Ha ny worras y dhorn war vryntinyon mebyon Ysrael; i a viras war Dhuw, ha dybri hag eva.

Moyses war Venydh Sinay

12An Arloedh a leveris dhe Moyses, ‘Yskynn dhymm war an menydh, ha gortos ena, ha my a re dhis an leghennow a ven, gans an lagha ha'n gorhemmynn, re skrifis dh'aga dyskans.’ 13Ytho Moyses a sevis gans y venyster Yoshua, ha Moyses a yskynnas dhe venydh Duw. 14Hag ev a leveris dhe'n henavogyon, ‘Gortewgh omma ragon, bys pan dheun dhywgh arta; hag otta, yma Aron ha Hur genowgh; piwpynag a'n jeffo ken, gwres mones dhedha.’

15Ena Moyses a yskynnas war an menydh, ha'n gommolenn a gudhas an menydh. 16Splannder Duw a goedhas war venydh Sinay, ha'n kommol a'n kudhas hwegh dydh; hag y'n seythves dydh ev a elwis Moyses yn-mes a gres an kommol. 17Ytho omdhiskwedhyans splannder Duw o avel tan ow tewi war benn an menydh a-wel mebyon Ysrael. 18Ha Moyses a entras a-ji dhe'n kommol hag yskynna war an menydh. Hag yth esa Moyses war an menydh dew-ugens dydh ha dew-ugens nos.