Sakrans Oferysi

1Lemmyn, hemm yw an pyth a wredh dh'aga sakra, ma'm serfyons avel oferysi. Kemmer tarow yowynk ha dew hordh dinamm 2ha bara heb goell, ha torthow heb goell myskys gans oyl, ha tesennow tanow urys gans oyl. Ty a's gwra gans bleus gwaneth fin. 3Ha ty a wra aga gorra yn unn ganstell ha'ga dri y'n ganstell, ha dri an lodhen ha'n dhew hordh. 4Ty a dhre Aron ha'y vebyon dhe dharas tylda an kuntelles ha'ga golghi gans dowr. 5Ha ty a gemmer an gwiskasow, ha gorra war Aron an bows ha mantell an efod, ha'n efod, ha'n lurik, ha'y wrogysa gans kyngel an efod, 6ha ty a sett an tulyfant war y benn, ha gorra an gurun sans war an tulyfant. 7Ha ty a gemmer oyl an untyans ha'y dhiveri war y benn ha'y untya. 8Ena ty a dhre y vebyon, ha gorra powsyow warnedha, 9ha'ga grogysa gans grogysyow ha kelmi kappow warnedha; ha'n oferyaseth a vydh dhedha der ordenans heb worfenn. Yndellma ty a wra sakra Aron ha'y vebyon.

10Ena ty a dhre an lodhen a-rag tylda an kuntelles. Aron ha'y vebyon a wra gorra aga diwleuv war benn an lodhen, 11ha ty a ladh an lodhen a-dherag an Arloedh, orth daras tylda an kuntelles, 12ha kemmeres rann a woes an lodhen ha'y worra war gern an alter gans dha vys, ha rann arall an goes ty a wra diveri war woeles an alter. 13Ha ty a gemmer oll an blonek a worher an pottys, ha stagell an avi, ha'n dhiw loneth ha'n blonek eus warnedha, ha'ga leski war an alter. 14Mes kig an lodhen, ha'y groghen, ha'y deyl, ty a gowllesk a-ves a'n kamp; offrynn pegh yw.

15Ena ty a gemmer onan a'n hordhes, hag Aron ha'y vebyon a wra gorra aga diwleuv war benn an hordh, 16ha ty a ladh an hordh ha kemmeres y woes ha'y skoellya war an alter a-derdro. 17Ena ty a dregh an hordh yn rannow, ha golghi y golodhyon ha'y arrow, ha'ga gorra gans y rannow ha'y benn, 18ha leski an hordh dien war an alter; yth yw offrynn leskys dhe'n Arloedh; yth yw sawer plegadow, offrynn dre dan dhe'n Arloedh.

19Ty a gemmer an hordh arall; hag Aron ha'y vebyon a wra gorra aga diwleuv war benn an hordh, 20ha ty a ladh an hordh, ha kemmeres rann a'y woes ha'y worra war vin skovarn dhyghow Aron ha war vin skovornow dyghow y vebyon, ha war veus aga dorn dhyghow, ha war vys bras aga throes dyghow, ha skoellya goes war an alter a-derdro. 21Ena ty a gemmer neppyth a'n goes usi war an alter, hag a oyl an untyans, ha'ga skoellya war Aron ha war y wiskasow, ha war y vebyon ha war wiskasow y vebyon ganso; hag ev ha'y wiskasow a vydh sans, ha'y vebyon ha gwiskasow y vebyon ganso.

22Ty a gemmer ynwedh blonek an hordh, ha'n lost blonegek, ha'n blonek a worher an pottys, ha stagell an avi, ha'n dhiw loneth ha'n blonek usi warnedha, ha'n vordhos dhyghow (rag yth yw hordh an urdhyans), 23hag unn torth-vara, hag unn desenn a vara gans oyl, hag unn desenn danow, yn-mes a'n ganstell a vara heb goell hag usi a-rag an Arloedh; 24ha ty a worr oll an re ma yn diwla Aron hag yn diwla y vebyon, ha'ga gwevya avel offrynn gwevys a-rag an Arloedh. 25Ena ty a wra aga hemmeres dhiworth aga leuv, ha'ga leski war an alter war an offrynn leskys, avel sawer plegadow a-rag an Arloedh; yth yw offrynn dre dan dhe'n Arloedh.

26Ha ty a gemmer bronn an hordh a urdhyans Aron ha'y gwevya avel offrynn gwevys a-rag an Arloedh; hag y fydh dha rann. 27Ha ty a wra sakra bronn an offrynn gwevys, ha mordhos an offrynn drehevys hag a veu gwevys, hag a veu drehevys dhiworth hordh an urdhyans, dhiworth an rann esa dhe Aron, ha dhiworth an rann esa dh'y vebyon. 28Y fydh rag Aron ha'y vebyon avel ordenans bys vykken dhiworth mebyon Ysrael, rag yth yw offrynn, hag y fydh offrynn gans mebyon Ysrael dhiworth sakrifisow aga offrynnow kres, offrynn dhe'n Arloedh.

29Gwiskasow sans Aron a vydh rag y vebyon war y lergh, dhe vos untys ynna ha sakrys ynna. 30An mab neb yw oferyas yn y le a wra aga gwiska seyth dydh, pan dheu a-ji dhe dylda an kuntelles dhe venystra y'n tyller sans.

31Ty a gemmer hordh an urdhyans, ha bryjyon y gig y'n tyller sans; 32hag Aron ha'y vebyon a dheber kig an hordh ha'n bara usi y'n ganstell, dhe dharas tylda an kuntelles. 33I a dheber an taklow na gansa may feu gwrys prenedh, dh'aga sakra ha sanshe, mes ny wra estren dybri anedha, rag aga bos sans. 34Ha mars eus gesys kig pynag a'n urdhyans po a'n bara, bys y'n myttin, ena ty a wra leski an remenant dre dan; ny vydh dybrys, rag y vos sans.

35Yndellma ty a wra dhe Aron ha dh'y vebyon, herwydh pup-tra re worhemmynnis dhis; dre seyth dydh y hwredh aga sakra, 36ha pub dydh ty a offrynn lodhen avel offrynn pegh rag prenedh. Ynwedh ty a burha an alter, pan wredh prenedh rygdhi, ha'y untya, dh'y sakra. 37Seyth dydh ty a wra prenedh rag an alter, ha'y sakra, ha'n alter a vydh an moyha sans; pynag a docchyo an alter a dheu ha bos sans.

An Offrynnow Pub-dydhyek

38Lemmyn hemm yw an pyth a offrynnydh war an alter: dew oen unn bloedh, dydh ha dydh heb hedhi. 39Unn oen ty a offrynn myttinweyth, ha'y gila ty a wra offrynna gorthugherweyth; 40ha gans an kynsa oen degves rann a efa a vleus fin myskys gans kwarter hin a oyl gweskys, ha kwarter hin gwin rag offrynn diwes. 41Ha'n eyl oen ty a offrynn y'n gorthugher, hag offrynna ganso offrynn greun hag offrynn sans, avel myttinweyth, avel sawer plegadow, offrynn dre dan dhe'n Arloedh. 42Offrynn leskys y fydh heb hedhi der agas henedhow dhe dharas tylda an kuntelles a-rag an Arloedh, le may fetyav genes, dhe gewsel ena genes. 43Ena my a vet gans mebyon Ysrael a vydhons sanshes gans ow golewder. 44My a saker tylda an kuntelles ha'n alter; Aron ynwedh ha'y vebyon my a wra sakra, dhe'm servya avel oferysi. 45Ha my a drig yn mysk mebyon Ysrael, ha my a vydh aga Duw. 46Hag i a wodhvydh my dhe vos an Arloedh aga Duw, a's dros yn-mes a bow Ejyp may trikken yn aga mysk; my yw an Arloedh aga Duw.