Duw a Elow Moyses

1Lemmyn yth esa Moyses ow pugelya gre y hwegron, Yethro, oferyas Midyan, hag ev a hembronkas y flokk dhe du an howlsedhes dhe'n gwylvos, ha dos dhe venydh Duw, dhe Horeb. 2Hag el an Arloedh a omdhiskwedhas dhodho yn flamm a dan yn-mes a gres an bos; hag ev a viras, hag otta, yth esa an bos gans tan, mes ny veu konsumys. 3Ha Moyses a leveris, ‘My a dreyl a-denewen ha mires orth an welesigeth vras ma ha'n praga ma nag yw leskys an bos.’ 4Ha'n Arloedh a welas ev dhe dreylya dhe vires, ha Duw a'n gelwis yn-mes a'n bos, ‘Moyses, Moyses!’ Hag y leveris, ‘Ottavy.’ 5Ena y leveris, ‘Na dheus nes; diarghen dha eskisyow a'th treys, rag an tyller may sevydh yw dor sans.’ 6Hag y leveris, ‘My yw Duw dha das, Duw Abraham, Duw Ysak ha Duw Yakob.’ Ha Moyses a gudhas y fas, rag own a'n jeva a vires orth Duw.

7Ena an Arloedh a leveris, ‘My re welas galar ow fobel usi yn Ejyp ha klewes aga kri drefenn aga mestrysi kethneth; aswonn a wrav aga galarow; 8ha my re dhiyskynnas dh'aga livra yn-mes a leuv an Ejyptianys ha dh'aga dri a'n tir na dhe dir mas ha ledan, dhe dir a dhinwa leth ha mel, dhe dyller an Kananysi, an Hittysi, an Amorysi, an Perizzysi, an Hivysi ha'n Yebusysi. 9Ha lemmyn, otta, kri mebyon Ysrael re dheuth dhymm, ha my re welas an arwask mayth arwask an Ejyptianys warnedha. 10Deus, my a'th tannvon dhe Faro may trylli ow fobel, mebyon Ysrael, yn-mes a Ejyp.’ 11Mes Moyses a leveris dhe Dhuw, ‘Piw ov vy mayth ylliv dhe Faro ha dri mebyon Ysrael yn-mes a Ejyp?’ 12Ev a leveris, ‘Yn sur, my a vydh genes; ha hemma a vydh tokyn dhis my dhe'th tannvon: pan dhresys an bobel yn-mes a Ejyp, ty a wra servya Duw war an menydh ma.’

13Ena Moyses a leveris dhe Dhuw, ‘Mar tov dhe vebyon Ysrael ha leverel dhedha “Duw agas tasow re'm dannvonas dhywgh”, hag i a wovynn orthiv, “Pyth yw y hanow?” pandr'a lavarav dhedha?’ 14Duw a leveris dhe Moyses, ‘MY YW NEB YTH OV VY.’3:14: Po Yth esov neb yth esov. Hag y leveris, ‘Lavar hemma dhe vebyon Ysrael, “MY YW re'm dannvonas dhywgh.” ’ 15Duw a leveris ynwedh dhe Moyses, ‘Lavar hemma dhe vebyon Ysrael, “An Arloedh, Duw agas tasow, Duw Abraham, Duw Ysak, ha Duw Yakob, re'm dannvonas dhywgh”: hemm yw ow hanow bys vykken, hag yndellma my a vydh kovhes dres henedhow oll. 16Ke dhe guntell war-barth henavogyon Ysrael ha leverel dhedha, “An Arloedh, Duw agas tasow, Duw Abraham, Ysak ha Yakob re omdhiskwedhas dhymm, ow leverel: My re viras warnowgh ha'n pyth a veu gwrys dhywgh yn Ejyp; 17hag ambosa a wrav agas dri yn-bann yn-mes a galar Ejyp dhe bow an Kananysi, an Hittysi, an Amorysi, an Perizzysi, an Hivysi ha'n Yebusysi, tir a dhinwa leth ha mel.” 18Hag i a wra goslowes orth dha lev ha ty ha henavogyon Ysrael a wra mos dhe vyghtern Ejyp ha leverel dhodho, “An Arloedh, Duw an Ebrowyon, re vetyas genen; ha lemmyn, ni a'th pys, gas ni dhe vones yn vyaj a dri dydh y'n gwylvos mayth offrynnyn dhe'n Arloedh agan Duw.” 19My a woer na wra myghtern Ejyp agas gasa dhe vones marnas dre leuv grev. 20Ytho my a ystynn ow dorn ha gweskel Ejyp gans ow marthusyon oll a wrav ynno; wosa henna ev a as dhedha mones. 21Ha my a re gras dhe'n bobel ma yn golok an Ejyptianys; ha pan yllowgh, nyns ewgh gwag agas leuv, 22mes pub benyn a wra govynn a'y hentrevoges, hag anedhi hi a wodrik yn hy chi, tegennweyth a arghans hag owr, ha dillas, ha hwi a'gas gorr war agas mebyon ha war agas myrghes; yndellma hwi a byll an Ejyptianys.’