Alter dhe Leski Ynkys

1Ty a wra alter dhe leski ynkys warnedhi; a brenn shittim ty a's gwra. 2Unn kevelin a vydh hy hys ha kevelin hy les; hi a vydh pedrek, ha dew gevelin a vydh hy ughelder; hy hern a vydh a unn rann gensi. 3Ha ty a wra hy gorowra gans owr pur, hy fenn ha'y thenwennow a-dro ha'y hern; ha ty a wra rygdhi kylgh a owr a-derdro. 4Ha diw lagasenn owrek ty a wra rygdhi; yn-dann hy hylgh dhe'n dhew denewen a-dal dhedhi ty a's gwra, hag i a wra synsi an gwelynni gansa may fydh degys. 5Ty a wra an gwelynni a brenn shittim ha'ga gorowra. 6Ha ty a wra aga gorra a-rag an vayl usi ryb argh an dustuni, a-rag an dregeredhva usi a-ugh an dustuni, le may hwrav metya genes. 7Hag Aron a lesk ynkys hweg warnedhi; pub myttin pan bareus an lugern ev a'n lesk. 8Ha pan bareus Aron an lugern gorthugherweyth, ev a'n lesk, an ynkys pub-dydhyek a-rag an Arloedh der agas henedhow. 9Ny wredh offrynna ynkys astranj warnedhi, nag offrynn leskys, nag offrynn greun; ha ny dhiverydh offrynn diwes warnedhi. 10Aron a wra prenedh war hy hern unnweyth y'n vlydhen; gans goes offrynn pegh an prenedh ev a wra prenedh ragdho unnweyth y'n vlydhen der agas henedhow; yth yw an moyha sans dhe'n Arloedh.

Toll an Tabernakel

11An Arloedh a leveris dhe Moyses, 12Pan gemmerydh niveryans mebyon Ysrael, ena peub a re daspren ragdho ev y honan dhe'n Arloedh pan y's niverydh, ma na vo pla yn aga mysk pan y's niverydh. 13Peub a dremen dhe'n re reknys seulabrys a re hanter shekel, war-lergh shekel an sentri (an shekel yw ugens gera), hanter shekel profys dhe'n Arloedh. 14Peub a dremen dhe'n re reknys, a ugens bloedh ha moy, a re offrynn dhe'n Arloedh. 15Ny wra an den rych ri moy, ha ny wra an den boghosek ri le, ages an hanter shekel, pan wrewgh offrynn dhe'n Arloedh dhe wul prenedh rag agas enevow. 16Ha ty a gemmer arghans an prenedh dhiworth mebyon Ysrael, ha'y ordena rag gonis tylda an kuntelles, may tokko mebyon Ysrael yn kovheans a-rag an Arloedh rag gul prenedh ragowgh agas honan.

An Wolghell a Vrons

17An Arloedh a leveris dhe Moyses, 18Ynwedh ty a wra golghell a vrons, dhedhi sel a vrons, rag omwolghi. Ha ty a wra hy gorra yntra tylda an kuntelles ha'n alter, ha ty a wra gorra dowr ynni, 19ganso may hwra Aron ha'y vebyon golghi aga diwla ha'ga threys. 20Pan ons a-ji dhe dylda an kuntelles, po pan dhons nes dhe'n alter dhe venystra, dhe leski offrynn dre dan dhe'n Arloedh, i a wra omwolghi yn dowr, ma na varwons. 21I a wolgh aga diwla ha'ga threys, ma na varwons; y fydh dhedha ordenans bys vykken, dhodho ev ha dh'y dhiyskynnysi der an henedhow.

Oyl an Untyans

22Ynwedh, an Arloedh a leveris dhe Moyses, 23Kemmer dhis an gwella spisyow: a lin myrr pymp kans shekel, hag a ginnamon hweg y vlas hanter an myns, henn yw dew kans ha hanter-kans, hag a galamus30:23 galamus Kalamus, korsenn hweg, Acorus calamus, ynperthys dhe'n Tir Sans dhiworth Eynda yn furv polter. Pur dalvosek o, ha devnydhys yn oyl sans hag y'n melysethow an moyha drudh. hweg y sawer dew kans ha hanter-kans, 24hag a gassia pymp kans, war-lergh shekel an sentri, hag a oyl oliv unn hin; 25ha ty a wra a'n re ma unyent, kemmyskys avel gans perfumyer; oyl untya sans y fydh. 26Ha ganso ty a wra untya tylda an kuntelles hag argh an dustuni, 27ha'n voes ha'y daffar oll, ha'n kantoler ha'y dhaffar, ha'n alter a ynkys, 28ha'n alter a offrynnow leskys gans oll hy daffar ha'n wolghell ha'y sel; 29ty a wra aga sakra may fons an moyha sans; pypynag a's tocchyo a dheu ha bos sans. 30Ha ty a wra untya Aron ha'y vebyon, ha'ga sakra, ma'm serfyons avel oferysi. 31Ha ty a lever dhe vebyon Ysrael, ‘Hemma a vydh ow oyl sans rag untya der agas henedhow. 32Ny vydh dinewys war gig tus, ha ny wrewgh oyl arall haval dhodho yn y gemmysk; sans yw, hag y fydh sans dhywgh. 33Neb a gemmysko oyl avello po neb a worro anodho war estren a vydh treghys a'y bobel.’

An Ynkys

34Ha'n Arloedh a leveris dhe Moyses, Kemmer spisyow hweg, stakte, hag onygha, ha galbanum, spisyow hweg gans frankynkys pur (a bubonan anedha y fydh rannow par), 35ha gul ynkys kemmyskys avel gans perfumyer, sellys, pur ha sans, 36ha nebes anodho ty a val dhe bolter, ha gorra rann anodho a-rag an dustuni yn tylda an kuntelles le may hwrav metya genes; y fydh ragowgh an moyha sans. 37Ha'n ynkys a wredh herwydh y gemmysk, ny vydh ragowgh agas honan; y fydh ragowgh sans dhe'n Arloedh. 38Piwpynag a wrello nebes haval dhodho dh'y dhevnydhya avel perfum a vydh treghys a'y bobel.