Kreftoryon an Tabernakel

1An Arloedh a leveris dhe Moyses, 2Mir, my re elwis dre hanow Besalel mab Uri, mab Hur, a loeth Yuda: 3ha my re'n lenwis gans spyrys Duw, gans furneth ha konvedhes, gans skians hag oll kreftweyth, 4dhe dhevisya patronyow konnyk, dhe weytha gans owr, arghans ha brons, 5dhe dreghi meyn dh'aga desedha, ha dhe gervya prenn, rag gweyth yn pub kreft. 6Hag otta, my re'n untyas ganso Oholiab mab Ahisamak, a loeth Dan; ha my re ros sleyghneth dhe bub krefter konnyk may hwrellons pup-tra re erghis dhis: 7tylda an kuntelles, hag argh an dustuni, ha'n dregeredhva usi warnedhi, ha mebel oll an tylda, 8an voes ha'y daffar, ha'n kantoler pur gans y dhaffar oll, ha'n alter a ynkys, 9ha'n alter a offrynn leskys gans hy daffar oll, ha'n wolghell ha'y sel, 10ha'n gwiskasow fin plethys, gwiskas sans Aron an oferyas ha dillas y vebyon, dh'aga gonis avel oferysi, 11hag oyl an untyans ha'n ynkys hweg rag an tyller sans. Herwydh oll re erghis dhis i a wra.

An Sabot

12Ha'n Arloedh a leveris dhe Moyses, 13Lavar dhe vebyon Ysrael, ‘Hwi a wra gwitha ow sabotys, rag hemm yw tokyn yntra my ha hwi der agas henedhow, may hwodhvowgh my, an Arloedh, dh'agas sanshe. 14Hwi a wra gwitha an sabot, rag y vos sans dhywgh; peub a'n defol a vydh gorrys dhe'n mernans; piwpynag a wrello ober vyth ynno, an enev na a vydh treghys a-dhiworth y bobel. 15Hwegh dydhweyth a ober a vydh gwrys, mes an seythves dydh yw sabot a bowes, sans dhe'n Arloedh; piwpynag a wrello ober vyth dydh an sabot a vydh gorrys dhe'n mernans. 16Ytho mebyon Ysrael a wra gwitha an sabot, ow kul vri a'n sabot der aga henedhow, avel kevambos bys vykken. 17Arwoedh yw bys vykken yntra my ha mebyon Ysrael an Arloedh dhe wruthyl nev ha nor yn hwegh dydh, hag y'n seythves dydh ev a bowesas, hag a veu diskwithys.’

18Ha wosa gorfenna kewsel ganso war venydh Sinay, ev a ros dhe Moyses diw leghenn an dustuni, leghennow a ven, skrifys gans bys Duw.