An Leugh Owrek

1Pan welas an bobel Moyses dhe hokya a dhiyskynna a'n menydh, an bobel a omguntellas war-barth gans Aron ha leverel dhodho, ‘Yn-bann, gwra dhyn ni duwow a wra mones a-ragon; rag an Moyses ma, an gour a'gan dros yn-mes a bow Ejyp, ny wodhon an pyth eus hwarvedhys dhodho.’ 2Hag Aron a leveris dhedha, ‘Tennewgh dhe-ves an bysowyer owr usi yn skovornow agas gwragedh, agas mebyon ha'gas myrghes, ha'ga dri dhymm.’ 3Ytho oll an bobel a dennas aga bysowyer owr esa yn aga diwskovarn, ha'ga dri dhe Aron. 4Hag ev a dhegemmeras an owr a'ga diwla, ha'y weytha gans toul gravya, ha gwruthyl leugh teudh, hag i a leveris, ‘An re ma yw dha dhuwow, A Ysrael, a'th tros yn-mes a bow Ejyp.’ 5Pan welas Aron hemma, ev a dhrehevis alter a-dheragdho; hag Aron a wrug gwarnyans ow leverel, ‘A-vorow y fydh goel dhe'n Arloedh.’ 6Hag i a sevis a-varr myttin a-varr, hag offrynna offrynnow leskys ha dri offrynnow kres; ha'n bobel a esedhas dhe dhybri hag eva, ha sevel dhe wari.

7Ha'n Arloedh a leveris dhe Moyses, ‘Diyskynn; rag dha bobel, hag a dhresys yn-mes a bow Ejyp, re omdhefolas; 8i re dreylyas a-denewen yn uskis a'n fordh a worhemmynnis dhedha; i re wrug dhedha leugh teudh, ha'y wordhya ha sakrifia dhodho, ha leverel, “An re ma yw dha dhuwow, A Ysrael, a'th tros yn-mes a bow Ejyp.” ’ 9Ha'n Arloedh a leveris dhe Moyses, ‘My re welas an bobel ma, hag otta, yth yw pobel kales hy hilbenn; 10lemmyn ytho gas vy dhe'm honan may losko ow sorr toemm er aga fynn ha ma's kowllytthiv; mes my a wra ahanas kenedhel veur.’

11Mes Moyses a bysis an Arloedh y Dhuw,32:11 a bysis an ARLOEDH y Dhuw: Ebrow a dhisorras fas an ARLOEDH y Dhuw. ha leverel, ‘A Arloedh, prag y lesk toemm dha sorr erbynn dha bobel, a's dresys yn-mes a bow Ejyp gans galloes meur ha dorn grev? 12Prag y tegoedh dhe'n Ejyptianys leverel, “Gans tebel vynnas y hwrug aga dri yn-rag, dh'aga ladha y'n menydhyow, dh'aga howlladha war enep an nor”? Treyl a'th sorr fers ha re bo edrek dhis a'n tebelwrians erbynn dha bobel. 13Porth kov a Abraham, Ysak, hag Ysrael, dha servysi, dhe neb y hwrussys ti re'th honan ha leverel dhedha, “My a wra liesplekhe agas diyskynnysi avel ster nev, hag oll an tir ma re ambosis y rov dh'agas diyskynnysi, hag i a'n erit bys vykken” ’ 14Ha'n Arloedh a'n jevo edrek a'n drog a brederi gul dh'y bobel.

15Ha Moyses a dreylyas ha diyskynna a'n menydh gans diw leghenn an dustuni yn y dhorn, leghennow a veu skrifys war an dhew du; war an eyl tu ha war y gila y fons skrifys. 16Ha'n leghennow o ober Duw, ha'n skrif o skrif Duw, gravys war an leghennow. 17Pan glewas Yoshua tros an bobel dell armens, ev a leveris dhe Moyses, ‘Yma tros a vresel y'n kamp.’ 18Mes ev a leveris, ‘Nyns yw son garma rag trygh, na son kri fethans, mes son kana a glewav.’ 19Ha kettell dheuth nes dhe'n kamp ha gweles an leugh ha'n donsya, sorr Moyses a loskas fers, hag ev a dewlis an leghennow a'y dhiwdhorn ha'ga therri dhe droes an menydh. 20Hag ev a gemmeras an leugh re wrussons, ha'y leski gans tan, ha'y velyas dhe bolter, ha'y skoellya war an dowr hag a wrug dhe vebyon Ysrael y eva.

21Ha Moyses a leveris dhe Aron, ‘Pandr'a wrug an bobel ma dhis may hwrussys dri pegh meur warnedha?’ 22Hag Aron a leveris, ‘Na as sorr ow arloedh dhe leski fers; ty a aswonn an bobel hag yw parys rag tebelwrians. 23Rag i a leveris dhymm, “Gwra duwow dhyn a wra mos a-ragon; ha'n Moyses ma, an gour a'gan dros yn-mes a bow Ejyp, ny wodhon pyth re hwarva dhodho.” 24Ha my a leveris dhedha, “Neb a'n jeffo owr, gwres y denna anodho”; yndella i a'n ros dhymm, ha my a'n tewlis y'n tan, hag y teuth yn-mes an leugh ma.’

25Ha pan welas Moyses bos an bobel gyllys anfronnys (rag Aron re's gasas dhe vos direwl, dh'aga meth yn mysk aga eskerens), 26ena Moyses a sevis dhe yet an kamp, ha leverel, ‘Piw eus gans an Arloedh? Des dhymm.’ Ha mebyon Levi oll a omguntellas dhodho. 27Hag y leveris dhedha, ‘Yndellma y lever an Arloedh, Duw Ysrael: “Pub den gorres y gledha war y glun. Kewgh ha dehweles a yet dhe yet der an kamp, ha ledhewgh pub den y vroder, ha pub den y goweth ha pub den y gentrevek.” ’ 28Ha mebyon Levi a wrug herwydh ger Moyses hag y koedhas a'n bobel an jydh na neb tri mil wour. 29Ha Moyses a leveris, ‘Hedhyw hwi re omsakras rag servis an Arloedh, peub orth kost y vab ha'y vroder, may hworro bennath warnowgh an jydh ma.’

30An vorow Moyses a leveris dhe'n bobel, ‘Hwi re beghas pegh meur. Ha lemmyn my a wra yskynna dhe'n Arloedh; martesen my a yll gul prenedh rag agas pegh.’ 31Ytho Moyses a dhehwelis dhe'n Arloedh ha leverel, ‘Ogh, an bobel ma re beghas pegh meur; i re wrug dhedha duwow a owr. 32Mes lemmyn, mar mynnydh gava aga fegh – ha mar ny vynnydh, gwra ow defendya, my a'th pys, yn-mes a'th lyver re skrifsys.’ 33Mes an Arloedh a leveris dhe Moyses, ‘Neb re beghas er ow fynn, my a wra y dhefendya ev a'm lyver. 34Mes lemmyn, ke, hembronk an bobel dhe'n tyller a gewsis dhis anodho; otta, ow el a wra mos a-ragos. Byttegyns, an jydh may tyffiv, my a wra aga hessydhya a'ga fegh.’ 35Ha'n Arloedh a dhannvonas pla war an bobel rag i dhe wul an leugh a wrug Aron.