Rewlys an Sabot

1Moyses a guntellas an kuntelles oll a vebyon Ysrael, ha leverel dhedha, An re ma yw an taklow re worhemmynnis an Arloedh dhywgh dh'aga gul. 2Hwegh dydh y fydh ober gwrys, mes y'n seythves dydh y'gas bydh sabot sans a bowes dhe'n Arloedh; piwpynag a wrello ober vyth ynno a vydh gorrys dhe'n mernans; 3ny wrewgh hwi enowi tan vyth yn agas annedhow dydh an sabot.

Offrynnow an Tabernakel

4Moyses a leveris dhe'n kuntelles oll a vebyon Ysrael, Hemm yw an dra re worhemmynnis an Arloedh. 5Kemmerewgh a-dhiworthowgh offrynn dhe'n Arloedh; neb a'n jeffo kolonn volonjedhek, gas ev dhe dhri offrynn an Arloedh: owr, arghans ha brons; 6pann glas ha purpur ha kogh ha sendal, ha blew gaver, 7kreghyn rudhhes a hordhes, kreghyn morhoghes ha prenn shittim, 8oyl dhe'n lugarn, spisyow rag oyl an untyans ha rag an ynkys hweg, 9meyn onyks ha meyn rag desedha, rag an efod ha rag an lurik.

Gweyth rag an Tabernakel

10Ha pub krefter konnyk yntredhowgh dens ha gwruthyl oll re worhemmynnis an Arloedh: 11an tabernakel, y dylda ha'y gudhans, y higennow ha'y framyow, y varrow, y golovenyow ha'y selveyn; 12an argh ha'y gwelynni, an dregeredhva ha vayl an groglenn; 13an voes gans hy gwelynni ha'n toulow oll ha bara an wolok; 14an kantoler ynwedh rag an golow, ha'y dhaffar oll ha'y lugern, ha'n oyl rag an lugarn; 15hag alter an ynkys, gans hy gwelynni, hag oyl an untyans ha'n ynkys hweg, ha'n groglenn rag an daras, dhe borth an tabernakel; 16alter an offrynn leskys, gans y rastell a vrons, hy gwelynni ha'y daffar oll, an wolghell ha'y sel; 17kroglennow an klos, y golovenyow ha'ga selveyn, ha'n groglenn rag porth an klos; 18ebilyer an tabernakel hag ebilyer an klos, ha'ga hordennow; 19an gwiskasow fin plethys rag menystra y'n tyller sans, an gwiskasow sans rag Aron an oferyas, ha gwiskasow y vebyon, rag aga gonis avel oferysi.

Offrynnow an Bobel

20Ena kuntelles mebyon Ysrael oll a dhibarthas a wolok Moyses. 21Hag y teuthons, pubonan kolonnek, ha pubonan gans spyrys bolonjedhek, ha dri offrynn an Arloedh rag ober tylda an kuntelles, ha rag oll y wonis, ha rag an gwiskasow sans. 22Yndellma y teuthons, ha gwer ha benynes; oll a golonn volonjedhek a dhros brochys ha bysowyer ha bysowyer-sel ha tergh, pub eghenn a daklow owrek, peub owth offrynna offrynn a owr dhe'n Arloedh. 23Ha pubonan a veu kevys ganso pann glas po purpur po kogh po sendal po kreghyn rudhhes a hordhes po kreghyn morhoghes, a's dros. 24Peub a ylli offrynna offrynn a arghans po brons a'n dros yn offrynn dhe'n Arloedh; ha pub den a veu kevys ganso prenn shittim 'vas dhe'n ober, a'n dros. 25Ha'n benynes oll a veu abel a nedhas gans aga diwdhorn ha dri an pyth re nedhsons, pann glas ha purpur ha kogh ha sendal; 26ha'n benynes oll ha'ga holonn movyes gans galloes a nedhas blew an gever. 27Ha'n hembrenkysi a dhros meyn onyks ha meyn dhe vos desedhys, rag an efod ha rag an lurik, 28ha spisyow hag oyl rag an golow, ha rag oyl an untyans, ha rag an ynkys hweg. 29An wer ha'n benynes oll, mebyon Ysrael, ha'ga holonn movyes dhe dhri neppyth rag an ober re worhemmynnsa an Arloedh dre leuv Moyses dhe vos gwrys, a'n dros avel aga offrynn bolonjedhek dhe'n Arloedh.

Kreftoryon an Tabernakel

30Ha Moyses a leveris dhe vebyon Ysrael, Mirewgh, an Arloedh re elwis dre hanow Besalel mab Uri, mab Hur, a loeth Yuda; 31hag ev re'n lenwis gans Spyrys Duw, gans furneth ha konvedhes, gans skians ha gans kreftweyth a bub eghenn, 32dhe dhevisya patronyow konnyk, dhe weytha yn owr hag arghans ha brons, 33dhe dreghi meyn dh'aga desedha, ha dhe gervya prenn, rag gweyth yn pub kreft konnyk. 34Hag ev re worras yn y golonn an galloes dhe dhyski, hag ev hag Oholiab mab Ahisamak a loeth Dan. 35Ev re's lenwis gans galloes dhe wul pub eghenn a ober gwrys gans krefter po gweythor kweth po brosyer yn pann glas ha purpur ha kogh ha sendal, po gans gwiader; oberoryon yn kreftweyth a bub eghenn, ha gweythoryon kweth a dhevisyow konnyk.