Alter an Offrynnow Leskys

1Ev a wrug an alter a offrynnow leskys ynwedh a brenn shittim; pymp kevelin o hy hys ha pymp kevelin hy les; pedrek o, ha tri hevelin o hy ughelder. 2Ev a wrug kern dhedhi dh'y feder kornell; hy hern o a unn rann gensi, hag ev a's gorlownyas gans brons. 3Hag ev a wrug toulow oll an alter, an pottow, an reuvow, an bollow, an kigveryow ha'n padellow-tan: oll an daffar ev a wrug a vrons. 4Hag ev a wrug dhe'n alter rastell, roesweyth a vrons, yn-dann hy amal, owth ystynn hanter-fordh war-nans. 5Ev a deudhis peder lagasenn dhe beder kornell an rastell vrons avel synsellow an gwelynni. 6Ev a wrug an gwelynni a brenn shittim ha'ga gorlownya gans brons. 7Hag ev a worras an gwelynni der an lagasennow war denwennow an alter, dh'y doen gansa; ev a wrug an alter kow, gans estyll.

An Wolghell a Vrons

8Hag ev a wrug an wolghell a vrons ha'y sel a vrons, dhiworth gwedrow an benynes a venystra orth daras tylda an kuntelles.

Klos an Tabernakel

9Hag ev a wrug an klos; rag an barth dhyghow kroglennow an klos o a sendal plethys, kans kevelin; 10aga holovenyow o ugens ha'ga krawyow ugens, a vrons, mes higennow an peulveyn ha'ga bondow o a arghans. 11Ha dhe'n barth kledh kans kevelin, aga holovenyow ugens, aga krawyow ugens, a vrons, mes higennow an kolovenyow ha'ga bondow o a arghans. 12Ha dhe denewen an howlsedhes yth esa kroglennow a hanter-kans kevelin, aga holovenyow deg, ha'ga krawyow deg; higennow an kolovenyow ha'ga bondow o a arghans. 13Ha war denewen an est war-tu ha'n howldrehevel, hanter-kans kevelin. 14Kroglennow unn tenewen an yet o pymthek kevelin, gans teyr holoven ha tri kraw. 15Hag yndella dhe denewen arall yet an klos; dhe'n dhorn ma ha'n dhorn na yth esa kroglennow a bymthek kevelin, gans teyr holoven ha tri kraw. 16Ha'n kroglennow a-dro dhe'n klos o gwrys a sendal plethys. 17Ha krawyow an kolovenyow o a vrons, mes higennow an kolovenyow ha'ga bondow o a arghans; gorlownyans aga fenn-kolovenyow o a arghans ynwedh, hag oll kolovenyow an klos a'n jevo bondow a arghans. 18Ha kroglenn porth an klos a veu brosweyth yn pann glas ha purpur ha kogh ha sendal plethys; an hys o ugens kevelin, ha'n ughelder o pymp kevelin y'n les, herwydh kroglennow an klos. 19Ha'ga holovenyow o peswar; aga feswar kraw o a vrons, aga higennow a arghans, ha gorlownyans aga fenn-kolovenyow ha'ga bondow a arghans. 20Hag ebilyer oll an tabernakel ha rag an klos a-dro o a vrons.

Myns an Owr, Arghans ha Brons yn Gwrians an Tabernakel

21Homm yw rol taklow an tabernakel, tabernakel an dustuni, dell vons reknys orth gorhemmynn Moyses, rag ober an Levysi yn-dann gevarwoedhyans Ithamar mab Aron an oferyas. 22Besalel mab Uri, mab Hur, a loeth Yuda, a wrug pup-tra a worhemmynnis an Arloedh dhe Moyses; 23ha ganso yth esa Oholiab mab Ahisamak, a loeth Dan, kreftweyther ha desinor ha brosyer yn pann glas ha purpur ha kogh ha sendal.

24Hag oll an owr a veu devnydhys y'n ober, yn gwrians oll an sentri, owr an offrynn, o naw talent warn ugens ha seyth kans ha deg shekel warn ugens, war-lergh shekel an sentri. 25Hag arghans tus an kuntelles a veu niverys o kans talent ha mil seyth kans pymthek shekel ha tri-ugens, war-lergh shekel an sentri: 26beka pub penn (henn yw hanter shekel, war-lergh shekel an sentri), rag pubonan a veu reknys y'n niveryans, a ugens bloedh ha moy, rag hwegh kans ha tri mil, pymp kans den ha hanter-kans. 27An kans talent arghans o rag teudhi krawyow an sentri ha krawyow an vayl; kans kraw rag kans talent, unn talent rag unn kraw. 28Hag a'n mil seyth kans pymthek shekel ha tri-ugens ev a wrug higennow rag an kolovenyow, ha gorlownya aga fenn-kolovenyow ha gul dhedha bondow. 29Ha'n brons a veu res o deg talent ha tri-ugens, ha dew vil ha peswar kans shekel; 30ganso y hwrug krawyow daras tylda an kuntelles, an alter vrons ha'n rastell vrons rygdhi ha toulow oll an alter, 31krawyow an klos a-derdro, oll ebilyer an tabernakel, hag oll ebilyer an klos a-derdro.