Gwiskasow an Oferysi

1Hag a'n pann glas ha purpur ha kogh i a wrug gwiskasow fin plethys, rag menystra y'n tyller sans; i a wrug an gwiskasow sans rag Aron, dell worhemmynnis an Arloedh dhe Moyses.

2Hag ev a wrug an efod a owr, pann glas, purpur ha kogh, ha sendal plethys. 3Ha lownennow owr a veu mortholys ha treghys yn neusennow dhe weytha a-ji dhe'n pann glas, purpur ha kogh, hag a-ji dhe'n sendal, ober gweythor kweth. 4I a wrug dhe'n efod skoedhlienyow, junys dhodho orth y dhew amal. 5Ha'n kyngel warnodho o a'n keth devnydh ha kreftweyth agesso, a owr, ha pann glas ha purpur ha kogh, ha sendal plethys; dell worhemmynnsa an Arloedh dhe Moyses.

6Hag i a bareusis veyn onyks, kes yn settyansow a owr, gravys avel gravyans sel, herwydh henwyn mebyon Ysrael. 7Hag ev a's desedhas war skoedhlienyow an efod, dhe vos meyn a gov rag mebyon Ysrael, dell worhemmynnsa an Arloedh dhe Moyses.

An Lurik

8Ev a wrug an lurik, ober gweythor kweth, avel ober an efod, a owr, pann glas ha purpur ha kogh, ha sendal plethys. 9Pedrek o; an lurik a veu gwrys dewblek, dornva y hys ha dornva y les pan o dewblek. 10Hag i a dhesedhas ynno peswar rew a veyn. Rew a sardius, topaz, ha gwyrven o an kynsa rew; 11ha'n nessa rew, garnet, saffir hag adamant; 12ha'n tressa rew, yasinth, agat hag amethyst; 13ha'n peswora rew, owrven, onyks ha yasper; kes gans settyansow a owr. 14Yth esa dewdhek men herwydh henwyn mebyon Ysrael; avel gravyans sel, peub gans y hanow, rag an dewdhek loeth. 15Hag i a wrug war an lurik kadonyow gwiys avel kerdyn, a owr pur; 16hag i a wrug dew dhesedhyans a owr plethys ha dew gylgh owr, ha gorra an dhew gylgh war dhew amal an lurik; 17hag i a worras an dhiw gordenn a owr y'n dhew gylgh war amal an lurik. 18Penn an dhiw gordenn i a stagas dhe'n dhew dhesedhans plethys; yndellma i a'n stagas a-rag dhe skoedhlienyow an efod. 19Ena i a wrug dew gylgh a owr ha'ga gorra dhe dhew benn an lurik, dhe'n amal a-bervedh ryb an efod. 20Hag i a wrug dew gylgh a owr, ha'ga staga a-rag dhe rann isella dew skoedhlien an efod, ryb y junyans a-ugh kyngel an efod. 21Hag i a golmas an lurik der y lagasennow dhe lagasennow an efod gans snod glas, may hworwettho war gyngel sleyghweythys an efod, ha ma na omlowsso an lurik a'n efod; dell worhemmynnsa an Arloedh dhe Moyses.

Gwiskasow Erell an Oferysi

22Ev a wrug ynwedh mantell an efod gwiys oll a bann glas 23hag igeryans an bows ynno o haval dhe igeryans yn hoberjon, ha kolmenn gwiys a-dro dhe'n igeryans, ma na ve fregys. 24War lostennow an vantell i a wrug greunavalow a bann glas ha purpur ha kogh ha sendal plethys. 25Ynwedh i a wrug klegh a owr pur ha gorra an klegh ynter an greunavalow war lostennow an vantell a-derdro, ynter an greunavalow; 26klogh ha greunaval, klogh ha greunaval a-derdro war lostennow an vantell rag menystra; dell worhemmynnsa an Arloedh dhe Moyses.

27Ynwedh i a wrug an mantelli, gwiys yn sendal, rag Aron ha'y vebyon, 28ha'n tulyfant a sendal, ha'n kappow a sendal, ha'n lavrek a lien, a sendal plethys, 29ha'n grogys a sendal plethys hag a bann glas ha purpur ha kogh, brosys gans brosweyth; dell worhemmynnsa an Arloedh dhe Moyses.

30Hag i a wrug plat an gurun sans a owr pur, ha skrifa warnodho skrif, avel gravyans sel, ‘Sans dhe'n Arloedh.’ 31Hag i a golmas dhodho snod glas, dh'y fastya war an tulyfant war-vann; dell worhemmynnsa an Arloedh dhe Moyses.

Gorfenn an Tabernakel

32Yndellma oll ober tabernakel tylda an kuntelles a veu gorfennys; ha mebyon Ysrael a wrug herwydh pup-tra a worhemmynnsa an Arloedh dhe Moyses; yndellma i a wrug. 33Hag i a dhros an tabernakel dhe Moyses, an tylda ha'y dhaffar oll, y higennow, y framyow, y varrow, y golovenyow, ha'y grawyow; 34an kudhans a greghyn rudhhes a hordhes ha'n kudhans a greghyn morhoghes, ha vayl an groglenn; 35argh an dustuni gans hy gwelynni ha'n dregeredhva; 36an voes ha'y daffar oll, ha bara an wolok; 37an kantoler a owr pur ha'y lugern ha'n lugern settys yn rew ha'y dhaffar oll, ha'n oyl rag an golow; 38an alter owrek, oyl an untyans ha'n ynkys hweg, ha kroglenn daras an tylda; 39an alter a vrons, ha'y rastell a vrons, hy gwelynni, ha'y daffar oll, an wolghell ha'y sel; 40kroglennow an klos, hy holovenyow, ha'y selyow, ha kroglenn porth an klos, hy hordennow ha'y ebilyer; ha'n daffar oll rag gonis an tabernakel, rag tylda an kuntelles; 41an gwiskasow fin plethys rag menystra y'n tyller sans, an gwiskas sans rag Aron an oferyas, ha gwiskas rag y vebyon dhe servya avel oferysi. 42Herwydh pup-tra re worhemmynnsa an Arloedh dhe Moyses, yndella mebyon Ysrael a wrug an ober oll. 43Ha Moyses a welas oll an ober, hag otta, i re'n gwrussa; dell worhemmynnsa an Arloedh, yndella i re'n gwrussa. Ha Moyses a's bennigas.