1An Arloedh a leveris dhe Moyses, 2Y'n kynsa dydh a'n kynsa mis ty a dhrehav tabernakel tylda an kuntelles. 3Ha ty a worr ynno argh an dustuni, ha ty a gudh an argh gans an vayl. 4Ha ty a dhre an voes a-ji hag araya hy daffar; ha ty a dhre an kantoler a-ji ha settya y lugern. 5Ha ty a worr an alter owrek rag an ynkys a-rag argh an dustuni ha settya kroglenn an porth rag an tabernakel. 6Ha ty a sett alter an offrynn leskys a-rag daras tabernakel tylda an kuntelles, 7ha gorra an wolghell yntra tylda an kuntelles ha'n alter, ha gorra dowr ynni. 8Ha ty a bareus an klos a-derdro, ha kregi kroglenn porth an klos. 9Ena ty a gemmer oyl untyans an tabernakel ha pup-tra eus ynno, ha'y sakra ha'y vebel oll; hag y hwra dos ha bos sans. 10Ynwedh ty a wra untya alter an offrynnow leskys ha'y daffar oll, ha sakra an alter; ha'n alter a vydh an moyha sans. 11Ty a wra untya ynwedh an wolghell ha'y sel ha'y sakra. 12Ena ty a gyrgh Aron ha'y vebyon dhe dharas tylda an kuntelles, ha'ga golghi gans dowr, 13ha gorra war Aron an gwiskas sans, ha ty a wra y untya ha'y sakra, ma'm serfyo avel oferyas. 14Ty a dhre y vebyon ynwedh ha gorra mantelli warnedha, 15ha'ga untya, dell untsys aga thas, ma'm serfyons avel oferysi: ha'ga untya a vydh dhedha rag oferyaseth vythkwethek dres aga henedhow.

16Yndella y hwrug Moyses, herwydh oll a worhemmynnis an Arloedh dhodho, yndella ev a wrug. 17Hag y'n kynsa mis y'n nessa blydhen, yn kynsa dydh an mis, an tabernakel a veu drehevys. 18Moyses a dhrehevis an tabernakel; ev a worras y selyow, ha settya y framyow, ha gorra y varrow a-ji, ha drehevel y golovenyow; 19hag ev a lesas an tylda dres an tabernakel, ha gorra kudhans an tylda warnodho, dell worhemmynnsa an Arloedh dhe Moyses. 20Hag ev a gemmeras an dustuni ha'y worra y'n argh, ha gorra an gwelynni war an argh, ha settya an dregeredhva a-ugh an argh; 21hag ev a dhros an argh a-ji dhe'n tabernakel, ha settya vayl an groglenn, ha kudha argh an dustuni, dell worhemmynnsa an Arloedh dhe Moyses. 22Hag ev a worras an voes yn tylda an kuntelles, a'n barth kledh dhe'n tabernakel, a-ves dhe'n vayl, 23hag araya an bara warnedhi a-rag an Arloedh; dell worhemmynnsa an Arloedh dhe Moyses. 24Hag ev a worras an kantoler yn tylda an kuntelles, a-dal an voes, dhe barth dhyghow an tabernakel, 25ha settya an lugern a-rag an Arloedh; dell worhemmynnsa an Arloedh dhe Moyses. 26Hag ev a worras an alter owrek yn tylda an kuntelles a-rag an vayl, 27ha leski ynkys hweg warnedhi; dell worhemmynnsa an Arloedh dhe Moyses. 28Hag ev a worras yn hy le kroglenn porth an tabernakel. 29Hag ev a settyas alter an offrynn leskys dhe dharas tabernakel tylda an kuntelles, hag offrynna warnedhi an offrynn leskys ha'n offrynn greun; dell worhemmynnsa an Arloedh dhe Moyses. 30Hag ev a worras an wolghell yntra tylda an kuntelles ha'n alter, ha gorra dowr ynni rag omwolghi, 31ganso may hwrug Moyses hag Aron ha'y vebyon golghi aga diwla ha'ga threys; 32pan ethons a-ji dhe dylda an kuntelles, ha pan dhons nes dhe'n alter, i a omwolghas, dell worhemmynnsa an Arloedh dhe Moyses. 33Hag ev a dhrehevis an klos a-dro dhe'n tabernakel ha'n alter, ha settya kroglenn porth an klos. Yndella Moyses a worfennas y ober.

An Gommolenn a-ugh Tylda an Kuntelles

34Ena an gommolenn a gudhas tylda an kuntelles, ha golewder an Arloedh a lenwis an tabernakel. 35Ha ny ylli Moyses entra tylda an kuntelles drefenn an gommolenn dhe bowes warnodho, ha golewder an Arloedh a lenwis an tabernakel. 36Pan vedha an gommolenn drehevys dhiwar an tabernakel, mebyon Ysrael e war-rag yn oll aga herdhow; 37mes mar ny veu drehevys an gommolenn, nyns ethons war-rag bys y'n jydh may feu drehevys. 38Rag yn oll aga herdhow yth esa kommolenn an Arloedh war an tabernakel dydhweyth, hag yth esa tan ynni40:38 ynni: Henn yw y'n gommolenn; po ow siwya an Septuagint warnodho, henn yw war an tabernakel. nosweyth, a-wel chi Ysrael oll.