Moyses hag Aron a-rag Faro

1A'y wosa, Moyses hag Aron a dheuth a-ji dhe Faro ha leverel, ‘Yndellma y lever an Arloedh, Duw Ysrael, “Gas ow fobel dhe vones may hallons ow goelya y'n gwylvos.” ’ 2Mes Faro a leveris, ‘Piw yw an Arloedh may koelliv orth y lev ha gasa Ysrael dhe vones? Ny aswonnav an Arloedh, ha dhe voy ny asav Ysrael dhe vones.’ 3Ena y lavarsons, ‘Duw an Ebrowyon re vetyas genen; gas ni dhe vones, ni a'th pys, vyaj a dri dydh y'n gwylvos hag offrynna dhe'n Arloedh agan Duw ma na goettho warnan gans pla po gans an kledha.’ 4Mes myghtern Ejyp a leveris dhedha, ‘Moyses hag Aron, prag y kemmerowgh an bobel a'ga ober? Kewgh dh'agas beghyow!’ 5Ha Faro a leveris, ‘Otta, pobel an tir yw lemmyn niverus, ha hwi a wra dhedha powes a'ga beghyow!’ 6An keth jydh, Faro a worhemmynnis dhe'n vestrysi kethneth ha'ga gorweloryon, 7‘Ny rowgh na fella dhe'n bobel kala' rag gwruthyl brykkys avel kyns; gesewgh i dhe vones ha kuntell kala aga honan. 8Mes an niver a vrykkys a wrens seulabrys hwi a sett warnedha, ny'n lehowgh war neb kor; rag diek yns; yndella i a gri, “Deun dhe offrynna dh'agan Duw.” 9Bedhes ober poessa gorrys war an wer may hwonetthens orto ha ma na wrellens vri a eryow gowek.’

10Ytho an vestrysi kethneth ha gorweloryon an bobel eth yn-kerdh ha leverel dhe'n bobel, ‘Yndellma y kews Faro, “Ny rov dhywgh kala'. 11Kewgh agas honan dhe gyrghes kala' yn pub le may hyllowgh y gavoes; mes agas ober ny vydh lehes kammenn.” ’ 12Ytho an dus a veu skattrys a-les dre bow Ejyp oll, ow kuntell sowl rag kala. 13An vestrysi kethneth a wre aga ynnia, ow leverel, ‘Kowlwrewgh agas ober, agas ober pub-dydhyek, kepar ha pan ve kala.’ 14Ha gorweloryon mebyon Ysrael, neb a veu gorrys warnedha gans mestrysi kethneth Faro, a veu gweskys hag y feu govynnys orta, ‘Prag na wrussowgh hwi kowlwul agas ewn rann hedhyw, avel kyns?’

15Ena gorweloryon mebyon Ysrael a dheuth ha kria war Faro, ‘Prag y tyghtydh dha gethyon yndellma? 16Nyns yw res kala vyth dhe'th servysi hag ymons ow leverel dhyn, “Gwrewgh brykkys!” Otta, gweskys yw dha servysi, ha'th pobel dha honan yw dhe vlamya.’ 17Hag ev a leveris, ‘Diek – hwi yw diek; hemm yw an praga hwi dhe leverel, “Gwren mos dhe sakrifia dhe'n Arloedh.” 18Kewgh lemmyn ha gonis; rag ny vydh kala res dhywgh, hwi a wra an keth niver a vrykkys hogen.’ 19Gorweloryon mebyon Ysrael a welas aga bos yn trobel, pan lavarsons, ‘Ny wrewgh hwi yn neb fordh lehe an niver a vrykkys pub dydh.’ 20I a dhyerbynnas Moyses hag Aron esa orth aga gortos dell dheuthons a-dhiworth Faro; 21hag y lavarsons dhedha, ‘An Arloedh re virro warnowgh ha breusi, drefenn hwi re wrug dhyn bos kasadow yn dewlagas Faro ha'y servysi, ha gorra kledha yn aga dorn dh'agan ladha.’

Moyses a Grodhvol a-rag an Arloedh

22Ena Moyses a dreylyas arta dhe'n Arloedh ha leverel, ‘A Arloedh, prag y hwrussys drog dhe'n bobel ma? Prag bythkweth y hwrussys ow dannvon? 23Rag a-ban dheuth dhe Faro dhe gewsel y'th hanow, ev re wrug drog dhe'n bobel ma, ha ty, ny wrussys livra dha bobel kammenn.’