1Mes an Arloedh a leveris dhe Moyses, ‘Lemmyn ty a wel an pyth a wrav dhe Faro; rag ev a's dannvon, krev an dhorn, ha krev an dhorn ev a's gorr yn-mes a'y dir.’

Duw a Elow Moyses

2Ha Duw a leveris dhe Moyses, ‘My yw an Arloedh; 3ha my a omdhiskwedhas dhe Abraham, dhe Ysak ha dhe Yakob avel Duw Ollgalloesek,6:3 Duw Ollgalloesek: Ebrow El Shadday. mes der ow hanow vy, an Arloedh, nyns en vy aswonnys dhedha. 4Ynwedh my re fastyas ow hevambos gansa, dhe ri dhedha pow Kanan, an pow may godrigsens ynno. 5Dhe voy, my re glewas kynvann mebyon Ysrael yw synsys yn kethneth gans an Ejyptianys, ha my re borthas kov a'm kevambos. 6Lavar ytho dhe vebyon Ysrael, “My yw an Arloedh hag a wra agas dri a-dhann veghyow an Ejyptianys ha'gas livra a'ga hethneth ha'gas dasprena gans bregh ystynnys ha dre vreusow meur, 7ha'gas kemmeres avel ow fobel, ha my a vydh agas Duw; ha hwi a woer my dhe vos an Arloedh agas Duw re'gas dros a-dhann veghyow an Ejyptianys. 8Ha my a'gas dre bys yn tir hag a des y ri dhe Abraham, dhe Ysak ha dhe Yakob; my a'n re dhywgh yn perghennogeth. My yw an Arloedh.” ’ 9Moyses a gewsis yndellma dhe vebyon Ysrael; mes ny goelsons orth Moyses drefenn galar aga spyrys ha'ga gonis fell.

10Ha'n Arloedh a leveris dhe Moyses, 11‘Ke a-ji, lavar dhe Faro myghtern Ejyp, may hasso mebyon Ysrael dhe vones a'y dir.’ 12Mes Moyses a leveris a-rag an Arloedh, ‘Otta, ny goelas mebyon Ysrael orthiv; fatell wra Faro goslowes orthiv ha my antrodreghys ow diwweus?’ 13Ha'n Arloedh a gewsis dhe Moyses hag Aron, orth aga gorhemmynna a-barth mebyon Ysrael hag a-barth Faro myghtern Ejyp, dhe dhri mebyon Ysrael yn-mes a bow Ejyp.

Aghow Moyses hag Aron

14An re ma yw pennow aga theyluyow: mebyon Rewben, kynsa-genys Ysrael: Hanok, Pallu, Hesron ha Karmi; an re ma yw teyluyow Rewben. 15Mebyon Simeon: Yemuel, Yamin, Ohad, Yakin, Sohar ha Shaul mab an Gananyades; an re ma yw teyluyow Simeon. 16Ha'n re ma yw henwyn mebyon Levi, war-lergh aga henedhow: Gershon, ha Kohath, ha Merari: ha blydhynyow bewnans Levi o kans ha seytek bloedh warn ugens. 17Mebyon Gershon yw: Libni, ha Shimei, herwydh aga theyluyow. 18Ha mebyon Kohath yw: Amram, hag Yshar, ha Hebron, hag Uzziel: ha blydhynyow bewnans Kohath o kans ha trydhek bloedh warn ugens. 19Ha mebyon Merari yw Mahli ha Mushi: an re ma yw teyluyow Levi war-lergh aga henedhow. 20Hag Amram a gemmeras avel gwreg Yokebed, y vodrep, ha hi a dhug dhodho Aron ha Moyses: ha blydhynyow bewnans Amram o kans seytek bloedh warn ugens. 21Mebyon Yshar: Koragh, ha Nefeg, ha Zikri. 22Ha mebyon Uzziel: Mishael, Elsafan, ha Sithri. 23Aron a gemmeras avel gwreg Elisheba, myrgh Amminadab, ha hwoer Nahshon; ha hi a dhug dhodho Nadab, Abihu, Eleazar, hag Ithamar. 24Mebyon Koragh: Assir, Elkana, hag Abiasaf; an re ma yw teyluyow an Koraghysi. 25Eleazar mab Aron, a gemmeras avel y wreg onan a vyrghes Putiel; ha hi a dhug dhodho Finehas. An re ma yw pennow teyluyow an Levysi herwydh aga theyluyow.

26An re ma yw an Aron ha Moyses a gewsis an Arloedh dhedha, ‘Drewgh mebyon Ysrael yn-mes a Ejyp herwydh aga luyow.’ 27I yth o a gewsis orth Faro myghtern Ejyp, a-dro dhe gyrghes mebyon Ysrael yn-mes a Ejyp, an Moyses ma ha'n Aron ma.

Gorhemmynn an Arloedh dhe Moyses hag Aron

28Hag y hwarva, an jydh may kewsis an Arloedh dhe Moyses yn pow Ejyp, 29an Arloedh a leveris dhe Moyses, ‘My yw an Arloedh; lavar dhe Faro myghtern Ejyp pup-tra a lavarav dhis.’ 30Ha Moyses a leveris dhe'n Arloedh, ‘Otta, my yw antrodreghys ow diwweus; ytho fatell wra Faro koela orthiv?’