1Ha'n Arloedh a leveris dhe Moyses, ‘Mir, my a'th wrug avel Duw dhe Faro, hag Aron dha vroder a vydh dha brofoes. 2Ty a gews oll a worhemmynnav dhis, hag Aron dha vroder a lever dhe Faro may hasso mebyon Ysrael dhe vones yn-mes a'y dir. 3Ha my a wra kaleshe kolonn Faro, ha liesplekhe ow thoknys hag anethow yn pow Ejyp, 4mes ny wra Faro koela orthowgh. Ena my a wra gorra ow dorn war Ejyp ha kyrghes ow luyow, ow fobel, mebyon Ysrael, yn-mes a bow Ejyp dre vreusow meur. 5Ha'n Ejyptianys a woer my dhe vos an Arloedh pan ystynnav ow dorn war Ejyp ha kyrghes mebyon Ysrael yn-mes anedha.’ 6Ha Moyses hag Aron a wrug yndella; i a wrug par dell worhemmynnis an Arloedh. 7Moyses o peswar-ugens bloedh y oes hag Aron tri ha peswar-ugens pan gowssons dhe Faro.

Gwelenn Aron

8Ha'n Arloedh a leveris dhe Moyses hag Aron, 9‘Pan lever Faro dhywgh, “Ombrevewgh dre wruthyl marthus”, ena ty a lever dhe Aron, “Kemmer dha welenn ha'y thewlel a-rag Faro may teffo ha bos sarf.” ’ 10Ytho Moyses hag Aron eth dhe Faro ha gul dell worhemmynnsa an Arloedh; Aron a dewlis y welenn a-rag Faro ha'y servysi, hag y teuth ha bos sarf. 11Ena Faro a elwis an dus fur ha'n bystrioryon; hag i ynwedh, hudoryon Ejyp, a wrug an keth tra der aga artow kevrinek. 12Peub a dewlis war-nans y welenn hag i a dheuth ha bos serf. Mes gwelenn Aron a lonkas aga gwelynni. 13Hwath kolonn Faro o kaleshes ha ny vynna goslowes orta; dell lavarsa an Arloedh.

Plaow Ejyp: Goes

14Ena an Arloedh a leveris dhe Moyses, ‘Kolonn Faro yw kaleshes; skonya a wra a dhannvon an bobel dhe-ves. 15Ke dhe Faro myttin, hag ev ow mos dhe'n dowr; gorta ev war lann an Nil, ha kemmer y'th dorn an welenn a veu treylys yn sarf. 16Ha ty a lever dhodho, “An Arloedh, Duw an Ebrowyon, a'm dannvonas dhis, ow leverel: Gas ow fobel dhe vones, ma'm serfyons y'n gwylvos; hag otta, ny wrussys holya y worhemmynn. 17Yndellma y lever an Arloedh: Dre hemma ty a wodhvydh my dhe vos an Arloedh: otta, gweskel a wrav an dowr usi y'n Nil gans an welenn usi yn ow dorn, hag y fydh treylys yn goes, 18ha'n puskes y'n Nil a wra merwel, ha'n Nil a fler, ha ny vynnons an Ejyptianys eva dowr dhiworth an Nil.” ’ 19An Arloedh a leveris dhe Moyses, ‘Lavar dhe Aron, “Kemmer dha welenn hag ystynn dha dhorn dres dowrow Ejyp, dres aga avonyow, aga dowrgleudhyow, aga pollow kors hag oll aga follow dowr, may teffons ha bos goes; hag y fydh goes dre bow Ejyp oll, hag yn lestri a brenn hag yn lestri a ven.” ’

20Moyses hag Aron a wrug dell worhemmynnis an Arloedh; a-wel dhe Faro hag a-wel dh'y servysi, ev a dhrehevis an welenn ha gweskel an dowr esa y'n Nil, hag oll an dowr esa y'n Nil a dreylyas yn goes. 21Ha puskes an Nil a verwis; ha'n Nil a fleryas, ma na ylli an Ejyptianys eva dowr dhiworth an Nil; hag yth esa goes dre bow Ejyp oll. 22Mes hudoryon Ejyp a wrug an keth tra der aga husow; ytho kolonn Faro a besyas bos kaleshes, ha ny vynna ev goslowes orta; dell lavarsa an Arloedh. 23Faro a dreylyas ha mos a-bervedh yn y ji, ha ny wrug ev vri a hemma hwath. 24Ha'n Ejyptianys oll a balasas a-dro dhe'n Nil rag dowr dhe eva, rag ny yllens eva dowr an Nil. 25Ha seyth dydh a dremenas wosa an Arloedh dhe weskel an Nil.