Kwilkynyow

1Ha'n Arloedh a leveris dhe Moyses, ‘Ke bys yn Faro ha leverel dhodho, “Yndellma y lever an Arloedh: Gas ow fobel dhe vones ma'm serfyons.8:1 8:1 bys 8:32 yw niverys 7:26 bys 8:28 y'n Ebrow, hag y'n Septuagint ha'n Vulgat. 2Mes mara's neghydh a vones, otta, my a wra plagya oll dha bow gans kwilkynyow; 3kwilkynyow a wra hesya y'n avon hag i a wra dos bys y'th chi, a-ji dhe'th chambour ha war dha weli, hag a-ji dhe ji dha servysi ha'th pobel, hag a-ji dhe'th fornow ha'th newyow-toesa; 4an kwilkynyow a wra dos warnas ha war dha bobel ha war oll dha servysi.” ’

5Ha'n Arloedh a leveris dhe Moyses, ‘Lavar dhe Aron, “Ystynn dha dhorn ha'th welenn dres an avonyow, dres an dowrgleudhyow, ha dres an pollow, ha gul dhe gwilkynyow dos war bow Ejyp.” ’ 6Ytho, Aron a ystynnas y dhorn dres dowrow Ejyp; ha'n kwilkynyow a dheuth ha kudha pow Ejyp. 7Mes an hudoryon a wrug an keth tra der aga husow ha dri kwilkynyow war bow Ejyp.

8Ena Faro a elwis Moyses hag Aron, ha leverel, ‘Pys an Arloedh may kemmerro an kwilkynyow ahanav hag a'm pobel; ha my a wra gasa an bobel dhe vones ha sakrifia dhe'n Arloedh.’ 9Moyses a leveris dhe Faro, ‘Gorhemmynn dhymm, my a'th pys, p'eur tal dhymm pysi ragos ha rag dha servysi ha'th pobel, may fo distruys an kwilkynyow ahanas ha'th chiow ma na vons gesys marnas y'n Nil.’ 10Hag y leveris, ‘A-vorow.’ Moyses a leveris, ‘Bedhes par dell leverydh, may hwodhvi nag eus nagonan avel an Arloedh agan Duw. 11An kwilkynyow a wra diberth ahanas hag a'th chiow hag a'th servysi hag a'th pobel; ny vydhons gesys marnas y'n Nil.’ 12Ytho Moyses hag Aron eth yn-mes a Faro; ha Moyses a grias war an Arloedh a-dro dhe'n kwilkynyow a dhrosa war Faro. 13Ha'n Arloedh a wrug herwydh ger Moyses; an kwilkynyow a verwis a'n chiow ha'n godrevow ha'n parkow. 14Hag i a's kuntellas yn bernyow, ha'n tir a flerya. 15Mes Faro pan welas bos hedh, ev a galeshas y golonn, ha ny vynna goslowes orta; dell lavarsa an Arloedh.

Gwibes

16Ena an Arloedh a leveris dhe Moyses, ‘Lavar dhe Aron, “Ystynn dha welenn ha gweskel doust an dor may teffo ha bos gwibes dre bow Ejyp oll.” ’ 17Hag i a'n gwrug; Aron a ystynnas y dhorn ha'y welenn, ha gweskel doust an dor, hag y teuth gwibes war dhen ha best; oll doust an dor a dheuth ha bos gwibes dre bow Ejyp oll. 18An hudoryon a assayas der aga husow dhe dhri gwibes yn-rag, mes ny allsons. Ytho yth esa gwibes war dhen ha best. 19Ha'n hudoryon a leveris dhe Faro, ‘Hemm yw bys Duw.’ Mes kolonn Faro o kaleshes, ha ny vynna koela orta; dell lavarsa an Arloedh.

Kelyon

20Ena an Arloedh a leveris dhe Moyses, ‘Sav a-varr myttinweyth ha sav a-rag Faro, hag ev ow mos yn-mes dhe'n dowr, ha lavar dhodho, “Yndellma y lever an Arloedh: Gas ow fobel dhe vones ma'm serfyons. 21Poken, mar ny esydh ow fobel dhe vones, otta, y tannvonav hesow kelyon warnas ha war dha servysi ha war dha bobel, hag a-ji dhe'th chiow; ha chiow Ejyp a vydh lenwys gans hesow kelyon, hag ynwedh an dor le may sevons. 22Mes y'n jydh na my a wra settya pow Goshen a-denewen, le may ma ow fobel trigys, ma na vo ena hesow kelyon; may hwodhvi my dhe vos an Arloedh yn mysk an nor. 23Yndellma y hworrav dibarth ynter ow fobel ha'th pobel jy. Erbynn a-vorow y fydh an tokyn ma.” ’

24Ha'n Arloedh a wrug yndellma; y teuth hesow meur a gelyon a-ji dhe ji Faro ha dhe jiow y servysi; ha dre bow Ejyp oll an tir a veu diswrys drefenn an kelyon.

25Ena Faro a elwis Moyses hag Aron, ha leverel, ‘Kewgh, sakrifiewgh dh'agas Duw a-ji dhe'n tir.’ 26Mes Moyses a leveris, ‘Ny via gwiw gul yndella; rag ni a wra sakrifia dhe'n Arloedh agan Duw offrynnow yw kasadow dhe'n Ejyptianys. Mar sakrifiyn offrynnow kesys gans an Ejyptianys a-rag aga dewlagas, a ny wrons i agan labydha? 27Res yw dhyn gul vyaj a dri dydh y'n gwylvos ha sakrifia dhe'n Arloedh agan Duw par dell worhemmynnis dhyn.’ 28Ytho Faro a leveris, ‘My a wra agas gasa dhe vones, dhe sakrifia dhe'n Arloedh agas Duw y'n gwylvos; marnas ny wrewgh mones pur bell. Gwrewgh y bysi ragov.’ 29Ena Moyses a leveris, ‘Otta, yth av ahanas ha my a wra pysi an Arloedh may tibartho an hesow a gelyon a Faro, a'y servysi, a'y bobel, a-vorow; marnas na as Faro dhe dhyghtya yn fals arta ma na asso an bobel dhe vones dhe sakrifia dhe'n Arloedh.’ 30Ytho Moyses eth yn-mes dhiworth Faro ha pysi an Arloedh. 31Ha Duw a wrug dell worhemmynnis Moyses, ha dilea an hesow a gelyon a Faro, a'y servysi hag a'y bobel; ny veu gesys nagonan. 32Mes Faro a galeshas y golonn an prys ma ynwedh, ha ny asas an bobel dhe vones.