Mernans an Enyvales

1Ha'n Arloedh a leveris dhe Moyses, ‘Ke dhe Faro, ha leverel dhodho, “Yndellma y lever an Arloedh, Duw an Ebrowyon: Gas ow fobel dhe vones ma'm serfyons. 2Rag mar neghydh aga gasa dhe vones ha'ga gwitha hwath, 3otta, dorn an Arloedh a goedh gans pla meur war agas gwarthek usi y'n parkow, an vergh, an asenes, an kowrvergh, an oghen ha'n greow. 4Mes an Arloedh a wra dissernya yntra gwarthek Ysrael ha gwarthek Ejyp, ma na varwo travyth a bew mebyon Ysrael.” ’ 5Ha'n Arloedh a settyas termyn, ow leverel, ‘A-vorow an Arloedh a wra an dra ma y'n tir.’ 6Ha'n vorow an Arloedh a wrug an dra ma; gwarthek oll an Ejyptianys a verwis mes a'n gwarthek a vebyon Ysrael ny verwis nagonan. 7Ha Faro a dhannvonas, hag otta, nyns o marow nagonan a warthek Ysrael. Mes kolonn Faro o kaleshes ha ny asas an bobel dhe vones.

Bryghi

8Ha'n Arloedh a leveris dhe Moyses ha dhe Aron, ‘Kemmerewgh dornasow lusu a'n forn, ha gasa Moyses dh'aga thewlel war-tu ha nev a-wel Faro. 9Hag y hwra dos ha bos ponn dre bow Ejyp, ha dos ha bos bryghi ow tardha yn kuriegi war dhen ha best dre bow Ejyp oll.’ 10Ytho i a gemmeras lusu dhiworth an forn, ha sevel a-rag Faro, ha Moyses a's tewlis war-tu ha nev, hag y teuth ha bos bryghi ow tardha yn kuriegi war dhen ha best. 11Ha ny ylli an hudoryon sevel a-rag Moyses drefenn an bryghi, rag yth esa an bryghi war an hudoryon ha'n Ejyptianys oll. 12Mes an Arloedh a galeshas kolonn Faro, ha ny woslowas orta; dell gowssa an Arloedh dhe Moyses.

Keser

13Ena an Arloedh a leveris dhe Moyses, ‘Sav myttin a-varr ha sevel a-rag Faro, ha leverel dhodho, “Yndellma y lever an Arloedh, Duw an Ebrowyon: Gas ow fobel dhe vones, ma'm serfyons. 14Rag an dreveth ma my a wra dannvon oll ow flagys war dha golonn, ha war dha servysi ha war dha bobel, may hwodhvi nag eus nagonan avelov vy yn oll an nor. 15Rag erbynn lemmyn my a allsa ystynn ow dorn ha'th weskel ty ha'th pobel gans an pla, ha ty a via treghys a'n nor. 16Mes rakhemma y'th hesis dhe vewa, dhe dhiskwedhes dhis ow galloes, may fo derivys ow hanow war oll an nor. 17Hwath yth omughelhydh erbynn ow fobel, ha ny's gesydh dhe vones. 18Otta, a-vorow a-dro dhe'n prys ma, my a wra dhe goedha keser pur vras, a eghenn na veu gwelys bythkweth yn Ejyp a'n jydh y feu fondys bys lemmyn. 19Lemmyn ytho dannvon, kyrgh dha warthek hag oll a'th eus y'n pras a-ji dhe woskes saw; rag an keser a wra dos war bub den ha best usi y'n pras ha na vydh kuntellys dhe dre, ha merwel a wrons.” ’ 20Ena, ev neb a borthas own a er an Arloedh yn mysk servysi Faro a wrug dh'y gethyon ha'y warthek fia dhe'n chiow; 21mes ev neb na wrug vri a er an Arloedh a asas y gethyon ha'y warthek y'n pras.

22Ha'n Arloedh a leveris dhe Moyses, ‘Ystynn dha dhorn war-tu ha nev, hag y fydh keser yn pow Ejyp oll, war dhen ha best ha pub plans y'n gwel, dre bow Ejyp oll.’ 23Ena Moyses a ystynnas y welenn war-tu ha nev; ha'n Arloedh a dhannvonas taran ha keser, ha tan a resas dhe'n nor. Ha'n Arloedh a lesas keser war bow Ejyp; 24yth esa keser, ha tan owth omdhiskwedhes yn mysk an keser, keser pur vras, a'n par na veu gwelys bythkweth yn pow Ejyp oll a-ban dheuth ha bos kenedhel. 25An keser a weskis peub hag esa y'n gwel dre bow Ejyp oll, ha den ha best; ha'n keser a weskis pub plans a'n gwel ha brewi pub gwydhenn a'n gwel. 26Marnas yn pow Goshen, le mayth esa mebyon Ysrael, ny veu keser.

27Ena Faro a dhannvonas, ha gelwel Moyses hag Aron ha leverel dhedha, ‘My re beghas an prys ma; an Arloedh yw ewn, ha my ha'm pobel yw kamm. 28Pys an Arloedh; rag lowr re beu a'n taran ha'n keser ma; my a as dhywgh mones, ha ny wrewgh hwi gortos na fella.’ 29Moyses a leveris dhodho, ‘Kettell av vy a'n sita, my a wra ystynn ow diwla dhe'n Arloedh; hedhi a wra an taran, ha ny vydh namoy keser, may hwodhvi bos an nor dhe'n Arloedh. 30Mes ty ha'th servysi, my a woer na berthowgh own na hwath an Arloedh Duw.’ 31(Distruys veu an lin ha'n heydh, rag yth esa an heydh yn penn-ys ha'n lin owth egina, 32mes ny veu distruys an gwaneth ha'n gwaneth-spelt, rag diwedhes yns i ow tevi). 33Ytho Moyses eth yn-mes a'n sita dhiworth Faro, hag ystynn y dhiwdhorn dhe'n Arloedh; ha'n taran ha'n keser a hedhis, ha ny goedhas na fella an glaw war an nor. 34Mes pan welas Faro an glaw ha'n keser ha'n taran dhe hedhi, ev a beghas hwath arta, ha kaleshe y golonn, ev ha'y servysi. 35Ytho kolonn Faro a veu kaleshes, ha ny asas mebyon Ysrael dhe vones; dell gewssa an Arloedh dre Moyses.