Breus erbynn an Gusulyoryon Dhrog

1Ena an spyrys a'm drehevis ha'm dri dhe yet est chi an Arloedh, a vir troha'n est. Hag otta, orth an yet yth esa pymp gour warn ugens, ha my a welas yn aga mysk Yaazania mab Azzur, ha Pelatia mab Benaya, pennsevigyon an bobel. 2Ena ev a leveris dhymm, ‘Mab den, an re ma yw an wer usi ow prasa sherewynsi hag ow ri drog-gusul y'n sita ma. 3Yn-medhons, “Nyns yw ogas an termyn rag drehevel chiow; an sita yw an galter ha ni yw an kig.” 4Rakhenna profoes er aga fynn; profoes, mab den.’

5Ena Spyrys an Arloedh a goedhas warnav vy, hag yn-medh ev dhymm, ‘Lavar, Yndellma y lever an Arloedh: Yndella hwi re leveris, chi Ysrael; my a woer an pythow a dheu yn agas brys. 6Hwi re ladhas lies y'n sita ma, ha lenwel hy stretys a gorfow. 7Rakhenna yndellma y lever an Arloedh Duw: An korfow re worrsowgh y'n kres anedhi, i yw an kig, ha hi yw an galter, mes my a'gas dre yn-mes dhiworti. 8Hwi re borthas own a'n kledha; ha my a dhre an kledha warnowgh, yn-medh an Arloedh Duw. 9My a'gas dre yn-mes anedhi, ha'gas ri yn leuv estrenyon ha gul breusow warnowgh. 10Hwi a goedh der an kledha; yn oryon Ysrael my a'gas breus. Ena hwi a woer my dhe vos an Arloedh. 11Ny vydh hi kalter ragowgh, na ny vydhowgh kig a-berth ynni; yn oryon Ysrael my a'gas breus. 12Ena hwi a woer my dhe vos an Arloedh; rag ny gerdhsowgh y'm ordenansow, na ny wrussowgh ow breusow, mes hwi re wrug war-lergh breusow an kenedhlow esons a-dro dhywgh.’

13Lemmyn pan esen vy ow profoesa, Pelatia mab Benaya a verwis. Ena my a goedhas war ow fas ha kria gans lev ughel, ha leverel, ‘Ogh Arloedh Duw! A vynnydh dhiswul remenant Ysrael?’

Ambos Duw dhe Ysrael

14Ger an Arloedh a dheuth dhymm, ow leverel: 15Mab den, dha vreder, dha vreder, dha neskerens, hag oll chi Ysrael yn tien, i yw an re may leveris trigoryon Yerusalem dhedha, ‘Pell yns i dhiworth an Arloedh! An tir ma yw res dhyn yn perghennogeth.’ 16Rakhenna lavar: Yndellma y lever an Arloedh Duw: Kynth y's dannvonas pell yn mysk an kenedhlow, ha'ga skattra yn mysk an gwlasow, my a vydh meneghi ragdha pols byghan y'n gwlasow may teuthons di. 17Rakhenna lavar, Yndellma y lever an Arloedh Duw: My a'gas kuntell dhiworth an poblow, ha'gas kuntell dhiworth an gwlasow may fewgh skattrys ynna, ha my a re dhywgh pow Ysrael. 18I a dheu di ha remova oll hy thaklow vil ha'y thaklow kasadow dhiworti. 19My a re dhedha unn golonn, ha my a worr spyrys nowydh ynnowgh; my a gemmer an golonn a ven dhiworth aga horf ha ri dhedha kolonn a gig, 20rag may kerthons y'm ordenansow ha gwitha ow breusow ha'ga gul. Ena i a vydh ow fobel, ha my a vydh aga Duw. 21Mes an re may kerdh aga holonn war-lergh aga thaklow vil ha'ga thaklow kasadow, my a dhre aga fordh war aga fenn, yn-medh an Arloedh Duw.

22Ena an cherubim a drehevis aga eskelli ha'ga rosow rybdha, hag yth esa glori Duw Ysrael warnedha a-wartha. 23Glori an Arloedh a yskynnas yn-mes a'n sita, ha sevel war an menydh yw a'n est dhe'n sita. 24An Spyrys a'm drehevis ha'm dri dhe'n dhivresow yn Kaldea y'n welesigeth yn Spyrys Duw. Ena an welesigeth a welsen a yskynnas dhiworthiv. 25Ha my a gewsis dhe'n dhivresow oll geryow an Arloedh a dhiskwedhsa dhymm.