Tokyn a'n Gethneth

1Ger an Arloedh a dheuth dhymm, ow leverel: 2Mab den, yth esos trigys yn kres chi diwostydh. Yma dhedha dewlagas dhe weles mes ny welons, yma dhedha diwskovarn dhe glewes mes ny glewons, rag chi diwostydh yns i. 3Ytho ty, A vab den, pareus ragos dha honan fardellow rag divroedh, hag yn golow dydh, hag i ow mires, ke dhe dhivroedh; ke dhiworth dha dyller dhe dyller arall a-wel dhedha. Y hyll bos, i dhe gonvedhes, kyn fons i chi diwostydh. 4Dro dha fardellow yn-mes dydhweyth, kepar ha fardellow divroedh, ha ke dhe-ves gorthugherweyth a-wel dhedha, avel an re a wra mos dhe dhivroedh. 5Pal toll ragos der an fos a-wel dhedha, ha dro dha fardellow dredho. 6Gwra aga drehevel war dha skoedh a-wel dhedha, ha'ga dri yn-mes y'n tewlder. Kudh dha fas, rag na welli an tir; rag my re'th wrug tokyn dhe ji Ysrael.

7Ytho my a wrug kepar dell veu gorhemmynnys dhymm. My a dhros ow fardellow yn-mes dydhweyth avel fardellow rag divroedh, hag y'n tewlder my a balas toll der an fos dre leuv; y'n tewlder my a's dros yn-mes, ha'ga doen war ow skoedh a-wel dhedha.

8Ger an Arloedh a dheuth dhymm myttin, ow leverel: 9Mab den, a ny wrug chi Ysrael, an chi diwostydh, leverel dhis, ‘Pandr'a wredh?’ 10Lavar dhedha, ‘Yndellma y lever an Arloedh Duw: An dhargan ma yw a-dro dhe'n pennsevik yn Yerusalem hag oll chi Ysrael usi ynni.’ 11Lavar, ‘My yw tokyn ragowgh: kepar dell wrug vy, yndella y fydh gwrys dhedha i. Yth ons yn divroedh, yn kethneth.’ 12An pennsevik usi yn aga mysk a dhrehav y fardellow war y skoedh y'n tewlder, ha mos dhe-ves; ev a bal toll y'n fos ha'ga doen dhe-ves dredho; ev a gudh y fas, ma na allo gweles an dor gans y dhewlagas. 13Ha my a les ow roes warnodho, hag ev a vydh kechys y'm antell, ha my a'n dre dhe Babylon, tir an Kaldeanys, mes ny'n gwel, hag ena y ferow. 14Ha my a skatter dhe bub gwyns oll an re usi a-dro dhodho, y weresoryon, hag oll y soudoryon, ha tenna kledha war aga lergh. 15Hag i a woer my dhe vos an Arloedh pan wrav aga skoellya a-les yn mysk an kenedhlow, ha'ga skattra y'n gwlasow. 16Mes my a spar dhiworta nebes anedha dhiworth an kledha, dhiworth divoetter, ha dhiworth pla, rag may teriffons aga thaklow kasadow y'n kenedhlow a dhons di. Ena i a woer my dhe vos an Arloedh.

17Ger an Arloedh a dheuth dhymm, ow leverel: 18Mab den, deber dha vara yn unn grysya, hag yv dha dhowr yn unn grena ha gans fienasow. 19Lavar dhe bobel an tir, Yndellma y lever an Arloedh Duw a-dro dhe drigoryon Yerusalem ha pow Ysrael: I a dheber aga bara yn fienasow, hag eva aga dowr yn euth, rag hy thir a vydh lommhes a bup-tra eus ynno, drefenn freudh oll an re usi trigys ynni. 20An trevow annedhys a vydh ynyal ha'n tir a vydh gwastyes; ha hwi a woer my dhe vos an Arloedh.

21Ger an Arloedh a dheuth dhymm, ow leverel: 22Mab den, Pandr'yw an henlavar ma a'gas beus a-dro dhe bow Ysrael, ‘An dydhyow a hirha, ha pub gwelesigeth a dhe goll’? 23Rakhenna lavar dhedha, ‘Yndellma y lever an Arloedh Duw: My a worr diwedh dhe'n henlavar ma, ha ny'n leverons arta yn Ysrael.’ Mes lavar dhedha, An dydhyow re dheuth nes, ha keweras pub gwelesigeth. 24Rag ny vydh arta fals welesigeth vytholl na fella, na fekyl dhewinieth yn mysk chi Ysrael. 25Mes my, an Arloedh, a gews an pyth a gowsav hag ev a hwyrvydh. Ny vydh delatys na fella; mes yn agas dydhyow, a ji diwostydh, my a gews an ger ha'y gowlwul, yn-medh an Arloedh Duw.

26Ger an Arloedh a dheuth dhymm, ow leverel: 27Mab den, otta chi Ysrael ow leverel, ‘An welesigeth a wra ev hy gweles yw rag lies dydh alemma; ev a brofoes a-dro dhe dermynyow pell.’ 28Rakhenna lavar dhedha, Yndellma y lever an Arloedh Duw: Ny vydh delatys na fella nagonan a'm geryow; an ger a gowsav a vydh gwrys, yn-medh an Arloedh Duw.